1 Saaŋ 1

¹ Ini raakee, kooɗoh ŋ camba poyi, ɓoo kerahhaa, hotoottaa na has ciŋ ɓoo, ɓoo marakkaa baahiɗ te ɓoo laallaa na yaah ciŋ ɓoo, weɗ Woo ki na onohe kipes ki.

² Kipes keem teeɓohkiɗ te ɓoo hotiɗa. Ɓoo na seede'ee wa te ɓoo yegɗee ɗu wa, weɗ kipes ki heyɗi reehe, wi nikee na Baabi te wa teeɓukka ɓoo.

³ Mbaa ini ɓoo hot, ɓoo kerahhaa, ɓoo ɓii nam ɗu wa yegiɗ, ne ɗu nik yino na ɓoo, ɓoo hun nik yino na Baabi na Kuɓkiŋ ɗe Yeesu Kiristaa.

⁴ Te ɓoo ɓii fiis ɗu in cii ne sumiŋ ɓoo mit.

⁵ Yegɗohi ɓoo kerah ŋ Yeesu Kiristaa te ɓoo yegɗee ɗu wa weɗ ne Kooh a siñaar te ali ñuus nikɗi nga ɗe.

⁶ Ɓoo woo ne ɓoo yino na Kooh, te ɓoo tiindee ŋ ñuus ɗah, ɓoo na leye te ɓoo pesɗi ŋ keeh.

⁷ Waaye ɓoo nik ŋ siñaar findi Kooh nikoh ŋ siñaar ɗah, ndeem, ɓoo yino ŋ harmban ɓoo te ñif miŋ Kuɓkiŋ ɗe Yeesu wa ɗii hooliɗ ɓoo ŋ bakaaɗ ci jen.

⁸ Ɓoo woo ne ɓoo raakɗi bakaaɗ ɗah, ɓoo na ñaañohe haf ɓoo, te keeh ki nikɗi nga ɓoo.

⁹ Ɓoo teyɗuk bakaaɗ ciŋ ɓoo ŋ fiki Kooh ɗah, Kooh cariɗ oolku te a yurhiɗ. A hey ɓoo ɗaase, a hooliɗ ɓoo ŋ yurhaaɗi nu nik.

¹⁰ Ɓoo woo ne ɓoo bakaaɗɗi ɗah, ɓoo na woye ne Kooh leyoh, te woo kiŋ ɗe nikɗi nga ɓoo.