ⵉⵥⴻⵀⵀⵉⴷⴻⵏ 94

1 ⴰ ⴰⵔⴻⴱⴱⵉ ⵏ ⵓⵏⵜⴰⵇⴻⵎ, ⴰ ⵙⵉⴷⵉ, ⴰⵔⴻⴱⴱⵉ ⵏ ⵓⵏⵜⴰⵇⴻⵎ, ⴱⴰⵏ-ⴷⴷ ⴷⵉ ⵜⵉⵙⵙⵉⵇⵜ! 2 ⴰ, ⵍⵇⴰⴹⵉ ⵏ ⵜⴻⵎⵎⵓⵔⵜ, ⵙⴳⴻⵄⵄⴻⴷ ⵉⵅⴻⴼ ⵏⵏⴻⵛ, ⴰⵔⵔ ⵜⴰⵙⵖⴰⵔⵜ ⵉ ⵉⵎⵄⴻⴼⴼⴰⵔⴻⵏ ⴰⵎ ⵎⵉⵏ ⵙⵙⴷⴰⵃⴻⴵⴻⵏ ⵏⵉⵜⵏⵉ. 3 ⵎⴻⵛⵃⴰⵍ ⵉ ⵖⴰ ⴽⴽⴻⵏ ⵄⴰⴷ ⵉⵄⴻⴼⴼⴰⵏⴻⵏ, ⴰ ⵙⵉⴷⵉ, ⵎⴻⵛⵃⴰⵍ ⵉ ⵖⴰ ⴽⴽⴻⵏ ⵏⴻⴳⴳⵣⴻⵏ ⵉⵄⴻⴼⴼⴰⵏⴻⵏ ⵙ ⵍⴻⴼⵔⴰⵃⴻⵜ, 4 ⴰⴷ ⵇⵇⵉⵎⴻⵏ ⵙⵙⴰⵡⴰⵍⴻⵏ ⴰⵡⴰⵍⴻⵏ ⵉⵇⴻⵙⵃⴻⵏ, ⵎⴻⵛⵃⴰⵍ ⵉ ⵖⴰ ⵇⵇⵉⵎⴻⵏ ⵎⴰⵔⵔⴰ ⵉⵏⵏⵉ ⵉⵜⵜⴻⴳⴳⴻⵏ ⵍⵎⵓⵄⵚⵉⵢⵢⴻⵜ ⴰⴷ ⵙⵙⴻⵎⵖⴰⵔⴻⵏ ⵉⵅⴻⴼ ⵏⵙⴻⵏ? 5 ⴰ ⵙⵉⴷⵉ, ⵏⵉⵜⵏⵉ ⵍⴻⴱⴱⵣⴻⵏ ⵍⴳⴻⵏⵙ ⵏⵏⴻⵛ, ⵃⴻⵚⵚⴰⵔⴻⵏ ⵜⴰⵙⵖⴰⵔⵜ ⵏ ⵍⵡⴰⵔⵜ ⵏⵏⴻⵛ. 6 ⵏⵉⵜⵏⵉ ⵏⴻⵇⵇⴻⵏ ⵜⴰⵊⵊⴰⵍⵜ ⴷ ⵓⴱⴰⵔⵔⴰⵏⵉ, ⵖⴰⵔⵔⵚⴻⵏ ⵉ ⵉⵢⵓⵊⵉⵍⴻⵏ. 7 ⵏⵉⵜⵏⵉ ⵇⵇⴰⵔⴻⵏ: “ⵙⵉⴷⵉ ⵡⴰⵔ ⵜⵜ ⵉⵜⵜⵡⵉⵍⵉ, ⴰⵔⴻⴱⴱⵉ ⵏ ⵢⴰⵄⵇⵓⴱ ⵡⴰⵔ ⴷ ⴰⵙ ⵉⵜⵜⵃⴻⴽⴽⴰⵔ." 8 ⴼⴻⵜⵏⴻⵎ ⴽⴻⵏⵏⵉⵡ ⵉⵇⴻⴼⴼⵓⵃⴻⵏ ⴷⵉ ⵍⴳⴻⵏⵙ, ⵊⵎⵉⵄ ⴰⴽ-ⴷ ⵉⴱⵓⵀⴰⵍⵉⵢⵢⴻⵏ, ⵎⴻⵍⵎⵉ ⵉ ⵖⴰ ⵜⴷⴻⵡⵍⴻⵎ ⵜⴼⴻⵀⵀⵎⴻⵎ? 9 ⵎⴰ ⵡⴰⵔ ⵉⵜⵜⴻⵙⵍⵉ ⵡⴻⵏⵏⵉ ⵉⵥⵥⵓⵏ ⴰⵎⴻⵣⵣⵓⵖ? ⵎⴰ ⵡⴰⵔ ⵉⵥⴰⵔⵔ ⵡⴻⵏⵏⵉ ⵉⴳⴳⵉⵏ ⵜⵉⵟⵟ? 10 ⵎⴰ ⵡⴰⵔ ⵉⵜⵜⵄⴰⵇⴻⴱ ⵡⴻⵏⵏⵉ ⵉⵜⵜⵡⴻⴱⴱⵅⴻⵏ ⵍⴻⴳⵏⵓⵙ, ⵡⴻⵏⵏⵉ ⵉⵙⵙⴻⵍⵎⴰⴷⴻⵏ ⵜⵓⵙⵙⵏⴰ ⵉ ⴱⵏⴰⴷⴻⵎ? 11 ⵙⵉⴷⵉ ⵢⴰⵔⴻⴳⴳⴻⴱ ⵅ ⵉⵅⴰⵔⵔⵉⵚⴻⵏ ⵏ ⵉⵡⴷⴰⵏ, ⴰⵇⴰ ⴰⵜⴻⵏ ⴰⵎ ⵢⵉⵊⵊ ⵏ ⵓⵙⵓⴹⵉ ⵡⴰⵀⴰ. 12 ⵙⵙⴻⵄⴷ ⵏ ⵡⴻⵔⵢⴰⵣ ⵏⵏⵉ ⵜᵉⵜⵜⵡⴻⴱⴱⵅⴻⴷ, ⴰ ⵙⵉⴷⵉ, ⵡⴻⵏⵏⵉ ⵜⴻⵙⵙⴻⵍⵎⴰⴷⴻⴷ ⵣⵉ ⵛⵛⴰⵔⵉⵄⴰ ⵏⵏⴻⵛ, 13 ⵃⵉⵎⴰ ⴰⴷ ⵜ ⵜⴻⵙⵙⴰⵔⴻⵢⵢⴻⵃⴻⴷ ⵣⴻⴳ ⵡⵓⵙⵙⴰⵏ ⵉⵄⴻⴼⴼⵏⴻⵏ, ⴰⵍ ⵖⴰ ⵃⴼⴰⵔⴻⵏ ⴰⵃⴼⵓⵔ ⵏ ⵜⵓⵔⵚⵓⴹⵉ ⵉ ⵓⵄⴻⴼⴼⴰⵏ. 14 ⵎⴰⵖⴰⵔ ⵙⵉⴷⵉ ⵡⴰⵔ ⵉⵏⴻⵟⵟⴰⵔ ⵍⴳⴻⵏⵙ ⵏⵏⴻⵙ, ⵡⴰⵔ ⵉⵙⴻⵎⵎⴻⵃ ⴷⵉ ⵜⴻⵙⵖⴰⵔⵜ ⵏⵏⴻⵙ. 15 ⵎⴰⵖⴰⵔ ⵍⵃⵓⴽⵎ ⴰⴷ ⴷⴷ-ⵉⴷⵡⴻⵍ ⵖⴰⵔ ⵜⵙⴻⴳⴷⴰ, ⵎⴰⵔⵔⴰ ⵉⵏⵏⵉ ⵖⴰⵔⵙⴻⵏ ⵓⵍ ⵉⵙⴻⴳⴳⵎⴻⵏ ⴰⴷ ⵜⵜ-ⵉ-ⴷⴷ-ⴹⴻⴼⴼⴰⵔⴻⵏ. 16 ⵎⴰⵏ ⵡⴻⵏ ⴽⵉⴷⵉ ⵉ ⵖⴰ ⵉⴱⴻⴷⴷⴻⵏ ⴹⵉⴷⴷ ⵉ ⵉⵄⴻⴼⴼⴰⵏⴻⵏ? ⵎⴰⵏ ⵡⴻⵏ ⵅⴰⴼⵉ ⵉ ⵖⴰ ⵉⵡⵜⴻⵏ ⴹⵉⴷⴷ ⵉ ⵢⵉⵏⵏⵉ ⵉⵜⵜⴻⴳⴳⴻⵏ ⵍⵖⴻⵛⵛ? 17 ⵎⵍⵉ ⵡⴰⵔ ⵉⴵⵉ ⵙⵉⴷⵉ ⴷ ⵜⵡⵉⵣⴰ ⵉⵏⵓ, ⵉⵍⵉ ⵉⵣⴷⴻⵖ ⵍⴻⵄⵎⴰⵔ ⵉⵏⵓ ⵄⵍⴰⵃⴰⵍ ⴷⴻⴳ ⵡⴻⵙⵖⴰⴹ. 18 ⵎⴰⵍⴰ ⵏⵏⵉⵖ: ‘ⴰⴹⴰⵔ ⵉⵏⵓ ⵉⵜⵜⴻⴼⵔⵉⵖ!’, ⵅⴻⵏⵏⵉ ⵜᵉⵟⵟⴻⴼ ⴰⵢⵉ ⵜⵎⴻⵅⵙⵉⵡⵜ ⵏⵏⴻⵛ ⵉⵛⴻⵡⵡⴰⵔⴻⵏ, ⴰ ⵙⵉⴷⵉ! 19 ⵎⴰⵍⴰ ⵎⵎⴰⵔⵏⵉⵏ ⴷⴰⵢⵉ ⵉⵅⴰⵔⵔⵉⵚⴻⵏ ⴰⵍ ⵟⵟⴰⵔⴼ, ⵜⵓⵖⴰ ⵍⴻⵄⵎⴰⵔ ⵉⵏⵓ ⵉⵜⵜⴰⵔⵔ ⵎⴻⵥⵔⵉ ⴷⴻⴳ ⵓⵙⴼⴻⵡⵡⴻⵊ ⵏⵏⴻⵛ. 20 ⵎⴰ ⵜⴻⵅⵙⴻⴷ ⴰⴷ ⴽⵉⴷⴻⴽ ⵉⵙⵙⵎⵓⵏ ⵍⴽⵓⵔⵙⵉ ⵏ ⵓⵀⴻⵍⵍⴻⴽ, ⵡⴻⵏⵏⵉ ⵉⵙⵙⵉⵡⴹⴻⵏ ⵍⴻⵖⴱⴻⵏ ⵅ ⴷⵙⴰⵙ ⵏ ⵜⴻⵡⵚⴻⵢⵢⴻⵜ? 21 ⵏⵉⵜⵏⵉ ⵃⴻⵚⵚⴰⵔⴻⵏ ⵍⴻⵄⵎⴰⵔ ⵏ ⵓⵎⵙⴻⴳⴳⴰⴷ, ⵛⴻⵀⵀⴷⴻⵏ ⵅ ⵉⴷⴰⵎⵎⴻⵏ ⵉⵎⴻⵣⴷⴰⴳⴻⵏ ⵙ ⵍⵖⴰⵔ. 22 ⵙⵉⴷⵉ ⵜⵓⵖⴰ ⴰⵢⵉ ⴷ ⵉⵊⵊ ⵏ ⵍⴱⵓⵔⵊ ⵢⵓⵄⵍⴰⵏ, ⴰⵔⴻⴱⴱⵉ ⵉⵏⵓ ⴷ ⵜⴰⵚⴹⴰⵔⵜ ⵏ ⵜⴰⵔⴻⵡⵍⴰ ⵉⵏⵓ. 23 ⵏⴻⵜⵜⴰ ⴰⴷ ⵅⴰⵙⴻⵏ ⵉⵙⵙⴻⵄⵇⴻⴱ ⵍⵎⵓⵄⵚⵉⵢⵢⴻⵜ ⵏⵙⴻⵏ, ⴰⵎ ⵜⵜⴻⴳⴳⴻⵏ ⵍⵖⴰⵔ ⵏⵙⴻⵏ ⴰⴷ ⵜⴻⵏ ⵉⵜⴻⵃⵃⴰ. ⵙⵉⴷⵉ, ⴰⵔⴻⴱⴱⵉ ⵏⵏⴻⵖ, ⴰⴷ ⵜⴻⵏ ⵉⵜⴻⵃⵃⴰ.