Ola Saam 61

1 God, irrim mi wen mi kraikraibat. Irrim main preya. 2 Mi nogudbinji en mi jidan longwei brom main kemp. Mi jingat langa yu. Meigim mi jidan seifwan, 3 dumaji yu na oldei maindimbat mi. Yu na brabli strongbala blanga seibum mi brom main enamimob jis laiga strongwan haus. 4 Larram mi jidan langa yu seikridwan haus olagijawan. Larram mi jidan seifwan langa yu bingga wulijim beibiwan jukjuk weya im jidan seifwan andanith langa im mami wing. 5 God, yubin irrim main pramis, en yubin gibit mi wanim yubin gibit langa ol detlot pipul hu oldei rispek langa yu. 6 Yu larram det king jidan laibala longtaim, en larram im bigininimob jidan king afta langa im. 7 God, im garra oldei jidan bos, en yu garra oldei lukaftumbat im garram yu trubalawan filing blanga laigimbat olagijawan. 8 Blanga tharran na, ebridei ai garra oldei sing preis song langa yu wen ai gibit yu wanim aibin pramisim yu.