Ola Saam 122

1 Aibin gudbinji wen deibin tok langa mi, “Kaman! Wi ol go langa det haus blanga YAWEI." 2 Wal wi iya na jandapbat insaid langa detlot geit blanga Jerusalem. 3 Jerusalem im det taun weya deibin bildimap brabli gudwei, en weya ola pipul kaman mijamet nomo garram eni trabul. 4 Dijan na det pleis weya ola klen blanga Isreil kaman mijamet blanga gibit theingks langa YAWEI jis laik imbin tok langa im wed. 5 Iya na ola king blanga Isreil jidan blanga kotimbat olabat pipul. 6 Askim God blanga larram ola pipul langa Jerusalem jidan gudbinjiwei. Prei langa God, “God, larram ol detlot pipul hu laigim yu jidan gudbinjiwei. 7 Larram ol detlot pipul jidan gudbinjiwei deya insaid langa det wol blanga Jerusalem, en ola boswan jidan seifwan langa olabat bigwan haus." 8 Dumaji ai laigim main femili olabat en ol main fren olabat, ai askim God blanga larram olabat jidan gudbinjiwei. 9 En dumaji ai laigim det haus blanga YAWEI, wi God, ai askim im blanga larram ebribodi langa Jerusalem jidan gudbinjiwei.