Ola Saam 113

1 Preisim YAWEI det trubalawan God! Kaman en preisim im neim ol yumob hu wek blanga im. 2 Preisim im neim tudei en olagijawan. 3 Wi garra preisim det neim blanga YAWEI brom sangidaptaim raidap sangodantaim. 4 YAWEI im jidan mowa haibalawan langa ola pipul langa ebri kantri tudei. Im jidan mowa haibalawan oba ebrijing ontop langa hebin. 5 Nobodi gin jidan wulijim YAWEI det trubalawan God blanga wi. Im jidan brabli haibalawan na. 6 Im jukdan blanga luk ebrijing langa skai en langa dijan wel. 7 God im album ol detlot powan pipul hu nomo garram enijing, jis laik dei jidan langa det rabishwan pleis, en brom deya im lidimap olabat, 8 en im meigim olabat jidan mijamet garram ola bos blanga im pipul olabat. 9 Wen det waifwan kaan abum biginini, wal YAWEI larram im blanga abum biginini, en det gel jidan brabli gudbinji. Preisim YAWEI det trubalawan God.