Macce 21
WBT1 Yeesu na taalubeeciŋ ɗe taalndiɗta ŋ waas Yerusalem. Wa ɓa kaɗ po ɓa heeɗa ree, teemb kur kaŋ Betfase, ŋ sero Tangooraŋ-Oliiw-ca, Yeesu woossa kanak nga ɓa.
2 A woosa ɓa ne : « Kaɗaat ŋ kur ki ŋ fikiiɗu wii, ɗu ree rek ɗah, ɗu hey hote mbaam riɓ tokuuɗ nga na cumbriŋ ɗe. Toksaat ca, ɗu kom mbo ca ndii.
3 Te ɓo' meekis ɗu ɗah, woyaat ɗe ne : “ A kilifaani etoh ca. ” Ŋ ineem, a jaaran ɗu faɗ ɗu hay na ca. »
4 Ineem raakka ne ina woosuuɗa woyee raak :
5 « Woyaat kur kiŋ Siyong ne : “ Buuriŋ ɗa yii hay nga ɗa, a ruhsiɗiɗ haf ce, a rap mbaam, cumbur mbaam, ɗoopaat sifoh. ” »
6 Taalubeeca kanak ca kaɗta, ɓa haɓiɗta ina Yeesu nakee ɓa.
7 Ɓa ɓayya mbaama na cumbra, ɓa raɗta kulɓaacaŋ ɓa nga ca, Yeesu rappa.
8 Ɓo' laayiɗ ŋ mboolnda raɗiɗta ɗe kulɓaacaŋ ɓa ŋ waasa ; ɓum raɗɗeeɗa ɗe na saaf ciŋ kidig ci ɓa piike.
9 Mboolnda hunnda kaɗeeɗa, ɓum adugka Yeesu, ɓum ñaakeeɗa nga ɗe ; ɓa woyeeɗa ŋ ɗafka ne : « Hosaana setiŋ Dawuuda ! Ɓoyi na haye ŋ tiikiŋ Heɗi, a raakaat barke ! Hosaana ŋ jol jol ɗafka ! »
10 Wa Yeesu aasee Yerusalem, kur ka jen yoondeeɗa yoond, ɓa woyeeɗa ne : « Ya ɓa yii ? »
11 Mboolnda loffa ne : « A Yeesu, Woosuuɗiŋ Kooh, yi puloh Nasareet ngaŋ Galile. »
12 Wa Yeesu ree, a aassa ŋ Kahan Kooh, a aannja toonoh ca na romoh ca nikee nga jen, a folla taaɓul caŋ wecce'oh ca, na ɓoofohaacaŋ toonoh banuut ca.
13 A woosa ɓa ne : « Kooh woyiɗ ŋ Fiis ci Hooliɗ ci ne : “ Kahan ndo teeksan kahan kiimoha Kooh, ” waaye ɗu tumiɗa ɗembohaaniŋ rokoh ci. »
14 Ɓi fuuliɗ na ɓi yiiɓoh hayya nga ɗe ŋ Kahan Kooh, a wiriɗta ɓa.
15 Kilifaacaŋ seeƴkiɗoh caŋ waasiŋMusaa na jangɗohoh caŋ wa hotta in ca feyohiɗ ca a haɓiɗ na leehka komaakca leehkee ŋ ɗooƴ Kahan Kooh an : « Hosaana setiŋ Dawuuda ! » Ɓa ayrukka,
16 ɓa woosa Yeesu ne : « Fu kerhiɗ ini ɓa na woye e ? » A loffa ɓa ne : « Ee, ŋ kerhiɗa, waaye hanaa ɗu moosɗi jangoh inii ŋ Fiis ci : “ Fu tumiɗ po komaakci ƴin ci na gooy ci ɓa ɗii ƴeek ɗa. ” »
17 Ƴutta, a faɗta ɓa ndaam, a pulla kur ka, a kaɗta Betani, a neehha nga.
18 Wa Kooh wiis na ɓaaɓa, a dokkisseeɗa kur-taaha, a aɗukka.
19 A hotta tas ndun ŋ sero waasa, a reɓpa nga waaye a hotɗi ali in nga ɗal saaf. A woosa nduna ne : « Fu heyɗi rimisse muk ! » Ŋ ɗiska ɗiska, nduna suyya.
20 Wi taalubeeci hot ineem, ɓa feyuusa, ɓa woosa ne : « Wa min na nikoh nduni suy ŋ ɗiski ɗiski ? »
21 Yeesu loffa ɓa ne : « Ñam na woyee ɗu wa te wa keeh, ɗu kos te ɗu raakɗi liiɓ kanak nga ɗah, ɗu hey haɓɗe ini ŋ haɓiɗ nduni, ali ɗu woo sah tangoorii ne wa kurkaat ndii, wa kaɗ keena ŋ cookma ɗah, wa hey raake.
22 In nu ɗu kiim Kooh na kos ɗah, ɗu hey wa rahse. »
23 Wa Yeesu kaɗ po a aassa ŋ Kahan Kooh, kilifaacaŋ seeƴkiɗoh caŋ waasiŋ Musaa na yakak ca hayya nga ɗe, wa raak ɗe jangɗoheeɗa, ɓa woosa ɗe ne : « In ci fu na haɓɗe, fu gaƴuk nde po fu kaannja ca haɓiɗ ? Ya ɓa tufkiɗ ɗa po fu haɓɗee ca ? »
24 A loffa ɓa ne : « Ŋ hey ɗu name meekis in yino, ɗu lof fo ɗah, ŋ nam ɗu woo ini tufkiɗ to po ŋ haɓɗee in cii.
25 Ya ɓa tuuƴee Yahya ne a ɓoktoh, a Kooh wala ɓi ɓo' ? » Ɓa woyeeɗa ŋ harmban ɓa ne : « Ɓoo woo ɗe ne Kooh a yi woos Yahya ɗah, a na hee ɓoo woye ne : “ Wa ye tah ɗu kosɗi ɗe ? ”
26 Te ɓoo woo ne, e ɓi ɓo' tuuƴ ɗe ɗah, a', mboolndi cariɗ neƴƴoh. Ɓa jen ɓa amb ne Yahya nikee woosuuɗ. »
27 Weɗ ɓa lofoh ɗe ne : « Ɓoo inahɗi. » Yeesu nammba ɓa woo ne : « Ŋ namanɗi ɗu woo ini tufkiɗ to po ŋ haɓɗee in cii. »
28 Yeesu woyissa ɓa ne : « Ɗu liiɓ ye ŋ naandsukii ? A nikee ƴaar, a raakka komaaki ƴaar kanak, a woosa yi koc ne : “ Kuɓu, woti kaɗa fu pangka ŋ yohnaŋ reseñaŋ ngo. ”
29 Kuɓka loffa baab ɓa ne : “ Ŋ heyɗi kaɗe. ” Waaye, wa degga ƴissuut, inwaaso ammba ɗe, a kaɗta.
30 A kaɗissa ŋ yinoora, a woyissa ɗe ineem. Yeem loffa ɗe ne : “ Ee baab, ŋ hey kaɗe. ” Waaye, a kaɗɗi. »
31 Yeesu meekissa kilifaaca ne : « Komaakci kanak ceem, a yinde tum waaɗ-waaɗiŋ baab ɓa nga ɓa ? » Ɓa loffa ɗe ne : « A yi koc. » Yeesu woosa ɓa ne : « Ñam na woyee ɗu wa te wa keeh, juuti'oh ci na toonkoh ci ɓa ɗaa adug ɗu ŋ Nguuriŋ-Kooh.
32 Laam Yahya hayiɗ, a teeɓohha waasi yurhiɗi ; ɗu kosɗi ɗe. Waaye juuti'oh ci na toonkoh ci kosiɗ ɗe te ɗu hotiɗ ŋ ineem waaye poyi ɗu ɓoƴsohɗi pesohaaɗ ne ɗu kos ɗe.
33 Sikɗukaat andiin wiiriis an : A nikee heɗ kahan, a yippa yohon reseñ. A ɗinngaa po wa willa, a acca nung pooƴoha reseña nga, a haɓiɗta paraang niiɗohaa wa. Ƴutta, a hanndaa deg ŋ yaah ɓi guuroh reseñ ne wa ruund ɗah ɓa paysoh ; a ɓaaɓpa.
34 Wa nguɗaŋ reseña ree, a tuuƴca ñaam ciŋ ɗe ŋ guuroh ca ne a rahas ɓakiŋ ɗe ŋ reseñi.
35 Guuroh ca ammba ñaam ca ; ɓa laɓpa yi, ɓa appa yum, ɓa tapsohha ya tas atoh.
36 A tuuƴissa ɓi ñaam wiiriis, ɓi uup laay ɓa koc, waaye guuroh ca tummba ɓa ina ɓa tumee ɓen rek.
37 Ŋ mirndaani, a woossa kuɓkiŋ ɗe, a woosa ŋ haf ce ne : “ Ɓa hey supke kuɓkiŋ ngo. ”
38 Waaye wa guuroh ca hot kuɓka, ɓa woosa harmban ɓa ne : “ Lamohiŋ yohni a yi ! Hayaat ɓoo ap ɗe, ɓoo raak lamaahiŋ ɗe. ”
39 Ɓa ɓayya ɗe, ɓa puliɗta ɗe yohna, ɓa appa ɗe. »
40 Ŋ ineem, Yeesu woosa ne : « Heɗ yohniŋ reseñi hay ɗah, a tuman guuroh ceem na ? »
41 Kilifaacaŋ Yawuut ca loffa ɗe ne : « Ɓooɓi baahaaɗiiceem, a hey ɓa ape fut, a deg yohna ŋ yaah ɓi guuroh wiiriis, ɓi eɗan ɗe ini a raak nga ŋ jamanoonaŋ wa. »
42 Yeesu woosa ɓa ne : « Mand haa ne ɗu moosɗi jangoh ini Fiis ci Hooliɗ ci woo wii : “ Atoh fi taɓahoh ci mbetee mirndohiɗ nik atoh fi amb taɓahi. Wa puloh ŋ Heɗ ɓoo, wa in feyohiɗ nga ɓoo. ”
43 Weɗ tah, ñam na woyee ɗu ne : Nguuriŋ-Kooh hey teyse ŋ yaah ɗu, cuuɓ wiiriis wi eɗohan rim ciŋ wa, hey wa eɗse. [
44 Ɓo' nu keen ŋ atoh feem ɗah, a hey weersukohe te ɓo' nu wa keen ŋ ɗafuk ce ɗah, wa hey ɗe ruñuɓsohe.] »
45 Kilifaacaŋ seeƴkiɗoh ca na Farisen ca marakka woo ka, ɓa inahha ne Yeesu woyee ini kaɗ nga ɓa ŋ andiin ca.
46 Ɓa waakeeɗa findi ɓaa hee ɗe ambohe, waaye ɓa neƴƴoheen mboolnda, laam ɓeem ambee ɗe findi Woosuuɗ.