Pula 27
WBT1 Fu hey waake hang kassiya, fu haɓiɗ kees seeƴkoha ; wa nikan kaare, ɓak nu nga nik saangal kanak na camban ; njooliini nik suung kaahay.
2 Fu hey pulɗe wiic ciŋ wa ŋ koñ ciŋ wa nikiis ci, fu puliɗndohan ca ŋ hangi wa haɓɗohsan, wa na hee ulse jen na moos ruumind.
3 Fu hey name haɓiɗ in ci na hune naa : tumohaaciŋ weti niiniɗi na peel ci, tumohaaciŋ ñif mi na lisse, furset ciŋ sepet ci na tumohaaciŋ ƴuuƴ ci ; in ceem jen, ca haɓɗohsan moos ruumind.
4 Fu hey wa haɓɗiɗe giryaas moos ruumind, wa raakan koñ nikiis, koñ nu nga ɗah raak in haa kiñi.
5 Fu hey wilɗe nguɓiŋ seeƴkohaani na kaadar, fu deg giryaasi ŋ ɗooƴi ŋ ooɓ kaadari, wa yoor ŋ leerni po ŋ leerniŋ njooliiniŋ seeƴkohaani.
6 Fu haɓiɗ ndooɗ kassiya kanak, fu ul ca na moos ruumind. Ca ɓeksan ŋ kiñiici nik ŋ ɓak ci kanak ciŋ seeƴkohaani ne wa ɓaysee ɗah.
8 Wa nikan kees, ɗooƴi nik hulang, wa haɓɗohsan findi wi ŋ teeɓ ɗa ŋ tangoori ndii.
9 Ini wil Genohaani raakaat bayaal. Bayaaleem, wilɗaa na piis teɗohuuɗ leeŋ eɗfiɗ ndengiɗ. Ɓak yaah-sing ne fu eɗ pulohaaɗ-noh finho, fu aasee ɗah, wa nikaat saangal ndaŋkiyaah-yatuus (50).
10 Piis ci na hee tokse ŋ kumbin ndaŋkiyaah-kanak (20), kumbin ci yipu ŋ tufkoha ndaŋkiyaah-kanak (20) haɓɗohu moos ruumind, te ca raak koroha na ñoori ca na hee ɓekohse haɓɗohu haalis.
11 Ɓaki lah yaah-ñaahum hendaat ɗaa, wa nam haɓɗohu ɗaa.
12 Angiini, ŋ ɓaki lahoh muyohaaɗ-noh, wa na hee nike saangal ndaŋkiyaah-kanak na yatuus (25), ca nam toku ŋ kumbin ndaŋkiyaah, ca yipu ŋ tufkoha ndaŋkiyaah.
13 Ɓakiŋ aasohaani, ŋ pulohaaɗ-noh, namaat nik saangal ndaŋkiyaah-kanak na yatuus (25).
14 Ɓak ci kanak ci aasohaani nik ŋ leerniŋ ca, waa nu nga piis ciŋ wa nikaat saangal yasna-kanak na camban, wa raak kumbin kaahay yipuuɗ ŋ ɓi tufkoha.
16 Aasohaani raakaat rido, wa nikan saangal ndaŋkiyaah. Ridooni haɓɗohsan leeŋ eɗfiɗ ndengiɗ, wa moɗsinu na ooy bulo na ruumind eɗfiɗ na ruumind coy. Fu tokɗoh ca na kumbin nikiis yipuuɗ ŋ tufkoha nikiis.
17 Kon ɗingiŋ bayaali jen haɓɗohsan ɓi kumbin yipuuɗ ŋ ɓi tufkoha haɓɗohuuɗ moos ruumind, ca raak ñoor na koroha haɓɗohuuɗ haalis.
18 Hutiiniŋ bayaali nikan saangal ndaŋkiyaah-yatuus (50), angiini nik saangal ndaŋkiyaah-kanak na yatuus (25). Njooliiniŋ ɗingi nikan suung yaah yatuus, wa haɓɗohsan leeŋ eɗfiɗ ndengiɗ, tufkohaaci kumbin ci na hee yipohse haɓɗohu moos ruumind.
19 Tumohaaci na pangkohse ŋ Genohaani, na tatohaaci amba ŋ kehƴi, na ciŋ ɗingi wila, ca jen ca naman haɓɗohu moos ruumind.
20 Fu hey nake Israayel ci ɓa eɗohee diwliin oliiw riiƴuuɗ, siɗuuɗ, wi kaɓɗan laampaaci wek nu ree.
21 Ŋ ɗooƴ Ɗiipi-na-Cohohse , ndo fu reyan ridooni ɗasiɗ Wahndeeni ɗah, Aaruna na kuɓuuciŋ ɗe taambkoh laampaaci, ca neehan neeh kaɓ, niin po Kooh wiis. Wa nik nakohi Israayel ci taambɗan gomal nu gomal.