ⵉⵥⴻⵀⵀⵉⴷⴻⵏ 18

1 ⵉ ⵓⵎⴻⵇⵇⵔⴰⵏ ⵏ ⵉⵎⴻⵖⵏⴰⵊⴻⵏ. ⵏ ⵓⵎⵙⴻⵅⵅⴰⵔ ⵏ ⵙⵉⴷⵉ. ⵏ ⴷⴰⵡⵓⴷ, ⵡⴻⵏⵏⵉ ⵉⵙⵙⵉⵡⵍⴻⵏ ⴰⵡⴰⵍⴻⵏ ⵏ ⵢⴻⵣⵍⵉ-ⵢⴰ ⵉ ⵙⵉⴷⵉ, ⴷⴻⴳ ⵡⴰⵙⵙ ⵓⵎⵉ ⵜ ⵉⴼⴻⴽⴽ ⵙⵉⴷⵉ ⵣⴻⴳ ⵓⴼⵓⵙ ⵏ ⵎⴰⵔⵔⴰ ⵍⵄⴻⴷⵢⴰⵏ ⵏⵏⴻⵙ ⵓ ⵣⴻⴳ ⵓⴼⵓⵙ ⵏ ⵛⴰⵡⵓⵍ. 2 ⵏⴻⵜⵜⴰ ⵉⵏⵏⴰ: “ⵏⴻⵛⵛ ⵜⵜⴻⵅⵙⴻⵖ ⵛⴻⴽ, ⴰ ⵙⵉⴷⵉ, ⵊⵊⴻⵀⴷ ⵉⵏⵓ ⴷ ⵛⴻⴽ. 3 ⵙⵉⴷⵉ ⴷ ⵜⴰⵙⴹⴰⵔⵜ ⵉⵏⵓ ⴷ ⵍⴱⵓⵔⵊ ⵉⵏⵓ ⴷ ⴰⵎⴼⴻⴽⴽⵉ ⵉⵏⵓ, ⴰⵔⴻⴱⴱⵉ ⵉⵏⵓ, ⵜⴰⵚⴹⴰⵔⵜ ⵉⵏⵓ, ⵏⴻⵛⵛ ⵖⴰⵔⴻⵙ ⴰⵔⴻⴽⴽⵡⴰⵍⴻⵖ. ⵛⴻⴽ ⴷ ⵜⴰⵙⴻⴷⴷⴰⵔⵜ ⵉⵏⵓ ⵏ ⵓⵙⴻⵍⵇⵉ ⴷ ⵢⵉⵛⵛ ⵏ ⵓⵙⴻⵏⵊⴻⵎ ⵉⵏⵓ, ⵍⴱⵓⵔⵊ ⵉⵏⵓ ⵢⵓⵄⵍⴰⵏ. 4 ⵏⴻⵛⵛ ⵍⴰⵖⵉⵖ-ⴷⴷ ⵅ ⵙⵉⴷⵉ, ⵡⴻⵏⵏⵉ ⵉⵙⴷⴰⵀⴻⴵⴻⵏ ⴰⵙⴻⵎⵖⴰⵔ, ⵓ ⵏⴻⵛⵛ ⴰⵇⴰ ⵜⵜⵡⴰⵙⵙⵏⴻⵊⵎⴻⵖ ⵣⵉ ⵍⵄⴻⴷⵢⴰⵏ ⵉⵏⵓ. 5 ⵉⵙⴻⵖⵡⴰⵏ ⵏ ⵍⵎⴻⵡⵜ ⵏⵏⴹⴻⵏ ⴰⵢⵉ-ⴷⴷ, ⵙⵙⵉⴳⴳⵯⴻⴷⴻⵏⵜ ⴰⵢⵉ ⵍⵃⴻⵎⵍⴰⵜ ⵏ ⵡⴰⵎⴰⵏ ⵉⵀⴰⵊⴻⵏ. 6 ⵉⵙⴻⵖⵡⴰⵏ ⵏ ⵍⴰⵅⴰⵔⵜ ⵛⴰⵔⴼⴻⵏ ⴰⵢⵉ, ⵜⵉⵅⴻⵛⴼⵉⵏ ⵏ ⵍⵎⴻⵡⵜ ⵃⵚⴰⵔⴻⵏⵜ ⴰⵢⵉ. 7 ⴷⵉ ⵍⴻⵃⵚⴰⵔⴻⵜ ⵉⵏⵓ ⵍⴰⵖⵉⵖ-ⴷⴷ ⵅ ⵙⵉⴷⵉ, ⵅ ⴰⵔⴻⴱⴱⵉ ⵉⵏⵓ ⵉ ⵅ ⴷⴷ-ⵍⴰⵖⵉⵖ. ⵣⵉ ⵣⵣⴰⵡⴻⵛⵜ ⵏⵏⴻⵙ ⵜⴰⵎⴻⵇⵇⵔⴰⵏⵜ ⵉⵙⵍⴰ ⵏⴻⵜⵜⴰ ⵉ ⵜⵎⵉⵊⵊⴰ ⵉⵏⵓ, ⵉⵖⵓⵢⵢⴰⵏ ⵉⵏⵓ ⵓⴷⴼⴻⵏ ⵖⴰⵔ ⵉⵎⴻⵣⵣⵓⵖⴻⵏ ⵏⵏⴻⵙ. 8 ⵅⴻⵏⵏⵉ ⵜⴻⵏⵀⴻⵣⵣ ⵓ ⵜⴰⵔⵊⵉⵊ ⵜⴻⵎⵎⵓⵔⵜ, ⴷⵙⵓⵙⴰ ⵏ ⵉⴷⵓⵔⴰⵔ ⵜⵜⵔⴰⵃⴻⵏ-ⴷⴷ ⵜⵜⴰⵙⴻⵏ-ⴷⴷ ⵓ ⵏⵀⴻⵣⵣⴻⵏ, ⵎⴰⵖⴰⵔ ⵉⵜⵜⵡⴰⵙⵙⴰⵔⵖ ⵡⴻⵖⴹⴰⴱ ⵏⵏⴻⵙ. 9 ⵉⴳⴻⵄⵄⴻⴷ ⴷⴷⴻⵅⵅⴰⵏ ⵣⴻⴳ ⵡⴻⵏⵣⴰⵔⴻⵏ ⵏⵏⴻⵙ, ⵜⵉⵎⴻⵙⵙⵉ ⵣⴻⴳ ⵓⵇⴻⵎⵎⵓⵎ ⵏⵏⴻⵙ ⵜⵚⴰⵔⴹ, ⵉⵜⵜⵡⴰⵙⵙⴰⵔⵖ ⵣⵣⴰⵢⴻⵙ ⵍⴻⴼⵃⴻⵎ. 10 ⵏⴻⵜⵜⴰ ⵉⵊⵊⴰ ⴰⵊⴻⵏⵏⴰ ⴰⴷ ⵢⴰⴹⴰⵔ ⵓⵛⴰ ⵅⴻⵏⵏⵉ ⵉⵀⵡⴰ-ⴷⴷ ⵏⴻⵜⵜⴰ, ⴰⵇⴰ ⴷⵉⵏ ⵉⵊⵊ ⵏ ⵓⵙⴻⵢⵏⵓ ⵉⴱⴱⵓⵎⴱⴻⵙ ⵙⴰⴷⵓ ⵉⴹⴰⵔⴻⵏ ⵏⵏⴻⵙ. 11 ⵉⵏⴷⴻⵀ ⵅ ⵉⵊⵊ ⵏ ⵓⴽⵉⵔⵓⴱ, ⵡⴰⵀ, ⵉⴹⵡⴰ, ⵏⴻⵜⵜⴰ ⵉⵃⴻⵡⵡⴻⵎ ⵅ ⵡⴰⴼⵔⵉⵡⴻⵏ ⵏ ⵓⵙⴻⵎⵎⵉⴹ. 12 ⵏⴻⵜⵜⴰ ⵉⴳⴳⴰ ⵜⴰⴵⴻⵙⵜ ⴰⵎ ⵢⵉⵊⵊ ⵏ ⵓⵙⴻⵍⵇⵉ ⵅ ⵢⵉⵅⴻⴼ ⵏⵏⴻⵙ, ⴰⵄⵉⵛⵛⵓ ⵏⵏⴻⵙ ⴰⵇⴰ-ⵜ ⴷⴻⴳ ⵡⴻⵏⵏⴻⴹ ⵏⵏⴻⵙ, ⴰⵎⴰⵏ ⵉⴱⴱⵓⴱⴱⵙⴻⵏ, ⵉⵙⴻⵢⵏⵓⵜⴻⵏ ⵉⴱⴱⴰⵔⴻⵛⵏⴻⵏ. 13 ⵣⵉ ⵜⵉⵙⵙⵉⵇⵜ ⵇⵉⴱⴰⵍⵜ ⵏⵏⴻⵙ ⵜⵜⴻⴽⴽⴻⵏ ⵉⵙⴻⵢⵏⵓⵜⴻⵏ ⵏⵏⴻⵙ, ⴰⴽ-ⴷ ⵜⴻⴱⵔⵓⵔⵉ ⴷ ⵍⴻⴼⵃⴻⵎ ⵉⵜⵜⴻⵃⴷⵓⴷⵓⵇⴻⵏ. 14 ⵙⵉⴷⵉ ⵉⴳⴳⴰ ⴰⵊⵊⴰⵊ ⴰⴷ ⵉⴷⴷⵓⵇⵇⴻⵣ ⴷⴻⴳ ⵉⵊⴻⵏⵡⴰⵏ, ⴰⵎⵄⵓⴵⵉ ⵅ ⴽⵓⵍⵛⵉ ⵉⴳⴳⴰ ⵜⵎⵉⵊⵊⴰ ⵏⵏⴻⵙ ⵜⵜⵏⴻⴼⵔⴰⵔⴰ: ⵜⴰⴱⵔⵓⵔⵉ ⴷ ⵍⴻⴼⵃⴻⵎ ⵉⵜⵜⴻⵃⴷⵓⴷⵓⵇⴻⵏ. 15 ⵏⴻⵜⵜⴰ ⵉⵙⵙⴻⴽⴽ ⴼⵍⵉⵜⵛⴰⵜ ⵏ ⵍⵇⴻⵡⵙ ⵏⵏⴻⵙ ⵓⵛⴰ ⵉⴱⴻⵣⵣⴻⵄ ⵉ-ⵜⴻⵏ, ⵉⵣⵣⴰⵔⵢⴻⴹ ⴰⵙⵙⴰⵎⴻⵏ ⵓⵛⴰ ⵉⵙⵙⵉⴳⴳⵯⴻⴷ ⵉ-ⵜⴻⵏ. 16 ⵜⵉⵙⵉⵡⵉⵏ ⵏ ⵉⵖⴻⵣⵔⴰⵏ ⴷⴻⵡⵍⴻⵏⵜ ⵜⵜⴱⴰⵏⴻⵏⵜ, ⴷⵙⵓⵙⴰ ⵏ ⴷⴷⵓⵏⴻⵛⵜ ⴷⴻⵡⵍⴻⵏ ⵄⴰⵔⵔⴰⵏ ⵣⴻⴳ ⵓⵡⴻⴷⴷⴻⴱ ⵏⵏⴻⵛ, ⴰ ⵙⵉⴷⵉ, ⵣⴻⴳ ⵓⵙⵓⴹⵉ ⵏ ⵍⴻⵄⵡⵉⵏ ⵣⴻⴳ ⵡⴻⵏⵣⴰⵔⴻⵏ ⵏⵏⴻⵛ. 17 ⵣⵉ ⵙⴻⵏⵏⴻⵊ ⵉⵙⵙⵡⵉⵥⵥⴻⴹ-ⴷⴷ ⴰⴼⵓⵙ ⵏⵏⴻⵙ, ⵢⵉⵡⵉ ⴰⵢⵉ, ⵉⵊⴱⴻⴷ ⴰⵢⵉ-ⴷⴷ ⵣⴻⴳ ⵡⴰⵎⴰⵏ ⵎⵖⴰⵔⴻⵏ. 18 ⵏⴻⵜⵜⴰ ⵉⴼⴻⴽⴽ ⴰⵢⵉ-ⴷⴷ ⵣⵉ ⵍⴻⵄⴷⵓ ⵉⵏⵓ ⵉⵊⴻⵀⴷⴻⵏ, ⵣⴻⴳ ⵉⵏⵏⵉ ⴷ ⴰⵢⵉ ⵉⵛⴰⵔⵔⵀⴻⵏ, ⵎⵉⵏⵣⵉ ⵏⵉⵜⵏⵉ ⵜⵓⵖⴰ ⵊⴻⵀⵀⴷⴻⵏ ⵅⴰⴼⵉ. 19 ⵏⵉⵜⵏⵉ ⵃⵚⴰⵔⴻⵏ ⴰⵢⵉ ⴷⴻⴳ ⵡⴰⵙⵙ ⵏ ⴰⵔⵥⵉⵢⵢⴻⵜ ⵉⵏⵓ, ⵎⴰⵛⴰ ⵙⵉⴷⵉ ⵜⵓⵖⴰ ⴷ ⴰⵎⵄⴻⵎⵎⴻⴷ ⵉⵏⵓ. 20 ⵏⴻⵜⵜⴰ ⵉⵏⴷⴻⵀ ⴰⵢⵉ ⵖⴰⵔ ⵜⵜⴰⵙⵉⵄ ⵓⵛⴰ ⵉⵙⵙⴻⵏⵊⴻⵎ ⴰⵢⵉ, ⵎⴰⵖⴰⵔ ⵏⴻⵜⵜⴰ ⵜⵓⵖⴰ ⵉⵙⵙⵄⵉⵣⵣⴰ ⴰⵢⵉ. 21 ⵙⵉⴷⵉ ⵉⵅⵍⴻⴼ ⴰⵢⵉ ⵄⵍⴰⵃⵙⴰⴱ ⵜⴰⵙⴻⴳⴷⴰ ⵉⵏⵓ, ⵄⵍⴰⵃⵙⴰⴱ ⵜⴰⵣⴷⵓⴳⵉ ⵏ ⵉⴼⴰⵙⵙⴻⵏ ⵉⵏⵓ ⵉⵅⴻⴵⴻⵚ ⴰⵢⵉ. 22 ⵎⴰⵖⴰⵔ ⵏⴻⵛⵛ ⵃⴹⵉⵖ ⵉⴱⵔⵉⴷⴻⵏ ⵏ ⵙⵉⴷⵉ, ⵡⴰⵔ ⵃⴻⵢⵢⴷⴻⵖ ⵛⴰ ⵅ ⴰⵔⴻⴱⴱⵉ ⵉⵏⵓ ⵙ ⵓⵅⴻⵢⵢⴻⴱ. 23 ⵎⴰⵖⴰⵔ ⵎⴰⵔⵔⴰ ⵍⴼⴰⵔⴰⵢⵉⴹ ⵏⵏⴻⵙ ⵜⵓⵖⴰ ⵊⴰⵔ ⵜⵉⵟⵟⴰⵡⵉⵏ ⵉⵏⵓ, ⵡⴰⵔ ⵃⴻⵢⵢⵉⴷⴻⵖ ⵛⴰ ⵅ ⵜⵡⴻⵚⵚⴰ ⵏⵏⴻⵙ. 24 ⴰⵇⴰ-ⵢⵉ ⴽⴻⵎⵎⵍⴻⵖ ⵏⵉⵛⴰⵏ ⴰⴽⵉⴷⴻⵙ, ⵃⴹⵉⵖ ⵉⵅⴻⴼ ⵉⵏⵓ ⵣⵉ ⵍⵎⵓⵄⵚⵉⵢⵢⴻⵜ ⵉⵏⵓ. 25 ⵙⵉⴷⵉ ⵉⵅⵍⴻⴼ ⴰⵢⵉ ⴰⵏⴻⵛⵜ ⵏ ⵜⵙⴻⴳⴷⴰ ⵉⵏⵓ, ⴰⵏⴻⵛⵜ ⵏ ⵜⴰⵣⴷⵓⴳⵉ ⵏ ⵉⴼⴰⵙⵙⴻⵏ ⵉⵏⵓ ⵣⵣⴰⵜ ⵉ ⵜⵉⵟⵟⴰⵡⵉⵏ ⵏⵏⴻⵙ. 26 ⵉ ⵓⵎⴻⴷⴷⵓⴽⴽⴻⵍ ⴰⵎⵜⵉⵇⵇⵉ ⵉ ⵜⴻⴵⵉⴷ ⵛⴻⴽ ⴷ ⴰⵎⴻⴷⴷⵓⴽⴽⴻⵍ ⴰⵎⵜⵉⵇⵇⵉ, ⵉ ⴱⵓ-ⵜⴻⵖⵔⵓⴹⵜ ⵉⴽⴻⵎⵎⵍⴻⵏ ⵉ ⵜⴻⴵⵉⴷ ⵛⴻⴽ ⵜⴽⴻⵎⵎⵍⴻⴷ. 27 ⵉ ⵡⴻⵏⵏⵉ ⵉⵜⵜⵡⴰⵙⵙⵉⵣⴻⴷⴳⴻⵏ ⴰⵇⴰ ⵛⴻⴽ ⴷ ⴰⵎⴻⵣⴷⴰⴳ, ⴰⴽ-ⴷ ⵡⴻⵏⵏⵉ ⵉⴼⴰⵔⵖⴻⵏ, ⴰⵇⴰ ⵜᵉⵜⵜⵎⵓⵖⵣⵍⴻⴷ. 28 ⵛⴻⴽ ⵜⴻⵙⵙⵏⴻⵊⵎⴻⴷ ⵍⴳⴻⵏⵙ ⵉⵜⵜⵡⴰⵃⵚⴰⵔⴻⵏ, ⵎⴰⵛⴰ ⵜⵉⵟⵟⴰⵡⵉⵏ ⵄⴻⴼⴼⴰⵔⴻⵏⵜ ⴰⴷ ⵜⴻⵏⵜ ⵜⴻⵙⵙⴻⵀⵡⵉⴷ. 29 ⵎⵉⵏⵣⵉ ⵛⴻⴽ ⴷ ⵍⴻⴼⵏⴰⵔ ⵉⵏⵓ, ⴰ ⵙⵉⴷⵉ! ⴰⵔⴻⴱⴱⵉ ⵉⵏⵓ ⵉⵜⵜⴻⴳⴳ ⵜⴰⴼⴰⵡⵜ ⴷⵉ ⵜⴰⴵⴻⵙⵜ ⵉⵏⵓ. 30 ⵎⵉⵏⵣⵉ ⴰⴽⵉⴷⴻⴽ ⴰⴷ ⴰⵣⵣⵍⴻⵖ ⵅ ⵉⵛⵜ ⵏ ⴱⴰⵏⴷⵉⵢⵢⴰ, ⴰⴽ-ⴷ ⴰⵔⴻⴱⴱⵉ ⵉⵏⵓ ⴰⴷ ⵏⴻⴳⵣⴻⵖ ⵅ ⵉⵊⵊ ⵏ ⵍⵃⵉⴹ. 31 ⴰⴱⵔⵉⴷ ⵏ ⴰⵔⴻⴱⴱⵉ ⵉⴽⵎⴻⵍ, ⵎⵉⵏ ⵉⵇⵇⴰⵔ ⵙⵉⴷⵉ ⵉⵜⵜⵡⴰⵚⴻⴼⴼⴰ ⴷⵉ ⵜⵎⴻⵙⵙⵉ. ⵏⴻⵜⵜⴰ ⴷ ⴰⵙⴻⵍⵇⵉ ⵉ ⵎⴰⵔⵔⴰ ⵉⵏⵏⵉ ⵖⴰⵔⴻⵙ ⵢⴰⵔⴻⴽⴽⵡⴰⵍⴻⵏ. 32 ⵎⴰⵖⴰⵔ ⵎⴰⵏ ⵡⴻⵏ ⵉ ⵉⴵⴰⵏ ⴷ ⴰⵔⴻⴱⴱⵉ, ⵎⵖⵉⵔ ⵙⵉⴷⵉ, ⵓ ⵎⴰⵏ ⵡⴻⵏ ⵉ ⵉⴵⴰⵏ ⴷ ⵜⴰⵚⴹⴰⵔⵜ, ⵎⵖⵉⵔ ⴰⵔⴻⴱⴱⵉ ⵏⵏⴻⵖ? 33 ⴰⵔⴻⴱⴱⵉ ⵡⴻⵏⵏⵉ ⴷ ⴰⵢⵉ ⵉⵜⵜⴱⴻⵢⵙⴻⵏ ⵙ ⵊⵊⵀⴻⴷ, ⵡⴻⵏⵏⵉ ⴷ ⴰⵢⵉ ⵉⵜⵜⵉⵛⴻⵏ ⴰⴱⵔⵉⴷ ⵉⵏⵓ ⵉⴽⵎⴻⵍ. 34 ⵏⴻⵜⵜⴰ ⵉⴳⴳⴰ ⵉⴹⴰⵔⴻⵏ ⵉⵏⵓ ⴰⵎ ⵢⵉⵏⵏⵉ ⵏ ⵜⵓⴷⴰⴷⵉⵏ, ⵏⴻⵜⵜⴰ ⵢⴰⵔⵔⴰ ⴰⵢⵉ ⴰⴷ ⴱⴻⴷⴷⴻⵖ ⵅ ⵍⴻⴳⵄⵓⴷⵉ ⵉⵏⵓ. 35 ⵉⵙⵙⴻⵍⵎⴻⴷ ⵉⴼⴰⵙⵙⴻⵏ ⵉⵏⵓ ⵉ ⵓⵎⴻⵏⵖⵉ, ⵉⵖⴰⴵⴻⵏ ⵉⵏⵓ ⵎⴰⵃⴻⵏⴷ ⴰⴷ ⵎⴻⵃⴹⴻⵏ ⵉⵊⵊ ⵏ ⵍⵇⴻⵡⵙ ⵏ ⵏⵏⵃⴰⵙ. 36 ⵜⴻⵡⵛⵉⴷ ⴰⵢⵉ ⵜⴰⵙⴻⴷⴷⴰⵔⵜ ⵏ ⵓⵙⴻⵍⵇⵉ ⵏ ⵓⵙⴻⵏⵊⴻⵎ ⵏⵏⴻⵛ, ⴰⴼⵓⵙ ⵏⵏⴻⵛ ⴰⴼⵓⵙⵉ ⴷ ⴰⵙⴻⵏⵏⴻⴷ ⵉⵏⵓ, ⴰⵡⴰⴹⴻⵄ ⵏⵏⴻⵛ ⵜⴻⵙⵙⴻⵎⵖⴰⵔⴻⴷ ⴰⵢⵉ. 37 ⴰⵇⴰ ⵜⴻⴳⴳⵉⴷ ⵜⵜⴰⵙⵉⵄ ⵉ ⵉⵚⵓⵔⵉⴼⴻⵏ ⵉⵏⵓ ⵙⴰⴷⵓ ⵉⵏⵓ, ⵜⵉⵛⴻⵄⴱⵉⵏ ⵉⵏⵓ ⵡⴰⵔ ⵎⴻⵢⵢⵍⴻⵏⵜ. 38 ⵏⴻⵛⵛ ⴹⴼⴰⵔⴻⵖ ⵍⵄⴻⴷⵢⴰⵏ ⵉⵏⵓ ⵓ ⵃⴰⵔⵜⴻⵖ ⵅⴰⵙⴻⵏ, ⵡⴰⵔ ⵜⵜⵄⵉⵇⵉⴱⴻⵖ ⴰⵍ ⵜⴻⵏ ⵇⴹⵉⵖ. 39 ⵏⴻⵛⵛ ⴰⵔⴻⴷⴷⴵⴻⵖ ⵜⴻⵏ, ⴰⵍⴰⵎⵉ ⵡⴰⵔ ⵣⴻⵎⵎⴰⵔⴻⵏ ⴰⴷ ⴽⴽⴰⵔⴻⵏ ⵄⴰⵡⴻⴷ. ⵏⵉⵜⵏⵉ ⵡⴹⴰⵏ-ⴷⴷ ⵙⴰⴷⵓ ⵉⴹⴰⵔⴻⵏ ⵉⵏⵓ. 40 ⵛⴻⴽ ⵜⴱⴻⵢⵙⴻⴷ ⴰⵢⵉ ⵙ ⵊⵊⴻⵀⴷ ⵉ ⵓⵎⴻⵏⵖⵉ, ⵜⴰⵔⵔⵉⴷ-ⴷⴷ ⵉⵏⵏⵉ ⵖⴰⵔⵉ ⴷⴷ-ⵉⴽⴽⴰⵔⴻⵏ ⴰⴷ ⴰⴹⴰⵔⴻⵏ ⵙⴰⴷⵓ ⵉⵏⵓ. 41 ⵛⴻⴽ ⵜⴻⵡⵛⵉⴷ ⴰⵢⵉ ⵜⵉⵎⴻⵊⵊⴰⵔⵜ ⵏ ⵍⵄⴻⴷⵢⴰⵏ ⵉⵏⵓ, ⵏ ⵢⵉⵏⵏⵉ ⴷ ⴰⵢⵉ ⵉⵛⴰⵔⵔⵀⴻⵏ, ⵓ ⵏⴻⵛⵛ ⴰⵔⴻⴷⴷⴵⴻⵖ ⵜⴻⵏ. 42 ⵏⵉⵜⵏⵉ ⵍⴰⵖⴰⵏ, ⵎⴰⵛⴰ ⵡⴰⵔ ⴷⵉⵏ ⵜⵓⵖⵉ ⴰⵎⵙⴻⵏⵊⴻⵎ, ⵍⴰⵖⴰⵏ ⵅ ⵙⵉⴷⵉ, ⵎⴰⵛⴰ ⵏⴻⵜⵜⴰ ⵡⴰⵔ ⵅⴰⵙⴻⵏ ⴷⴷ-ⵢⴰⵔⵔⵉ. 43 ⵏⴻⵛⵛ ⵡⴻⴷⴷⴰⵔⴻⵖ ⵜⴻⵏ ⴰⵎ ⵜⵄⴻⵊⵊⴰⵊⵜ ⵣⵣⴰⵜ ⵉ ⵓⵙⴻⵎⵎⵉⴹ, ⴰⵎ ⵓⴱⴻⴵⴰⵄ ⵅ ⵉⴱⵔⵉⴷⴻⵏ ⴼⴰⵔⴹⴻⵖ ⵣⵣⴰⵢⵙⴻⵏ. 44 ⵛⴻⴽ ⵜⴼⴻⴽⴽⴻⴷ ⴰⵢⵉ ⵣⴻⴳ ⵉⵎⵛⵓⴱⴱⵛⴻⵏ ⵏ ⵍⴳⴻⵏⵙ, ⵜⴻⴳⴳⵉⴷ ⴰⵢⵉ ⴷ ⴰⵣⴻⴵⵉⴼ ⵏ ⵍⴻⴳⵏⵓⵙ, ⵉⵊⵊ ⵏ ⵡⴻⵢⴷⵓⴷ ⵡⴰⵔ ⵜ ⵙⵙⵉⵏⴻⵖ, ⴰⴷ ⴰⵢⵉ ⵉⵙⴻⵅⵅⴰⵔ. 45 ⵎⵖⵉⵔ ⵍⴰⵎⵉ ⴷ ⴰⵢⵉ ⵉⵙⵍⴰ ⵓⵎⴻⵣⵣⵓⵖ ⵏⵙⴻⵏ ⵡⴰⵀⴰ, ⵙⵍⵉⵏ-ⴷⴷ ⵖⴰⵔⵉ. ⵉⴱⴰⵔⵔⴰⵏⵉⵢⵢⴻⵏ ⵙⵙⵏⵉⵄⵎⵉⵍⴻⵏ ⵙⵙⵓⴱⵓⴹⴻⵏ ⴰⵢⵉ. 46 ⴼⴻⵛⵍⴻⵏ ⵉⴱⴰⵔⵔⴰⵏⵉⵢⵢⴻⵏ, ⵡⴰⵅⵅⴰ ⵏⵏⴹⴻⵏ ⴰⵙⴻⵏ-ⴷⴷ ⵍⴱⴰⵔⴰⵊⴰⵜ ⵏⵙⴻⵏ. 47 ⵜⵓⴷⴰⵔⵜ ⵉ ⵙⵉⴷⵉ! ⴰⴷ ⵜᵉⵜⵜⵡⴰⴱⴰⵔⴻⴽ ⵜⴻⵚⴹⴰⵔⵜ ⵉⵏⵓ. ⴰⴷ ⵉⵜⵜⵡⴰⵙⵙⴳⴻⵄⵄⴻⴷ ⴰⵔⴻⴱⴱⵉ ⵏ ⵓⵙⴻⵏⵊⴻⵎ ⵉⵏⵓ. 48 ⴰⵔⴻⴱⴱⵉ ⵡⴻⵏⵏⵉ ⵅⴰⴼⵉ ⵉⵜⵜⴻⵏⵜⴰⵇⴰⵎⴻⵏ ⵡⴻⵏⵏⵉ ⴷ ⴰⵢⵉ ⵉⵜⵜⴻⴳⴳⴻⵏ ⵍⴻⴳⵏⵓⵙ ⵙⴰⴷⵓ ⵓⴼⵓⵙ ⵉⵏⵓ, 49 ⵡⴻⵏⵏⵉ ⴷ ⴰⵢⵉ ⵉⵜⵜⴼⴻⴽⴽⴰⵏ ⵣⴻⴳ ⵓⴼⵓⵙ ⵏ ⵍⵄⴻⴷⵢⴰⵏ ⵉⵏⵓ, ⵡⴰⵀ, ⵛⴻⴽ ⵜⴻⵙⵙⴳⴻⵄⵄⴰⴷⴻⴷ ⴰⵢⵉ ⵜⵉⵡⴰ ⵏ ⵢⵉⵏⵏⵉ ⴷ ⴰⵢⵉ ⵉⵜⵜⴹⴰⴷⴷⴰⵏ, ⵛⴻⴽ ⵜⴻⵙⵙⴻⵏⵊⴰⵎⴻⴷ ⴰⵢⵉ ⵣⴻⴳ ⵡⴻⵔⵢⴰⵣ ⵏ ⵍⴻⵅⵛⵓⵏⴻⵜ. 50 ⵅ ⵓⵢⴰ, ⵙⵉⴷⵉ, ⵅⵙⴻⵖ ⴰⴷ ⵛⴻⴽ ⵇⴰⴷⵉⵖ, ⴰⴷ ⵣⴻⵀⵀⴷⴻⵖ ⵉⵙⴻⵎ ⵏⵏⴻⵛ. 51 ⵏⴻⵜⵜⴰ ⵉⴳⴳⴰ ⵉⵙⴻⵏⵊⵉⵎⴻⵏ ⵏ ⵓⵊⴻⴵⵉⴷ ⵏⵏⴻⵙ ⵎⵖⴰⵔⴻⵏ, ⵉⵙⵙⵛⴻⵏ ⵜⴰⵎⴻⵅⵙⵉⵡⵜ ⵏⵏⴻⵙ ⵉⵛⴻⵡⵡⴰⵔⴻⵏ ⵉ ⵓⵎⴻⴷⵀⵓⵏ ⵏⵏⴻⵙ, ⵉ ⴷⴰⵡⵓⴷ ⵓ ⵉ ⵣⵣⴰⵔⵉⵄⴻⵜ ⵏⵏⴻⵙ ⵉ ⵍⴻⴱⴷⴰ.