Sam 87

1 Kuria e Zihova sa Nana vasileana nomana koasa toqere hopena. 2 Tataru sisigiti nia Sa sa popoa Zerusalema, hola ni sari kaiqa vasidi pule pa Izireli. 3 Gamu na tiena sa vasileana te Tamasa; mi va avosi sari na tiṉitoṉa variva magasadi pu zama ni Sa koa sa ginugua mia gamu. 4 “Kaqu nae turaṉae ni rau sari pa Izipi meke Babiloni, koari na butubutu pu va tabei sari na Qua zinama; meke sari na tiedi rina popoa Pilisitia, Taea, meke Itiopia si kaqu nae somana ni Rau koari na tiena sa popoa Zerusalema,” gua si Asa. 5 Koasa guguana sa popoa Zaione, si kote ta zamae si asa, “Tanisa sari doduru butubutu, meke Asa sapu Ululuna Hola si kaqu va ṉiṉira ia si asa." 6 Kaqu kubere gore ni e Zihova sari na tinoni meke zama, “Sa tie hie si ta podo pa Zaione tugo,” gua. 7 Peka, na kera si arini. “Koa pa Zaione sa ṉati di ri doduru minana,” gua si arini.