ⵉⵥⴻⵀⵀⵉⴷⴻⵏ 101
TTI1 ⴰⵣⴻⵀⵀⴻⴷ ⵏ ⴷⴰⵡⵓⴷ. ⵏⴻⵛⵛ ⴰⴷ ⵖⴻⵏⵏⵊⴻⵖ ⵅ ⵜⵎⴻⵅⵙⵉⵡⵜ ⵉⵛⴻⵡⵡⴰⵔⴻⵏ ⴷ ⵍⵃⴻⵇⵇ, ⴰⴷ ⵣⴻⵀⵀⴷⴻⵖ ⵉ ⵛⴻⴽ, ⴰ ⵙⵉⴷⵉ! 2 ⵏⴻⵛⵛ ⴰⴷ ⴳⴳⴻⵖ ⵙ ⵍⴻⵄⵇⴻⵍ ⵄⵍⴰⵃⵙⴰⴱ ⵉⵊⵊ ⵏ ⵡⴻⴱⵔⵉⴷ ⵉⴽⴻⵎⵎⵍⴻⵏ. ⵎⴻⵍⵎⵉ ⵖⴰⵔⵉ ⵉ ⴷⴷ ⵖⴰ ⵜⴰⵙⴻⴷ? ⵏⴻⵛⵛ ⴰⴷ ⵓⵢⵓⵔⴻⵖ ⵙ ⵡⵓⵍ ⵏⵉⵛⴰⵏ ⴷⵉ ⵍⵡⴻⵙⵟ ⵏ ⵜⴰⴷⴷⴰⵔⵜ ⵉⵏⵓ, 3 ⵏⴻⵛⵛ ⵡⴰⵔ ⵏⴻⵟⵟⴰⵔⴻⵖ ⵜⵉⵟⵟⴰⵡⵉⵏ ⵉⵏⵓ ⴷⵉ ⵎⵉⵏ ⵉⴼⴻⴹⵃⴻⵏ. ⵏⴻⵛⵛ ⵛⴰⵔⵔⵀⴻⵖ ⵎⵉⵏ ⵜⵜⴻⴳⴳⴻⵏ ⵉⵏⵏⵉ ⵅⴰⴽ ⵉⵃⴻⵢⵢⴷⴻⵏ ⵎⴰⵏ ⴰⵢⴰ ⵡⴰⵔ ⴷ ⴰⵢⵉ ⵉⵍⴻⵚⵚⴻⵇ. 4 ⵓⵍ ⵉⵜⵜⴻⴼⵔⵉⵖⴻⵏ ⵉⵜⵜⵅⴻⵚⵚⴰ ⴰⴷ ⵅⴰⴼⵉ ⵢⴰⴳⴳⵯⴻⵊ, ⵡⴰⵔ ⵅⵙⴻⵖ ⴰⴷ ⵙⵙⵏⴻⵖ ⵎⵉⵏ ⵡⴰⵔ ⵉⵃⵍⵉⵏ. 5 ⵡⴻⵏⵏⵉ ⵉⵛⴻⵇⵇⴼⴻⵏ ⴷⴻⴳ ⵊⵊⴰⵔ ⵏⵏⴻⵙ ⵙ ⵜⵏⵓⴼⴼⵔⴰ, ⴰⴷ ⵜ ⵜⴻⵃⵃⵉⵖ. ⵡⴻⵏⵏⵉ ⵉⵜⵜⴽⴻⴱⴱⴰⵔⴻⵏ ⵙ ⵜⵉⵟⵟⴰⵡⵉⵏ ⵏⵏⴻⵙ ⴷ ⵡⴻⵏⵏⵉ ⵉⵜⵜⵄⴻⴼⴼⴰⵔⴻⵏ ⵙ ⵡⵓⵍ ⵏⵏⴻⵙ, ⵡⴰⵔ ⵜ ⴽⴻⵙⵙⵉⵖ. 6 ⵜⵉⵟⵟⴰⵡⵉⵏ ⵉⵏⵓ ⴰⵔⴻⵣⵣⵓⵏⵜ ⵅ ⵉⵎⵜⵉⵇⵇⴰⵏ ⴷⵉ ⵜⴻⵎⵎⵓⵔⵜ, ⵃⵉⵎⴰ ⵏⵉⵜⵏⵉ ⴰⴷ ⵖⴰⵔⵉ ⵇⵇⵉⵎⴻⵏ. ⵡⴻⵏⵏⵉ ⵉⴳⴳⵓⵔⴻⵏ ⴷⴻⴳ ⵉⵊⵊ ⵏ ⵡⴻⴱⵔⵉⴷ ⵉⴽⴻⵎⵎⵍⴻⵏ, ⴰⴷ ⴰⵢⵉ ⵉⵙⴻⵅⵅⴰⵔ. 7 ⵡⴻⵏⵏⵉ ⵉⵜⵜⴻⴳⴳⴻⵏ ⵍⵖⴻⵛⵛ, ⵡⴰⵔ ⵉⵜⵜⵖⵉⵎⵉ ⴷⵉ ⵜⴰⴷⴷⴰⵔⵜ ⵉⵏⵓ, ⵓⵍⴰ ⴷ ⴱⵓ-ⵉⵅⴰⵔⵔⵉⵇⴻⵏ ⵡⴰⵔ ⵉⵜⵜⵡⴰⴹⵎⴻⵏ ⵣⵣⴰⵜ ⵉ ⵜⵉⵟⵟⴰⵡⵉⵏ ⵉⵏⵓ. 8 ⴽⵓⵍ ⵚⵚⴱⴻⵃ ⴰⴷ ⵜⴻⵃⵃⵉⵖ ⵎⴰⵔⵔⴰ ⵉⵄⴻⴼⴼⴰⵏⴻⵏ ⵣⵉ ⵜⴻⵎⵎⵓⵔⵜ, ⵃⵉⵎⴰ ⴰⵎⵎⵓ ⵉ ⵖⴰ ⵎⵃⵉⵖ ⵎⴰⵔⵔⴰ ⵉⵏⵏⵉ ⵉⵜⵜⴻⴳⴳⴻⵏ ⵍⵎⵓⵄⵚⵉⵢⵢⴻⵜ ⵣⵉ ⵜⴻⵏⴷⵉⵏⵜ ⵏ ⵙⵉⴷⵉ.