ⵉⵥⴻⵀⵀⵉⴷⴻⵏ 89

1 ⴰⵅⴻⵎⵎⵉ ⵏ ⵉⵜⴰⵏ, ⴰⵣⵔⴰⵃⵉ. 2 ⴰⴷ ⵖⴻⵏⵏⵊⴻⵖ ⵅ ⵜⵎⴻⴳⴳⴰ ⵏ ⵜⵎⴻⵅⵙⵉⵡⵜ ⵉⵛⴻⵡⵡⴰⵔⴻⵏ ⵏ ⵙⵉⴷⵉ ⵉ ⵍⴻⴱⴷⴰ, ⴰⴷ ⴱⴰⵔⵔⵃⴻⵖ ⵍⴰⵎⴰⵏ ⵏⵏⴻⵛ ⵙ ⵓⵇⴻⵎⵎⵓⵎ ⵉⵏⵓ ⵣⵉ ⵊⵊⵉⵍ ⴰⵍ ⵊⵊⵉⵍ. 3 ⵎⴰⵖⴰⵔ ⵏⵏⵉⵖ: “ⵜⴰⵎⴻⵅⵙⵉⵡⵜ ⵉⵛⴻⵡⵡⴰⵔⴻⵏ ⵜᵉⵜⵜⵡⴰⴱⵏⴰ ⵉ ⵍⴻⴱⴷⴰ, ⴰⵇⴰ ⵜⴹⴻⵎⵏⴻⴷ ⵍⴰⵎⴰⵏ ⵏⵏⴻⵛ ⴷⴻⴳ ⵉⵊⴻⵏⵡⴰⵏ." 4 “ⵏⴻⵛⵛ ⴳⴳⵉⵖ ⵉⵊⵊ ⵏ ⵍⵄⴰⵀⴷ ⴰⴽ-ⴷ ⵡⴻⵏⵏⵉ ⵣⵣⴰⵢⵉ ⵉⵜⵜⵡⴰⴼⴰⵔⵣⴻⵏ, ⵊⵊⵓⴵⴻⵖ ⵉ ⵓⵎⵙⴻⵅⵅⴰⵔ ⵉⵏⵓ ⴷⴰⵡⵓⴷ: 5 ‘ⵏⴻⵛⵛ ⴰⴷ ⴹⴻⵎⵏⴻⵖ ⵣⵣⴰⵔⵉⵄⴻⵜ ⵏⵏⴻⵛ ⵉ ⵍⴻⴱⴷⴰ ⵓ ⴰⴷ ⴱⵏⵉⵖ ⵍⵄⴰⵔⵛ ⵏⵏⴻⵛ ⵣⵉ ⵊⵊⵉⵍ ⴰⵍ ⵊⵊⵉⵍ.’” ⵙⵉⵍⴰⵀ. 6 ⵉⵊⴻⵏⵡⴰⵏ ⵜⵜⵇⴰⴷⴰⵏ ⵛⴻⴽ ⵅ ⵍⵎⵓⵄⵊⵉⵣⴰⵜ ⵏⵏⴻⵛ, ⴰ ⵙⵉⴷⵉ, ⴷⴻⴳ ⵡⴻⴳⵔⴰⵡ ⵏ ⵉⵎⵇⴻⴷⴷⴰⵙⴻⵏ ⵜⵜⵇⴰⴷⴰⵏ ⵛⴻⴽ ⵅ ⵍⴰⵎⴰⵏ ⵏⵏⴻⵛ. 7 ⵎⴰⵖⴰⵔ ⵎⴰⵏ ⵡⴻⵏ ⴷⴻⴳ ⵉⵙⴻⵢⵏⵓⵜⴻⵏ ⵉⵣⴻⵎⵎⴰⵔ ⴰⴷ ⵉⵜⵜⵡⴰⵇⴻⴷⴷ ⴰⴽ-ⴷ ⵙⵉⴷⵉ, ⵎⴰⵏ ⵡⴻⵏ ⵉ ⵉⴵⴰⵏ ⵊⴰⵔ ⵡⴰⵔⵔⴰⵡⴻⵏ ⵏ ⵉⵔⴻⴱⴱⵉⵜⴻⵏ ⵉⵣⴻⵎⵎⴰⵔ ⴰⴷ ⵉⵎⵇⵓⴷⴷⴰ ⴰⴽ-ⴷ ⵙⵉⴷⵉ? 8 ⴰⵔⴻⴱⴱⵉ ⵉⵡⵄⴰⵔ ⴰⵟⵟⴰⵙ ⴷⴻⴳ ⵡⴻⴳⵔⴰⵡ ⵏ ⵉⵎⵇⴻⴷⴷⴰⵙⴻⵏ, ⵎⴰⵔⵔⴰ ⵉⵏⵏⵉ ⴷ ⴰⵙ ⴷⴷ-ⵉⵏⵏⴹⴻⵏ ⵜⵜⴻⴳⴳⵯⴻⴷⴻⵏ ⵣⵣⴰⵢⴻⵙ. 9 ⴰ ⵙⵉⴷⵉ, ⴰⵔⴻⴱⴱⵉ ⵏ ⵍⵄⴻⵙⴽⴰⵔⴰⵜ, ⵎⴰⵏ ⵡⴻⵏ ⵖⴰⵔ ⵉⴵⴰ ⵜⵉⵣⴻⵎⵎⴰⵔ ⴰⵎ ⵛⴻⴽ, ⴰ ⵙⵉⴷⵉ! ⵍⴰⵎⴰⵏ ⵏⵏⴻⵛ ⵉⵜⵜⴻⵏⵏⴻⴹ ⵉ ⵛⴻⴽ. 10 ⵛⴻⴽ ⵜⵃⴻⴽⴽⵎⴻⴷ ⵅ ⵏⵏⴼⴰⵅⴻⵜ ⵏ ⵍⴻⴱⵃⴰⵔ. ⵅⵎⵉ ⴷⴷ-ⵜⵜⵏⴻⴽⴽⴰⵔⴻⵏ ⵍⴻⵎⵡⴰⵊ ⵏⵏⴻⵙ, ⴰⵇⴰ ⵛⴻⴽ ⵜⴰⵔⴻⵙⵙⵉⴷ ⵉ-ⵜⴻⵏ. 11 ⴰⵇⴰ ⵜⵍⴻⴱⵣⴻⴷ ⵔⴰⵀⴰⴱ ⴰⵎ ⵢⵉⵊⵊⴻⵏ ⵡⴻⵏⵏⵉ ⵉⵙⵙⵏⵓⵇⵇⴱⴻⵏ, ⵜⵣⴻⴵⵄⴻⴷ ⵍⵄⴻⴷⵢⴰⵏ ⵏⵏⴻⵛ ⵙ ⵓⵖⵉⵍ ⵏⵏⴻⵛ ⵉⵊⴻⵀⴷⴻⵏ. 12 ⵏⵏⴻⵛ ⴷ ⵉⵊⴻⵏⵡⴰⵏ, ⵏⵏⴻⵛ ⵓⵍⴰ ⴷ ⵜⴰⵎⵎⵓⵔⵜ. ⴷⴷⵓⵏⵉⵜ ⴷ ⵓⵄⴻⵎⵎⴰⵔ ⵏⵏⴻⵙ ⵜⴻⴳⴳⵉⴷ ⴰⵙⴻⵏ ⴷⵙⴰⵙ. 13 ⵛⴻⴽ ⵜⵅⴻⵍⵇⴻⴷ-ⴷⴷ ⵛⵛⴰⵎⴰⵍ ⴷ ⵍⵊⴰⵏⵓⴱ, ⵜⴰⴱⵓⵔ ⴷ ⵀⵉⵔⵎⵓⵏ ⵙⵍⵉⵡⵍⵉⵡⴻⵏ ⵙ ⵢⵉⵙⴻⵎ ⵏⵏⴻⵛ. 14 ⴰⵇⴰ ⵖⴰⵔⴻⴽ ⴰⵖⵉⵍ ⵉ ⴷⵉ ⵜⴻⴳⴳⵉⴷ ⵜⴰⵔⵢⴰⵙⵜ, ⴰⴼⵓⵙ ⵏⵏⴻⵛ ⵉⵊⵀⴻⴷ, ⴰⴼⵓⵙ ⴰⴼⵓⵙⵉ ⵏⵏⴻⵛ ⵉⵜⵜⵡⴰⵙⵙⴳⴻⵄⵄⴰⴷ. 15 ⵜⴰⵙⴻⴳⴷⴰ ⴷ ⵍⵃⴻⵇⵇ ⴰⵇⴰ ⴰⵜⴻⵏ ⴷ ⴷⵙⴰⵙ ⵏ ⵍⵄⴰⵔⵛ ⵏⵏⴻⵛ, ⵜⴰⵎⴻⵅⵙⵉⵡⵜ ⵉⵛⴻⵡⵡⴰⵔⴻⵏ ⴷ ⵍⴰⵎⴰⵏ ⵉⵜⵜⵉⵣⵡⴰⵔⴻⵏ ⵣⵣⴰⵜ ⵉ ⵡⵓⴷⴻⵎ ⵏⵏⴻⵛ. 16 ⵙⵙⴻⵄⴷ ⵏ ⵍⴳⴻⵏⵙ ⵉ ⵉⵙⵙⵏⴻⵏ ⴰⴷ ⵎⴻⵢⵢⵣⴻⵏ ⴰⵙⵓⴹⵉ ⵙ ⵡⴻⵙⵔⵓⴷⴷⴻⵃ ⵏ ⵍⴱⵓⵇ, ⴰ ⵙⵉⴷⵉ, ⵏⵉⵜⵏⵉ ⴰⴷ ⵓⵢⵓⵔⴻⵏ ⴷⵉ ⵜⴼⴰⵡⵜ ⵏ ⵡⵓⴷⴻⵎ ⵏⵏⴻⵛ. 17 ⵏⵉⵜⵏⵉ ⴰⴷ ⴼⴰⵔⵃⴻⵏ ⴰⵙⵙ ⵎⴰⵔⵔⴰ ⵙ ⵢⵉⵙⴻⵎ ⵏⵏⴻⵛ ⵓⵛⴰ ⴰⴷ ⴷⴷ-ⵜⵜⵡⴰⵙⵙⴳⴻⵄⵄⴷⴻⵏ ⵙ ⵜⵙⴻⴳⴷⴰ ⵏⵏⴻⵛ, 18 ⵎⴰⵖⴰⵔ ⵛⴻⴽ ⴷ ⵍⴻⵎⵍⴰⵃⴻⵜ ⵏ ⵊⵊⴻⵀⴷ ⵏⵙⴻⵏ, ⵉⵛⵛ ⵏⵏⴻⵖ ⴰⴷ ⵉⵜⵜⵡⴰⵙⵙⴳⴻⵄⵄⴻⴷ ⵙ ⵍⵅⴰⴹⴰⵔ ⵏⵏⴻⵛ. 19 ⵜⴰⵙⴻⴷⴷⴰⵔⵜ ⵏⵏⴻⵖ ⵏ ⵓⵙⴻⵍⵇⵉ ⵏ ⵙⵉⴷⵉ, ⴰⵊⴻⴵⵉⴷ ⵏⵏⴻⵖ ⴰⵇⴰ-ⵜ ⵏ ⵓⵎⵇⴻⴷⴷⴰⵙ ⵏ ⵉⵙⵔⴰⵉⵍ. 20 ⵉⵛⵜ ⵏ ⵜⵡⴰⵍⴰ ⵜⵓⵖⴰ ⵜⴻⵙⵙⵉⵡⵍⴻⴷ ⴷⵉ ⵍⴻⵡⵃⵉⵢ ⵅ ⵓⵎⵜⵉⵇⵇⵉ ⵏⵏⴻⵛ, ⵜⴻⵏⵏⵉⴷ: “ⵙ ⵓⴼⵓⵙ ⵏ ⵉⵊⵊ ⵏ ⴱⵓ-ⵜⴻⵖⵔⵓⴹⵜ ⴳⴳⵉⵖ ⵜⵡⵉⵣⴰ, ⵉⵊⵊ ⵡⴻⵏⵏⵉ ⵉⵜⵜⵡⴰⴼⴰⵔⵣⴻⵏ ⵣⵉ ⵍⴳⴻⵏⵙ ⵙⵙⴳⴻⵄⵄⴷⴻⵖ-ⵜ. 21 ⵏⴻⵛⵛ ⵓⴼⵉⵖ ⴷⴰⵡⵓⴷ, ⴰⵎⵙⴻⵅⵅⴰⵔ ⵉⵏⵓ, ⴷⴻⵀⵏⴻⵖ ⵜ ⵙ ⵣⵣⴻⵛⵜ ⵉⵇⴻⴷⴷⵙⴻⵏ, 22 ⵎⴰⵃⴻⵏⴷ ⴰⴼⵓⵙ ⵉⵏⵓ ⴰⴷ ⵢⵉⵍⵉ ⵉⵎⵜⴻⵏ ⴰⴽⵉⴷⴻⵙ, ⵡⴰⵀ ⴰⵖⵉⵍ ⵉⵏⵓ ⴰⴷ ⵜ ⵉⵙⵙⴻⵎⵃⴻⴷ. 23 ⵍⴻⵄⴷⵓ ⵡⴰⵔ ⵜ ⵉⵙⵙⴰⴳⴳⵯⴰⴷ, ⵎⵎⵉⵙ ⵏ ⵍⵎⵓⵄⵚⵉⵢⵢⴻⵜ ⵡⴰⵔ ⵜ ⵉⵃⴻⵚⵚⴰⵔ. 24 ⵉⵏⵏⵉ ⵜ ⵉⵃⴻⵚⵚⴰⵔⴻⵏ ⴰⴷ ⵜⴻⵏ ⵍⴻⴱⵣⴻⵖ ⵣⵣⴰⵜ ⵉ ⵡⵓⴷⴻⵎ ⵏⵏⴻⵙ, ⵉⵏⵏⵉ ⵜ ⵉⵛⴰⵔⵔⵀⴻⵏ ⴰⴷ ⵜⴻⵏ ⵡⵜⴻⵖ. 25 ⵍⴰⵎⴰⵏ ⵉⵏⵓ ⴷ ⵜⵎⴻⵅⵙⵉⵡⵜ ⵉⵏⵓ ⵉⵛⴻⵡⵡⴰⵔⴻⵏ, ⴰⵇⴰ ⴰⵜⴻⵏ ⴰⴽⵉⴷⴻⵙ ⵉ ⵖⴰ ⵢⵉⵍⵉⵏ, ⴰⴷ ⵉⵜⵜⵡⴰⵙⵙⴳⴻⵄⵄⴻⴷ ⵢⵉⵛⵛ ⵏⵏⴻⵙ ⵙ ⵢⵉⵙⴻⵎ ⵉⵏⵓ. 26 ⴰⴷ ⵙⵙⴰⵔⵙⴻⵖ ⴰⴼⵓⵙ ⵏⵏⴻⵙ ⵅ ⵍⴻⴱⵃⴰⵔ, ⴰⴼⵓⵙ ⵏⵏⴻⵙ ⴰⴼⵓⵙⵉ ⵅ ⵉⵖⴻⵣⵔⴰⵏ. 27 ⵏⴻⵜⵜⴰ ⴰⴷ ⵅⴰⴼⵉ ⴷⴷ-ⵉⵍⴰⵖⴰ: ‘ⴰⵇⴰ ⵛⴻⴽ ⴷ ⴱⴰⴱⴰ ⵉⵏⵓ, ⴰⵔⴻⴱⴱⵉ ⵉⵏⵓ, ⴷ ⵜⴰⵚⴹⴰⵔⵜ ⵏ ⵓⵙⴻⵏⵊⴻⵎ ⵉⵏⵓ!’ 28 ⵏⴻⵛⵛ ⴰⴷ ⵜ ⴳⴳⴻⵖ ⴷ ⴰⵎⴻⵏⵣⵓ ⵉⵏⵓ, ⴰⵎⵄⵓⴵⵉ ⵅ ⵉⵊⴻⴵⵉⴷⴻⵏ ⵏ ⵜⴻⵎⵎⵓⵔⵜ. 29 ⵉ ⵍⴻⴱⴷⴰ ⴰⴷ ⵃⴹⵉⵖ ⵜⴰⵎⴻⵅⵙⵉⵡⵜ ⵉⵏⵓ ⵉⵛⴻⵡⵡⴰⵔⴻⵏ ⵣⵣⴰⵜⴻⵙ, ⵓ ⵍⵄⴰⵀⴷ ⵉⵏⵓ ⴰⴷ ⵖⴰⵔⴻⵙ ⵉⵇⵇⵉⵎ ⵙ ⵍⵎⴰⵏⴻⵜ. 30 ⴰⴷ ⵥⵥⵓⵖ ⵣⵣⴰⵔⵉⵄⴻⵜ ⵏⵏⴻⵙ ⵉ ⵍⴻⴱⴷⴰ, ⵍⵄⴰⵔⵛ ⵏⵏⴻⵙ ⵎⵉⵏ ⵖⴰ ⴽⴽⴻⵏ ⵓⵙⵙⴰⵏ ⵏ ⵓⵊⴻⵏⵏⴰ ⴵⴰⵏ. 31 ⵎⴰⵍⴰ ⵉⵃⴻⵏⵊⵉⵔⴻⵏ ⵏⵏⴻⵙ ⵃⴻⵢⵢⴷⴻⵏ ⵅ ⵛⵛⴰⵔⵉⵄⴰ ⵉⵏⵓ, ⵡⴰⵔ ⴳⴳⵓⵔⴻⵏ ⴰⴽ-ⴷ ⵍⴼⴰⵔⴰⵢⵉⴹ ⵉⵏⵓ, 32 ⵎⴰⵍⴰ ⵙⵙⴼⴻⵙⴷⴻⵏ ⵜⵉⵡⴻⵚⵚⴰ ⵉⵏⵓ, ⵡⴰⵔ ⵃⴻⵟⵟⵉⵏ ⵍⵓⵎⵓⵔⴰⵜ ⵉⵏⵓ, 33 ⵅⴻⵏⵏⵉ ⴰⴷ ⵅⴻⴵⵚⴻⵖ ⴰⵄⴻⴷⴷⵓ ⵏⵙⴻⵏ ⵙ ⵡⴻⵄⵎⵓⴷ, ⵍⵎⵓⵄⵚⵉⵢⵢⴻⵜ ⵏⵙⴻⵏ ⵙ ⵜⴻⵢⵢⵉⵜⴰ. 34 ⵎⴰⵛⴰ ⵡⴰⵔ ⵅⴰⵙⴻⵏ ⵜⵜⴻⴽⴽⵙⴻⵖ ⵜⴰⵎⴻⵅⵙⵉⵡⵜ ⵉⵏⵓ ⵉⵛⴻⵡⵡⴰⵔⴻⵏ, ⵡⴰⵔ ⵏⴻⴽⴽⴰⵔⴻⵖ ⵍⵎⴰⵏⴻⵜ ⵉⵏⵓ. 35 ⵡⴰⵔ ⵜⵜⵖⴻⵚⵚⴰⴱⴻⵖ ⵍⵄⴰⵀⴷ ⵉⵏⵓ, ⵎⵉⵏ ⴷⴷ-ⵉⴼⴼⵖⴻⵏ ⵣⴻⴳ ⵉⵢⴻⵏⵛⵉⵛⴻⵏ ⵉⵏⵓ, ⵡⴰⵔ ⵜ ⵜⵜⴱⴻⴷⴷⵉⵍⴻⵖ. 36 ⵏⴻⵛⵛ ⵊⵊⵓⴵⴻⵖ ⵉⵛⵜ ⵏ ⵜⵡⴰⵍⴰ ⵖⴰⵔ ⵜⵇⴻⴷⴷⴰⵙⵜ ⵉⵏⵓ: ‘ⵡⴰⵔ ⵙⵙⵅⴰⵔⵔⵉⵇⴻⵖ ⵄⴻⵎⵎⴰⵔⵚ ⵅ ⴷⴰⵡⵓⴷ!’ 37 ⵣⵣⴰⵔⵉⵄⴻⵜ ⵏⵏⴻⵙ ⴰⴷ ⵜⴻⵇⵇⵉⵎ ⵉ ⵍⴻⴱⴷⴰ, ⵓ ⵍⵄⴰⵔⵛ ⵏⵏⴻⵙ ⴰⴷ ⴷⵉⵏ ⵉⴱⴻⴷⴷ ⵣⵣⴰⵜⵉ ⴰⵎ ⵜⴼⵓⵛⵜ. 38 ⵏⴻⵜⵜⴰ ⴰⴷ ⵉⵇⵇⵉⵎ ⵉⴱⴻⴷⴷ ⵉ ⵍⴻⴱⴷⴰ ⴰⵎ ⵜⵣⵉⵔⵉ ⵓ ⴰⵛⴻⵀⵀⴰⴷ ⴷⴻⴳ ⵉⵙⴻⵢⵏⵓⵜⴻⵏ ⴰⵇⴰ-ⵜ ⴷ ⴰⵎⵜⵉⵇⵇⵉ.” ⵙⵉⵍⴰⵀ. 39 ⵎⴰⵛⴰ ⵛⴻⴽ ⵜⵄⴰⵔⵔⵏⴻⴷ ⵜ ⵖⴰⵔ ⵓⵖⴻⵣⴷⵉⵙ, ⵜⴻⵏⴹⴰⵔⴻⴷ ⵜ, ⵛⴻⴽ ⵜⴼⵓⴳⴳⵎⴻⴷ ⵅ ⵓⵎⴻⴷⵀⵓⵏ ⵏⵏⴻⵛ. 40 ⵛⴻⴽ ⵜⴻⵏⴹⴰⵔⴻⴷ ⵍⵄⴰⵀⴷ ⴰⴽ-ⴷ ⵓⵎⵙⴻⵅⵅⴰⵔ ⵏⵏⴻⵛ, ⵜⴼⴻⵙⴷⴻⴷ ⵜⵜⴰⵊ ⵏ ⵡⴻⵄⵣⴰⵍ ⵏⵏⴻⵙ ⵙ ⵓⴱⴻⴵⴰⵄ ⵏ ⵜⴻⵎⵎⵓⵔⵜ. 41 ⵜⵖⴻⴹⵍⴻⴷ ⵎⴰⵔⵔⴰ ⵍⴻⵃⵢⵓⴷ ⵏⵏⴻⵙ, ⵜⵀⴻⴷⵎⴻⴷ ⵜⵉⵏⴻⴷⴷⴰⵎ ⵏⵙⴻⵏ ⵉⴼⴰⵔⵢⴻⵏ. 42 ⵎⴰⵔⵔⴰ ⵉⵏⵏⵉ ⴷⴷ-ⵉⴽⴽⵉⵏ ⴰⴱⵔⵉⴷ ⴽⴻⵛⵛⴹⴻⵏ ⵜ, ⵏⴻⵜⵜⴰ ⵉⴷⵡⴻⵍ ⴷ ⴰⵙⴻⵃⵇⴰⵔ ⵉ ⵊⵊⵉⵔⴰⵏ ⵏⵏⴻⵙ. 43 ⵛⴻⴽ ⵜⴻⵙⵙⴳⴻⵄⵄⴷⴻⴷ ⴰⴼⵓⵙ ⴰⴼⵓⵙⵉ ⵏ ⵢⵉⵏⵏⵉ ⵜ ⵉⵃⴻⵚⵚⴰⵔⴻⵏ, ⵜⴻⵙⵙⴼⴰⵔⵔⵃⴻⴷ ⵎⴰⵔⵔⴰ ⵍⵄⴻⴷⵢⴰⵏ ⵏⵏⴻⵙ. 44 ⵛⴻⴽ ⵜⴻⵙⵙⴻⵏⵇⴻⵍⴱⴻⴷ ⵍⴻⵇⴹⴻⵄ ⵏ ⵙⵙⵉⴼ ⵏⵏⴻⵙ, ⵛⴻⴽ ⵜⴻⵊⵊⵉⴷ ⵜ ⵡⴰⵔ ⵉⵜⵜⵖⵉⵎⵉ ⵉⴱⴻⴷⴷ ⴷⴻⴳ ⵓⵎⴻⵏⵖⵉ. 45 ⵛⴻⴽ ⵜⴻⵙⵙⴱⴻⴷⴷⴻⴷ ⴰⵥⵔⵉ ⵏⵏⴻⵙ, ⵍⴽⵓⵔⵙⵉ ⵏⵏⴻⵙ ⵉⴳⴻⵍⵍⴷⴻⵏ ⵜⴻⵏⴹⴰⵔⴻⴷ ⵜ ⵖⴰⵔ ⵜⴻⵎⵎⵓⵔⵜ. 46 ⵛⴻⴽ ⵜⴻⵙⵙⴻⵎⵥⵉⴷ ⴰⵙ ⵓⵙⵙⴰⵏ ⵏ ⵜⴻⵎⵥⵉ ⵏⵏⴻⵙ, ⵜⴻⴷⵍⵉⴷ ⵜ ⵙ ⵍⴻⴼⴹⵉⵃⴻⵜ. ⵙⵉⵍⴰⵀ. 47 ⴰⵍ ⵎⴻⵍⵎⵉ ⵄⴰⴷ, ⴰ ⵙⵉⴷⵉ, ⴰⴷ ⵜⴻⵙⵙⵏⵓⴼⴼⴰⵔⴻⴷ ⵉⵅⴻⴼ ⵏⵏⴻⵛ ⴱⵍⴰ ⵇⴻⵟⵟⵓ, ⴰⴷ ⵢⴰⵔⵖ ⵡⴻⵙⵄⴰⵔ ⵏⵏⴻⵛ ⴰⵎ ⵜⵎⴻⵙⵙⵉ? 48 ⵄⵇⴻⵍ ⵅ ⵍⵎⵉⵊⴰⵍ ⵏ ⵜⵓⴷⴰⵔⵜ ⵉⵏⵓ! ⵎⴰⵢⴻⵎⵎⵉ ⴷⴷ-ⵜⵅⴻⵍⵇⴻⴷ ⵎⴰⵔⵔⴰ ⴰⵔⵔⴰⵡ ⵏ ⴱⵏⴰⴷⴻⵎ ⴰⵎⴻⵏⵏⵉ ⴱⴰⵟⴻⵍ? 49 ⵎⴰⵏ ⴰⵔⵢⴰⵣ ⵉⵊⴻⵀⴷⴻⵏ ⵡⴰⵔ ⵉⵜⵜⵡⵉⵍⵉ ⵍⵎⴻⵡⵜ, ⵎⴰⵏ ⴰⵔⵢⴰⵣ ⵉ ⵖⴰ ⵉⴼⴻⴽⴽⴻⵏ ⵍⴻⵄⵎⴰⵔ ⵏⵏⴻⵙ ⵣⴻⴳ ⵓⴼⵓⵙ ⵏ ⵍⴰⵅⴰⵔⵜ? ⵙⵉⵍⴰⵀ. 50 ⴰ ⵙⵉⴷⵉ ⵉⵏⵓ, ⵎⴰⵏⵉ ⴵⴰⵏⵜ ⵜⵎⴻⴳⴳⴰ ⵏ ⵜⵎⴻⵅⵙⵉⵡⵜ ⵏⵏⴻⵛ ⵏ ⵣⵉⵛ, ⵜⵉⵏⵏⵉ ⵅ ⵜⵓⵖⴰ ⵜⴻⵊⵊⵓⴵⴻⴷ ⵉ ⴷⴰⵡⵓⴷ ⵙ ⵍⵎⴰⵏⴻⵜ ⵏⵏⴻⵛ? 51 ⴰ ⵙⵉⴷⵉ ⵉⵏⵓ, ⵄⵇⴻⵍ ⵅ ⵓⵙⴻⵃⵇⴰⵔ ⵏ ⵉⵎⵙⴻⵅⵅⴰⵔⴻⵏ ⵏⵏⴻⵛ, ⵏⵏⵉ ⴰⵔⴻⴱⴱⵓⵖ ⴷⴻⴳ ⵡⴻⵃⵙⵉⵏ ⵉⵏⵓ ⵣⴻⴳ ⵓⴱⴰⵔⵔⵓ ⵏ ⵎⴰⵔⵔⴰ ⵍⴻⴳⵏⵓⵙ, 52 ⵉ ⵣⵉ ⴷ ⴰⵢⵉ ⵙⵙⴻⵃⵇⴰⵔⴰⵏ ⵍⵄⴻⴷⵢⴰⵏ ⵏⵏⴻⵛ, ⴰ ⵙⵉⴷⵉ, ⵉ ⵣⵉ ⵙⵙⴻⵃⵇⴰⵔⴰⵏ ⵉⵚⵓⵔⴰⴼ ⵏ ⵓⵎⴻⴷⵀⵓⵏ ⵏⵏⴻⵛ. 53 ⴰⴷ ⵉⵜⵜⵡⴰⴱⴰⵔⴻⴽ ⵙⵉⴷⵉ ⵉ ⵍⴻⴱⴷⴰ ⵇⴰⵄ! ⴰⵎⵉⵏ, ⵡⴰⵀ, ⴰⵎⵉⵏ!