2 Saaŋ 1

¹ Mi, yakkiŋ Janguuni, mi yii fiis ɗa, fu yi Ɓitɓi Kooh tan na kuɓuuciŋ ɗa. Ŋ keeñkohiɗ ɗu keeh-keeh. A mi dong waaɗ ɗu haa, waaye na ɓi inah jen keeh ki kaɗ ŋ Kooh.

² Ɓoo waaɗiɗ ɗu sagu keeh ki ɓoo jen ɓaah te wa nikan nik ngaŋ keeñ ciŋ ɓoo po faw.

³ Kooh Baabi hey ɓoo baahohe, ɓoo misik ɗe, a on ɓoo jam. Yeesu Kiristaa kuɓkiŋ Baabi hey ɓoo baahohe, ɓoo misik ɗe, a on ɓoo jam. Ŋ ineem ɓoo pesee ŋ keeh na waaɗoh.

⁴ Ŋ sumiɗ lool ŋ hotiɗ ɓum ngaŋ kuɓuuciŋ ɗa ɓii pes ŋ keeh ki findi nakohi ɓoo jen rahas ŋ Baabi.

⁵ Te ɗiski wa nik, mi yii kiim ɗa fu yi Ɓitɓi ne ɓoo jen waaɗtiɗohaat. Ini ŋ fiis ɗa wii, wa nakoh as haa, waaye wa nakohi ɓoo rahas ŋ cambohaana.

⁶ Te waaɗoh weɗ ne ɓoo pesee ŋ nakoh ciŋ Kooh. Wii weɗ nakohi, findi ɗu kerhoha ŋ cambohaana poyi : Ɓoo pesaat ŋ waaɗtiɗoh.

⁷ Ɓo' laayiɗ pasarkohiɗ ŋ adinaani te ɓa na ñaañohe ñaañoh ɓo', ɓa teyɗukɗi ne Yeesu Kiristaa hayiɗ ŋ Adina na faan, findi ɓo'. Ɓoyi na taase ineem, a ñaañohoh ɓo', a sangiɗiŋ Kiristaani.

⁸ Tufkaat ŋ haf ɗu, ne ɗu ñakuu ini pangkiŋ ɓoo rim, waaye ɗu rahas aaf mitiɗ.

⁹ Ɓo' nu kaɗ ini uup us ndeem te a topɗi ŋ jangɗohi ŋ ini kaɗ ŋ Kiristaani ɗah, a raakɗi Kooh ; ɓo' nu top ŋ jangɗoheem ɗah, a raakiɗ Baabi na Kuɓki.

¹⁰ Kim ɓo' hey ɗu marke a kom ɗu jangɗoh wiiriis wi ɗaloh na jangɗoheem ɗah, kinaat ɗe daliɗ ŋ kahan ciŋ ɗu, kinaat sah tahas kañɗohiŋ ɗe.

¹¹ Laam ɓo' nu tahas ɗe ŋ kañɗohiŋ ɗe ɗah, a hun hun na ɗe ŋ tumohaaɗ ciŋ ɗe baahaaɗiici.

¹² Raakiɗ in laayiɗ ci ŋ joy ɗu woo waaye ŋ waaɗɗi ca fiis ŋ kayit findi an ; ŋ oolkiɗ ne ŋ hey ɗu hee marke, ŋ woo na ɗu ɓo' na ɓo' ne ɓoo uup sum.

¹³ Kuɓuuciŋ taambɗoh fu ɓitiɓ yi Kooh nam tan, ɓii kañiɗ ɗa.