1 Korenta 13

¹ Ali ŋ jombee peɗeem ciŋ ɓo' ci, na ciŋ malaakaaci, te ŋ waaɗɗi morom mbo ɗah, ŋ mand na joolooliini na laɓse dong wala bargi na tipse.

² Ali Kooh woyee taamboh nga so, ali ŋ inah in ci ɗasɗukiɗ ci na inhaah ci jen, ali kosiŋ ngo kaɗ po ŋ yongsee tango sah te ŋ waaɗɗi morom mbo, ŋ tus haa.

³ Ali ŋ paysoh raak-raakiŋ ngo jen, ŋ eɗoha kañam wuu ñakiɗ ci, ŋ nam eɗoh faaniŋ ngo ne wa dohu , te ŋ waaɗɗi morom mbo ɗah, wa raakiɗɗi so ali njiriñ.

⁴ Ɓoyi na tume sagu waaɗ-waaɗ, a na muñe muñ, a na raake keeñ moɗiɗ, a na siisoheeɗi, a na tipkeeɗi, a na yaksiɗkeeɗi.

⁵ A na tumeeɗi in supkiɗohiɗ, a na waakeeɗi ini njirñan haf ce, a na yooɓeeɗi ayruk, a na ɗaakeeɗi aay-keeñ.

⁶ A na sumeeɗi ŋ ini lahɗi waas, waaye a na sume ŋ ini nik keeh.

⁷ Ɓoyi na tume sagu waaɗ-waaɗ, a na degge in nu nik, a raak ooluk ŋ in nu nik, a gen yaakaar in nu nik, a teyɗuk gaduk in nu nik.

⁸ Waaɗ-waaɗ na sooƴeeɗi muk. Mbeh hey haye Kooh woyissanɗi taamboh ŋ ɓo', jomb peɗmi fu inahɗi reehɗu, ki'inah reehɗu.

⁹ Laam ki'inhiŋ ɓoo tasiɗ te findi ɓoo na woyohe woo ci puloh ŋ Kooh, tasiɗ ;

¹⁰ waaye ini mitiɗi hay ɗah, ini tas mit reehɗu.

¹¹ Wa ŋ nikoh komaaki, ŋ woyee findi komaaki, ŋ hotee findi komaaki, ŋ liiɓee findi komaaki ; wi ŋ nik yakak, ŋ faɗta in komaaki.

¹² Woti-woti ɓoo hotɗi jahran, ɓoo na hote findi ɓoyi na marke ŋ seetu, waaye kim, ɓoo hotan jahran. Woti-woti ki'inhiŋ ngo tasiɗ, waaye kim, ŋ hey inhe inah mitiɗ, findi Kooh inhoh ho.

¹³ Kon, in ci kaahay cii genan gen : Kos, yaakaar, na waaɗ-waaɗ, waaye wi uup yak nga ca, e waaɗ-waaɗ.