ⵉⵥⴻⵀⵀⵉⴷⴻⵏ 9

1 ⵉ ⵓⵎⴻⵇⵇⵔⴰⵏ ⵏ ⵉⵎⴻⵖⵏⴰⵊⴻⵏ. ⵙ ⵜⴻⵖⵏⵉⵏⵜ ⵏ ‘ⵍⵎⴻⵡⵜ ⵏ ⵎⵎⵉⵙ’. ⴰⵣⴻⵀⵀⴻⴷ ⵏ ⴷⴰⵡⵓⴷ. 2 ⴰⵍⵉⴼ. ⴰⴷ ⵇⴰⴷⵉⵖ ⵙⵉⴷⵉ ⵙ ⵎⴰⵔⵔⴰ ⵓⵍ ⵉⵏⵓ, ⴰⴷ ⴱⴰⵔⵔⵃⴻⵖ ⵎⴰⵔⵔⴰ ⵍⵎⵓⵄⵊⵉⵣⴰⵜ ⵏⵏⴻⵛ. 3 ⴰⴷ ⵣⵣⴰⵢⴻⴽ ⴼⴰⵔⵃⴻⵖ ⴰⴷ ⵣⵣⴰⵢⴻⴽ ⵙⵍⵉⵡⵍⵉⵡⴻⵖ. ⵏⴻⵛⵛ ⴰⴷ ⵣⴻⵀⵀⴷⴻⵖ ⵉ ⵢⵉⵙⴻⵎ ⵏⵏⴻⵛ, ⴰ ⵛⴻⴽ, ⴰⵎⵄⵓⴵⵉ ⵅ ⴽⵓⵍⵛⵉ! 4 ⴱⵉⵜ. ⵓⵎⵉ ⵍⵄⴻⴷⵢⴰⵏ ⵉⵏⵓ ⴷⴻⵡⵍⴻⵏ ⵖⴰⵔ ⴹⴻⴼⴼⴰⵔ, ⵡⴹⴰⵏ ⵓ ⵖⴻⵍⵢⴻⵏ ⵣⵣⴰⵜ ⵉ ⵡⵓⴷⴻⵎ ⵏⵏⴻⵛ. 5 ⵎⴰⵖⴰⵔ ⵛⴻⴽ ⵜⵡⴻⵏⵏⵉⴷ ⴰⵢⵉ ⵜⴰⵙⵖⴰⵔⵜ ⵉⵏⵓ ⵓ ⵜⴱⴻⵍⵍⵄⴻⴷ ⴷⴷⴻⵄⵡⴻⵜ ⵉⵏⵓ, ⵜⴻⵇⵇⵉⵎⴻⴷ ⵅ ⵍⵄⴰⵔⵛ, ⴰ ⵛⴻⴽ, ⴷ ⵍⵇⴰⴹⵉ ⴰⵎⵙⴻⴳⴳⴻⴷ. 6 ⴳⵉⵎⴻⵍ. ⵛⴻⴽ ⵜⵡⴻⴱⴱⵅⴻⴷ ⵍⴻⴳⵏⵓⵙ, ⵜⵀⴻⵍⵍⴽⴻⴷ ⴰⵄⴻⴼⴼⴰⵏ, ⵜⴻⵎⵃⵉⴷ ⵉⵙⴻⵎ ⵏⵙⴻⵏ ⵉ ⵍⴻⴱⴷⴰ ⵇⴰⵄ. 7 ⵀⵉ. ⵍⴻⵄⴷⵓ, ⴰⵇⴰ ⵏⵉⵜⵏⵉ ⵜⵜⵡⴰⵇⴹⴰⵏ, ⴰⵇⴰ ⴰⵜⴻⵏ ⴷ ⵍⵅⵉⵔⴱⴰⵜ ⵉ ⵍⴻⴱⴷⴰ. ⵜⵖⴻⴹⵍⴻⴷ ⵉⵖⵔⵉⵎⴻⵏ ⵏⵙⴻⵏ, ⵍⵉⴷⴰⵔⴻⵜ ⵏⵙⴻⵏ ⵜⴻⴼⵏⴰ. 8 ⵡⴰⵡ. ⵙⵉⴷⵉ ⵉⵜⵜⵖⵉⵎⴰ ⵉ ⵍⴻⴱⴷⴰ, ⴰⵇⴰ ⵉⵙⵙⴱⴻⴷⴷ ⵍⵄⴰⵔⵛ ⵏⵏⴻⵙ ⵉ ⵍⴻⵃⴽⴰⵎ. 9 ⵏⴻⵜⵜⴰ ⴰⴷ ⵉⵛⴰⵔⵔⴻⵄ ⴷⴷⵓⵏⴻⵛⵜ ⵙ ⵜⵙⴻⴳⴷⴰ, ⴰⴷ ⵉⵃⴽⴻⵎ ⵛⵛⵓⵄⵓⴱ ⵙ ⵍⵃⴻⵇⵇ. 10 ⵙⵉⴷⵉ ⴷ ⵍⴱⵓⵔⵊ ⵢⵓⵄⵍⴰⵏ ⵉ ⵡⴻⵏⵏⵉ ⵉⵃⵚⴰⵔⴻⵏ, ⵉⵊⵊ ⵏ ⵍⴱⵓⵔⵊ ⵢⵓⵄⵍⴰⵏ ⴷⵉ ⵍⵡⴻⵇⵜ ⵏ ⵍⴻⵃⵚⴰⵔⴻⵜ. 11 ⵉⵏⵏⵉ ⵉⵙⵙⵏⴻⵏ ⵉⵙⴻⵎ ⵏⵏⴻⵛ, ⴰⴷ ⵅⴰⴽ ⵜⵜⴻⵛⵍⴻⵏ, ⵎⴰⵖⴰⵔ ⵉⵏⵏⵉ ⵅⴰⴽ ⵢⴰⵔⴻⵣⵣⵓⵏ, ⵡⴰⵔ ⴷⴰⵢⵙⴻⵏ ⵜⵙⴻⵎⵎⵃⴻⴷ, ⴰ ⵙⵉⴷⵉ. 12 ⵣⴰⵢⵉⵏ. ⵣⴻⵀⵀⴷⴻⵎ ⵉ ⵙⵉⴷⵉ, ⵡⴻⵏⵏⵉ ⵉⵣⴻⴷⴷⵖⴻⵏ ⴷⵉ ⵚⵉⵀⵢⵓⵏ, ⴱⴰⵔⵔⵃⴻⵎ ⵙ ⵜⵎⴻⴳⴳⴰ ⵏⵏⴻⵙ ⵊⴰⵔ ⵍⴻⴳⵏⵓⵙ. 13 ⵎⵉⵏⵣⵉ ⵏⴻⵜⵜⴰ ⵢⴰⵔⴻⵣⵣⵓ ⵅ ⵓⵙⵉⵣⵣⴻⵍ ⵏ ⵉⴷⴰⵎⵎⴻⵏ, ⵉⵜⵜⵅⴰⵔⵔⴰⵚ ⴷⴰⵢⵙⴻⵏ. ⵡⴰⵔ ⵉⵜⵜⵓ ⵛⴰ ⵉⵖⵓⵢⵢⴰⵏ ⵏ ⵢⵉⵏⵏⵉ ⵉⵜⵜⵡⴰⵃⴻⵚⵚⴰⵔⴻⵏ. 14 ⵅⵉⵜ. ⵃⵉⵏⵏ ⵅⴰⴼⵉ, ⴰ ⵙⵉⴷⵉ, ⵅⵣⴰⵔ ⵖⴰⵔ ⵍⴻⵖⴱⴻⵏ ⵉⵏⵓ ⵉ ⴷⴷ-ⵢⵓⵙⵉⵏ ⵣⴻⴳ ⵉⵏⵏⵉ ⴷ ⴰⵢⵉ ⵉⵛⴰⵔⵔⵀⴻⵏ, ⵛⴻⴽ ⴷ ⵡⴻⵏⵏⵉ ⴷ ⴰⵢⵉ ⵖⴰ ⵉⵙⵙⴳⴻⵄⵄⴷⴻⵏ ⵣⵉ ⵜⴻⵡⵡⵓⵔⴰ ⵏ ⵍⵎⴻⵡⵜ, 15 ⵃⵉⵎⴰ ⴰⴷ ⴱⴰⵔⵔⵃⴻⵖ ⵙ ⵎⴰⵔⵔⴰ ⵛⵛⴰⵏ ⵏⵏⴻⵛ, ⴷⵉ ⵜⴻⵡⵡⵓⵔⴰ ⵏ ⵢⴻⴵⵉⵙ ⵏ ⵚⵉⵀⵢⵓⵏ. ⵏⴻⵛⵛ ⴼⴰⵔⵔⵃⴻⵖ ⵅ ⵓⵙⴻⵏⵊⴻⵎ ⵏⵏⴻⵛ. 16 ⵜⵉⵜ. ⵍⴻⴳⵏⵓⵙ ⵡⴹⴰⵏ ⴷⴻⴳ ⵡⴻⵃⴼⵓⵔ ⵏ ⵜⵓⵔⵚⵓⴹⵉ ⵉ ⴳⴳⵉⵏ ⵏⵉⵜⵏⵉ ⵙ ⵢⵉⵅⴻⴼ ⵏⵙⴻⵏ, ⵉⴹⴰⵔⴻⵏ ⵏⵙⴻⵏ ⵜⵜⵡⴰⵛⴻⴷⴷⴻⵏ ⴷⵉ ⵜⵔⴰⵛⵛⴰ ⵏⵏⵉ ⵙⵙⵏⵓⴼⴼⴰⵔⴻⵏ ⵏⵉⵜⵏⵉ ⵙ ⵢⵉⵅⴻⴼ ⵏⵙⴻⵏ,. 17 ⵙⵉⴷⵉ ⵉⴳⴳⴰ ⵉⵅⴻⴼ ⵏⵏⴻⵙ ⴰⴷ ⵜ ⵙⵙⵏⴻⵏ, ⵏⴻⵜⵜⴰ ⵢⵓⵖⴰ ⵜⴰⵙⵖⴰⵔⵜ. ⴰⵄⴻⴼⴼⴰⵏ ⵉⵏⵏⵓⵖ ⴷⵉ ⵜⵎⴻⴳⴳⴰ ⵏ ⵉⴼⴰⵙⵙⴻⵏ ⵏⵏⴻⵙ. ⴻⵊⵊ ⵉⴼⵉⵍⴰⵏ ⴰⴷ ⴷⴷⴻⵏⴷⵏⴻⵏ. ⵙⵉⵍⴰⵀ. 18 ⵢⵓⴷ. ⵉⵄⴻⴼⴼⴰⵏⴻⵏ ⴰⴷ ⴷⴷ-ⴷⴻⵡⵍⴻⵏ ⵖⴰⵔ ⵍⴰⵅⴰⵔⵜ, ⵎⴰⵔⵔⴰ ⵍⴻⴳⵏⵓⵙ ⵏⵏⵉ ⵉⵜⵜⵓⵏ ⴰⵔⴻⴱⴱⵉ. 19 ⵎⴰⵛⴰ ⴰⵎⴻⵣⵍⵓⴹ ⵡⴰⵔ ⵉⵜⵜⵡⴰⵜⵜⵓ ⵉ ⵍⴻⴱⴷⴰ, ⵡⴰⵔ ⵉⵜⵜⵡⴰⵇⴻⵟⵟⴻⵄ ⵍⴰⵢⴰⵙ ⵏ ⵢⵉⵏⵏⵉ ⵉⵜⵜⵡⴰⵃⵚⴰⵔⴻⵏ ⵉ ⵍⴻⴱⴷⴰ. 20 ⵇⵓⴼ. ⴽⴽⴰⵔ, ⴰ ⵙⵉⴷⵉ, ⵃⵉⵎⴰ ⵡⴰⵔ ⵉⴷⴷⵉⴽⴽⵡⵉⵍ ⴱⵏⴰⴷⴻⵎ ⵉⵊⵀⴻⴷ ⴽⵜⴰⵔ. ⴻⵊⵊ ⵍⴻⴳⵏⵓⵙ ⴰⴷ ⵜⵜⵡⴰⵛⴰⵔⵔⵄⴻⵏ ⵣⵣⴰⵜ ⵉ ⵡⵓⴷⴻⵎ ⵏⵏⴻⵛ. 21 ⵙⵉⴳⴳⵯⴻⴷ ⵉ-ⵜⴻⵏ, ⴰ ⵙⵉⴷⵉ, ⴻⵊⵊ ⵍⴻⴳⵏⵓⵙ ⴰⴷ ⵙⵙⵏⴻⵏ ⴰⵇⴰ ⴰⵜⴻⵏ ⴷ ⵉⵡⴷⴰⵏ! ⵙⵉⵍⴰⵀ.