Sam 3

1 Ke Zihova, soku lala dia tu saripu kukiti nau, sokudi tugo saripu varipera mae koa rau. 2 Sokudi rina tie pu zamazama nau si zama, “Lopu kaqu toka nia Tamasa si asa,” gua! 3 Ba Agoi Zihova, si na qua lave doduru totoso pa tinasuna; meke poni nau sa minataqara na vina lavata. 4 Tepa va ululae la ia rau sa tinokae koe Zihova, meke va avosau Sa pa Nana toqere hope pa Zaione. 5 Eko si rau meke puta, meke vaṉunu si rau, ba korapa kopu nau e Zihova! 6 Lopu kaqu matagutu ni rau sari na tina na tina qua kana pu koa pa vari likohaequ. 7 Ke Zihova qua Tamasa, tuturei mae, mamu harupau! Mu sekei isumatadi sari na qua kana, Mu pako pani livodi sari na tie kaleadi. 8 Sa vinasare si Tamugoi Zihova tugo, sa tinamanae Tamugoi si mani koa koari na Mua tie!