Tit 3

¹ Gena naandis ɓaah ciŋ ɓoo kosiɗ ci ne ɓa joy joy teyɗuk kilifaaci na ɓi adgoh kur ki ; ɓa kerhiɗ ɓa te ɓa tokɗuk ne ɓa haɓiɗ in baahiɗ nu nik.

² Ɓa ɓasuu ali ɓo', ɓa wortuk lahtoh, ɓa nik ɓo' baahiɗ, ɓa nik ɓo' soosiɗ ŋ ɓooɓi jen.

³ Ɗeɓgaan ɓoo namee nik ɓo' naandiɗ, ɓooɓi kerhiɗɗi ali ɓo', ɓo' muuƴiɗ, a kiñin ciŋ ɓoo na waaɗ-waaɗ nu nik ceɗ adgiɗee ɓoo. Ɓoo peseeɗa ŋ añaand na siistiɗoh, ɓoo nikee sangaah te ɓoo sangtiɗohha ŋ harmban ɓoo.

⁴ Waaye wi Kooh, Yi Mucɗohiŋ ɓoo, teeɓoh baahkiŋ ɗe na waaɗiŋ ɗe na ɓooɓi,

⁵ a mucɗiɗ ɓoo. Te wa ŋ tumohaaɗ ci, ciŋ ɓoo yurhiɗ ci haa, waaye ɓoo misik ɗe misik, a muciɗta ɓoo taamboh ŋ ɓooki, ɓooki tah ɓoo rimkis, a onnda ɓoo kipes as taamboh ŋ Fuuɗsi Hoolohngaani ;

⁶ a ruhsiɗta Fuuɗsi Hoolohngaani laayoh na laayoh nga ɓoo, taamboh ŋ Yeesu Kiristaa Mucɗohiŋ ɓoo.

⁷ Ŋ baahohi a baahoh ɓoo, a ambiɗ ɓoo ɓo' yurhiɗ, a onnda ɓoo kipes ki reehanɗi, wi ɓoo ooluk ne ɓoo heya rahse.

⁸ Woo keem wooriɗ, te ŋ waaɗiɗ ne fu ndengiɗa baahiɗ, ne ɓi kos Kooh liiɓ ciŋ ɓa puluu ŋ ndengɗuk ŋ tum in baahiɗ. Ineem weɗ moɗ te wa raakka njiriñ ŋ ɓooɓi.

⁹ Waaye wortuka taastiɗoh ci naandohaaci, limiŋ caac ci, na lahtoh ci na taastiɗoh ci ŋ ini kaɗ ŋ waasiŋMusaa. In ceem jen ca raakɗi njiriñ te ca ɓarang ɓarang.

¹⁰ Yaa nu ɓek saɓsukoh ŋ ɓooɓi ɗah, woytohaa ɗe waas yino po waas kanak, a ɓoƴsohɗi ɗah, aañaa ɗe ŋ Janguuni,

¹¹ ɓo' mand ɗaa ɗah, wa wooraat ɗa ne a faɗiɗ waasi yurhiɗi. A na bakaaɗe, a atte'iɗ haf ce po ƴutiɗ.

¹² Ŋ hey ɗa woosohe Artemas wala Tisikos. A ree ɗah, ndengɗuka fu hay fu raak ko ŋ Nikopolis. Ŋ ambiɗ ne jamanooniŋ soosi ŋ nikana ndaam.

¹³ Ndengɗuka fu taambkoh Senas ngelohi, a yi na Apolos po ɓa raak in ci ɓa etoh jen ŋ ɓaaɓiŋ ɓa.

¹⁴ Ɓooɓiŋ ɓoo joyiɗ nam jang tum baahiɗ ne ɓa ɓaatɗoh ɓo' ŋ etoh ci keeh-keeh ci, ŋ ineem kipes ciŋ ɓa min raakiɗ ɓo' njiriñ.

¹⁵ Ɓooɓi nik na so jen ɓii kañiɗ ɗa. Kañɗiɗ to nawleeciŋ ɓoo kosiɗ ci. Kooh baahohaat ɗu jen !