ⴰⵡⴰⵍⴻⵏ ⵉⵡⴻⵥⵏⴻⵏ 6

1 ⵎⵎⵉ ⵉⵏⵓ, ⵎⴰⵍⴰ ⵜⴷⴻⵡⵍⴻⴷ ⴷ ⴰⵎⴰⵔⵀⵓⵏ ⵉ ⵊⵊⴰⵔ ⵏⵏⴻⵛ, ⵜⴻⵡⵛⵉⴷ ⵜⵉⵛⵜⵉ ⵏⵏⴻⵛ ⵏ ⵓⴼⵓⵙ ⵉ ⵢⵉⵊⵊ ⵏ ⵓⴱⴰⵔⵔⴰⵏⵉ, 2 ⵎⴰⵍⴰ ⵜⴷⴻⵡⵍⴻⴷ ⵜⴻⵇⵇⵏⴻⴷ ⵣⴻⴳ ⵡⴰⵡⴰⵍⴻⵏ ⵏ ⵓⵇⴻⵎⵎⵓⵎ ⵏⵏⴻⵛ, ⵜᵉⵜⵜⵡⴰⵃⴻⴱⴱⵙⴻⴷ ⵣⴻⴳ ⵡⴰⵡⴰⵍⴻⵏ ⵏ ⵓⵇⴻⵎⵎⵓⵎ ⵏⵏⴻⵛ, 3 ⵅⴻⵏⵏⵉ ⴻⴳⴳ ⵜⴰ, ⴰ ⵎⵎⵉ, ⵓ ⴼⴻⴽⴽ ⵉⵅⴻⴼ ⵏⵏⴻⵛ, ⵎⴰⵖⴰⵔ ⵜⴷⴻⵡⵍⴻⴷ ⵖⴰⵔ ⵓⴼⵓⵙ ⵏ ⵊⵊⴰⵔ ⵏⵏⴻⵛ: ⵓⵢⵓⵔ, ⴱⴻⵏⴷⴻⵇ ⵅⴰⵙ ⵓ ⵣⴻⵢⵢⴰⵔ ⵅ ⵡⴻⵏⵏⵉ ⵛⴻⴽ ⵢⵓⴷⵙⴻⵏ. 4 ⵡⴰⵔ ⵜⵜⵉⵛ ⵛⴰ ⵉⴹⴻⵚ ⵉ ⵜⵉⵟⵟⴰⵡⵉⵏ ⵏⵏⴻⵛ, ⵓⵍⴰ ⴷ ⴰⵏⵓⴷⴻⵎ ⵉ ⵡⴰⴱⵍⵉⵡⴻⵏ ⵏⵏⴻⵛ. 5 ⴼⴻⴽⴽ ⵉⵅⴻⴼ ⵏⵏⴻⵛ ⵣⴻⴳ ⵓⴼⵓⵙ ⵏⵏⴻⵙ ⴰⵎ ⵜⵖⴻⵢⴹⴻⵜ ⵏ ⵡⴻⵖⵣⴰⵔ, ⴰⵎ ⵢⵉⵊⵊ ⵏ ⵡⴻⵊⴹⵉⴹ ⵣⴻⴳ ⵓⴼⵓⵙ ⵏ ⵓⵏⴻⴳⵎⴰⵔ. 6 ⵓⵢⵓⵔ ⵖⴰⵔ ⵜⴽⴻⴹⴼⴻⵜ, ⵛⴻⴽ, ⴰ ⴰⵎⴻⵄⴳⵓⵣ, ⵅⵣⴰⵔ ⵎⴰⵎⵎⴻⵛ ⵜⵓⵢⵓⵔ ⵏⴻⵜⵜⴰⵜ ⵓ ⴷⵡⴻⵍ ⴷ ⴰⵎⵉⵖⵉⵙ. 7 ⵡⴰⵅⵅⴰ ⵏⴻⵜⵜⴰⵜ ⵡⴰⵔ ⵖⴰⵔⴻⵙ ⴱⵓ ⵓⵎⴳⴻⵡⵡⴻⴷ, ⵏⵉⵖ ⴰⵡⴻⵇⵇⴰⴼ ⵏⵉⵖ ⵍⵃⴰⴽⴻⵎ, 8 ⵄⴰⴷ ⵜⴻⵙⵙⴻⵡⵊⴰⴷ ⴰⵖⵔⵓⵎ ⵏⵏⴻⵙ ⴷⴻⴳ ⵓⵏⴻⴱⴷⵓ, ⵜⴻⵢⵔⵓ ⵎⴰⵛⵛⴰ ⵏⵏⴻⵙ ⴷⵉ ⵍⵡⴻⵇⵜ ⵏ ⵜⵎⴻⵢⵔⴰ. 9 ⴰⵍ ⵎⴻⵍⵎⵉ ⵖⴰ ⵜⴻⵇⵇⵉⵎⴻⴷ ⵜⴻⵣⵣⵍⴻⴷ, ⵛⴻⴽ, ⴰ ⴰⵎⴻⵄⴳⵓⵣ? ⵎⴻⵍⵎⵉ ⵖⴰ ⵜⴻⴽⴽⴰⵔⴻⴷ ⵣⴻⴳ ⵉⴹⴻⵚ ⵏⵏⴻⵛ? 10 ⴰⵔⵏⵉ ⵛⵡⴰⵢⵜ ⵏ ⵢⵉⴹⴻⵚ, ⴰⵔⵏⵉ ⵛⵡⴰⵢⵜ ⵏ ⵓⵡⴰⵔⵔⴻⵛ, ⴰⵔⵏⵉ ⵛⵡⴰⵢⵜ ⵏ ⵓⴱⵓⵣⵣⴻⵍ ⵙ ⵉⴼⴰⵙⵙⴻⵏ ⵉⵎⵓⵏⴻⵏ, 11 ⴰⵇⴰ ⴷⴰ ⴰⴷ ⵅⴰⴽ ⴷⴷ-ⵉⵡⴹⴰ ⵣⵣⴻⵍⴹ ⴰⵎ ⵢⵉⵊⵊ ⵏ ⵓⵅⴻⵡⵡⴰⵏ, ⵍⴻⵖⴱⴻⵏ ⵏⵏⴻⵛ ⴰⵎ ⵢⵉⵊⵊ ⵏ ⵡⴻⵔⵢⴰⵣ ⵉ ⵖⴰⵔ ⵉⴵⴰ ⵍⴻⵙⵏⴰⵃ. 12 ⴱⵏⴰⴷⴻⵎ ⵉ ⵡⴰⵔ ⵉⵙⴻⴽⴽⵡⵉⵏ, ⴰⵔⵢⴰⵣ ⵏ ⵍⵖⴻⵛⵛ, ⵉⴳⴳⵓⵔ ⵙ ⵉⵊⵊ ⵏ ⵓⵇⴻⵎⵎⵓⵎ ⵉⵛⵛⵓⵔⴻⵏ ⵙ ⵎⵉⵏ ⵉⵄⴻⵡⵊⴻⵏ. 13 ⵉⵖⴻⵎⵎⴻⵣ ⵙ ⵜⵉⵟⵟⴰⵡⵉⵏ ⵏⵏⴻⵙ, ⵉⵙⵙⴰⵡⴰⵍ ⵙ ⵉⴹⴰⵔⴻⵏ ⵏⵏⴻⵙ, ⵉⵜⵜⵛⴻⵢⵢⴰⵔ ⵙ ⵉⴹⴻⵡⴹⴰⵏ ⵏⵏⴻⵙ. 14 ⵓⵍ ⵏⵏⴻⵙ ⵉⵛⵛⵓⵔ ⵙ ⵍⴻⵅⴷⴰⵄⴰⵜ, ⵉⵏⴻⴽⴽⵡⴰ ⵍⴻⴱⴷⴰ ⵍⵖⴰⵔ, ⵉⵜⵜⵙⴻⴱⴱⴰⴱ ⵉⵎⴻⵏⵖⵉⵢⵢⴻⵏ. 15 ⵅ ⵓⵢⴰ ⴷⴻⵖⵢⴰ ⴰⴷ ⴷⴷ-ⵢⴰⵙ ⵓⴹⴻⵢⵢⴻⵄ ⵏⵏⴻⵙ, ⴷⴻⴳ ⵉⵛⵜ ⵏ ⵜⴻⵛⵜⵉ ⴰⴷ ⵉⵜⵜⵡⴰⵔⵥ ⴰⵎ ⵡⴰⵔ ⴷⵉⵏ ⵉⵜⵜⵉⵍⵉ ⵓⴳⴻⵏⴼⵓ. 16 ⵙⴻⵜⵜⴰ ⵏ ⵜⵎⴻⵙⵍⴰⵢⵉⵏ-ⴰ ⵉⵛⴰⵔⵔⴻⵀ ⵉ-ⵜⴻⵏⵜ ⵙⵉⴷⵉ, ⵡⴰⵀ ⵙⴻⴱⵄⴰ ⴰⵇⴰ ⴰⵜⴻⵏⵜ ⴷ ⵏⵏⵄⵉ ⵉ ⵍⴻⵄⵎⴰⵔ ⵏⵏⴻⵙ: 17 ⵜⵉⵟⵟⴰⵡⵉⵏ ⵏ ⵏⵏⴼⴰⵅⴻⵜ, ⵉⵊⵊ ⵏ ⵢⵉⵍⴻⵙ ⵉⵙⵙⵅⴰⵔⵔⵉⵇⴻⵏ, ⵓⵍⴰ ⴷ ⵉⴼⴰⵙⵙⴻⵏ ⵉⵙⵙⴰⵣⵣⴰⵍⴻⵏ ⵉⴷⴰⵎⵎⴻⵏ ⵉⵎⴻⵣⴷⴰⴳⴻⵏ, 18 ⵓⵍ ⵉⵏⴻⴽⴽⵡⴰⵏ ⵜⵉⵎⴻⵄⵎⴰⵍⵜ ⵉⵖⴻⵛⵛⴻⵏ, ⵉⴹⴰⵔⴻⵏ ⵏⵏⵉ ⵉⵜⵜⵇⴻⴵⵉⵇⴻⵏ ⵎⴰⵃⴻⵏⴷ ⴰⴷ ⴰⵣⵣⵍⴻⵏ ⵖⴰⵔ ⵎⵉⵏ ⵉⴵⴰⵏ ⴷ ⴰⵄⴻⴼⴼⴰⵏ, 19 ⴰⵛⴻⵀⵀⴰⴷ ⵉⵙⵙⵅⴰⵔⵔⵉⵇⴻⵏ ⵏⵏⵉ ⴷⴷ-ⵉⴷⴻⴵⵇⴻⵏ ⵉ ⵉⵅⴰⵔⵔⵉⵇⴻⵏ, ⵓⵍⴰ ⵡⴻⵏⵏⵉ ⵉⵜⵜⵙⴻⴱⴱⴰⴱⴻⵏ ⵉⵎⴻⵏⵖⵉⵢⵢⴻⵏ ⵊⴰⵔ ⵜⴰⵡⵎⴰⵜ. 20 ⴰ ⵎⵎⵉ, ⵃⴹⴰ ⵜⴰⵡⵚⴻⵢⵢⴻⵜ ⵏ ⴱⴰⴱⴰⵛ, ⵓ ⵡⴰⵔ ⵎⴻⵏⴹⴰⵔ ⵜⴰⵖⵓⵔⵉ ⵏ ⵢⴻⵎⵎⴰⵛ. 21 ⵇⵇⴻⵏ ⵉ-ⵜⴻⵏⵜ ⵍⴻⴱⴷⴰ ⵅ ⵡⵓⵍ ⵏⵏⴻⵛ, ⵛⴻⴷⴷ ⵉ-ⵜⴻⵏⵜ ⵖⴰⵔ ⵢⵉⵔⵉ ⵏⵏⴻⵛ. 22 ⵎⴰⵍⴰ ⵜⴻⴳⴳⵓⵔⴻⴷ, ⴰⵢⴰ ⴰⴷ ⵛⴻⴽ ⵉⴳⴻⵡⵡⴻⴷ, ⵎⴰⵍⴰ ⵜⴻⵣⵣⵔⴻⴷ, ⴰⵢⴰ ⴰⴷ ⵛⴻⴽ ⵉⵃⴹⴰ, ⵎⴰⵍⴰ ⵜⴼⴰⵇⴻⴷ ⴰⵇⴰ ⵎⴰⵏ ⴰⵢⴰ ⴰⴷ ⴽⵉⴷⴻⴽ ⵉⵙⵙⵉⵡⴻⵍ. 23 ⵎⵉⵏⵣⵉ ⵜⴰⵡⵚⴻⵢⵢⴻⵜ ⴷ ⵍⴻⴼⵏⴰⵔ ⴷ ⵜⵖⵓⵔⵉ ⴷ ⵜⴼⴰⵡⵜ, ⵉⵡⴻⴱⴱⴰⵅ ⵏ ⵜⵜⴰⵔⴱⵉⵢⵢⴻⵜ ⴰⵇⴰ ⴰⵜⴻⵏ ⴷ ⴰⴱⵔⵉⴷ ⵏ ⵜⵓⴷⴰⵔⵜ 24 ⵏⵏⵉ ⵛⴻⴽ ⵉ ⵖⴰ ⵉⵃⴹⴰⵏ ⵣⵉ ⵜⴻⵎⵖⴰⵔⵜ ⵜⴰⵄⴻⴼⴼⴰⵏⵜ, ⵣⵉ ⵍⴻⵀⵔⵓⴷ ⵉⵣⴻⵡⵡⵇⴻⵏ ⵏ ⵢⵉⵍⴻⵙ ⵏ ⵜⴻⵎⵖⴰⵔⵜ ⵣⵉ ⴱⴰⵔⵔⴰ. 25 ⵡⴰⵔ ⵄⴻⵛⵛⴻⵇ ⵛⴰ ⴰⵥⵔⵉ ⵏⵏⴻⵙ ⴷⴻⴳ ⵡⵓⵍ ⵏⵏⴻⵛ, ⵃⴹⴰ ⵡⴰⵔ ⵛⴻⴽ ⵜⴻⵃⵚⵉⵔ ⵙ ⵡⴰⴱⵍⵉⵡⴻⵏ ⵏⵏⴻⵙ, 26 ⵎⵉⵏⵣⵉ ⵣⵉ ⵙⵙⵉⴱⴱⴻⵜ ⵏ ⵉⵛⵜ ⵏ ⵜⴻⵎⵖⴰⵔⵜ ⵏ ⴼⴰⵔⵇ-ⵛⵛⵖⴻⵍ, ⴱⵏⴰⴷⴻⵎ ⴰⴷ ⵉⴽⵙⵉ ⵎⵖⵉⵔ ⵉⵛⵜ ⵏ ⵜⵅⴻⴱⴱⴰⵣⵜ ⵏ ⵡⴻⵖⵔⵓⵎ, ⵡⴰⵀ, ⵜⴰⵎⵖⴰⵔⵜ ⵏ ⵉⵊⵊ ⵏ ⵡⴻⵔⵢⴰⵣ ⵏⵏⴻⵖⵏⵉ ⴰⵇⴰ ⵜⴰⵔⴻⵣⵣⵓ ⵍⴻⵄⵎⴰⵔ ⵉⵖⵍⴰⵏ. 27 ⵎⴰ ⵉⵣⴻⵎⵎⴰⵔ ⵃⴻⴷ ⴰⴷ ⵢⴰⵔⴱⵓ ⵜⵉⵎⴻⵙⵙⵉ ⴷⴻⴳ ⵡⴻⵃⵙⵉⵏ ⵏ ⵡⴰⵔⵔⵓⴹ ⵏⵏⴻⵙ, ⴱⵍⴰ ⵎⴰ ⴰⴷ ⵢⴰⵔⵖ ⵡⴰⵔⵔⵓⴹ ⵏⵏⴻⵙ? 28 ⵎⴰ ⵉⵣⴻⵎⵎⴰⵔ ⵃⴻⴷ ⴰⴷ ⵢⵓⵢⵓⵔ ⵅ ⵍⴻⴼⵃⴻⵎ ⵉⵜⵜⴻⵃⴷⵓⴷⵓⵇⴻⵏ, ⴱⵍⴰ ⵎⴰ ⴰⴷ ⵛⴻⵎⴹⴻⵏ ⵉⴹⴰⵔⴻⵏ ⵏⵏⴻⵙ? 29 ⴰⵎⵎⵓ ⵓⵍⴰ ⴷ ⵡⴻⵏⵏⵉ ⵉ ⵖⴰ ⵢⴰⴷⴼⴻⵏ ⵖⴰⵔ ⵜⴻⵎⵖⴰⵔⵜ ⵏ ⵊⵊⴰⵔ ⵏⵏⴻⵙ, ⵡⴰⵀ ⴽⵓⵍ ⵉⵊⵊⴻⵏ ⵡⴻⵏⵏⵉ ⵜⵜ ⵉ ⵖⴰ ⵉⵀⴰⴷⴰⵏ, ⵡⴰⵔ ⵉⵜⵜⵡⵉⵃⵙⵉⴱ ⴷ ⴰⵎⴻⵣⴷⴰⴳ. 30 ⴰⵛⴻⴼⴼⴰⵔ ⵡⴰⵔ ⵜ ⵙⵙⵃⴻⵇⵇⴰⵔⴻⵏ ⵎⴰⵍⴰ ⵢⵓⵛⴰⵔ, ⵃⵉⵎⴰ ⴰⴷ ⵉⵙⵙⵢⵉⵡⴻⵏ ⵍⴻⵄⵎⴰⵔ ⵏⵏⴻⵙ ⵎⴰⵍⴰ ⴷⴰⵢⴻⵙ ⵍⴰⵥ. 31 ⵎⴰⵛⴰ ⵎⴰⵍⴰ ⵉⵜⵜⵡⴰⴼ, ⴰⵎⵎⵓ ⵅⴰⵙ ⵉ ⵖⴰ ⵉⵅⴻⴵⴻⵚ ⵙⴻⴱⵄⴰ ⵏ ⵜⵙⴻⵇⵇⴰⵔ. ⵉⵜⵜⵅⴻⵚⵚⴰ ⴰⵙ ⴰⴷ ⵉⵡⵛ ⵎⴰⵔⵔⴰ ⵎⵉⵏ ⵖⴰⵔⴻⵙ ⴷⵉ ⵜⴰⴷⴷⴰⵔⵜ. 32 ⵎⴰⵛⴰ ⵡⴻⵏⵏⵉ ⵉⵜⵜⴻⴳⴳⴻⵏ ⵣⵣⵉⵏⴰ ⴰⴽ-ⴷ ⵉⵛⵜ ⵏ ⵜⴻⵎⵖⴰⵔⵜ, ⵡⴰⵔ ⵖⴰⵔⴻⵙ ⴱⵓ ⵡⵓⵍ ⵉⵎⵜⴻⵏ. ⵡⴻⵏⵏⵉ ⵉⵜⵜⴻⴳⴳⴻⵏ ⴰⵢⴰ, ⵉⵜⵜⴰⵔⴻⴷⴷⴻⴵ ⵍⴻⵄⵎⴰⵔ ⵏⵏⴻⵙ. 33 ⴷⵔⵓⵛⵜ ⴷ ⵍⴻⴼⴹⵉⵃⴻⵜ ⴰⴷ ⵜⴻⵏ ⵢⴰⴼ, ⵍⴻⵃⵢⴰ ⵏⵏⴻⵙ ⵡⴰⵔ ⵉⵎⴻⵃⵃⵉ ⵛⴰ. 34 ⵎⴰⵖⴰⵔ ⵜⵓⵙⵎⵉ ⵜᵉⵜⵜⴰⵡⵉ-ⴷⴷ ⴰⵙⵄⴰⵔ ⵏ ⵡⴻⵔⵢⴰⵣ, ⵏⴻⵜⵜⴰ ⵡⴰⵔ ⵉⵜⵜⴻⵙⵙⴻⵏ ⴰⵃⵉⵏⵏⵉ ⴷⴻⴳ ⵡⴰⵙⵙ ⵏ ⵡⴻⵏⵜⴰⵇⴻⵎ. 35 ⵡⴰⵔ ⵉⵃⴻⵙⵙⴻⴱ ⴷⴷⴻⵢⵢⴻⵜ ⵉ ⵡⴻⵚⵍⴻⵃ, ⵡⴰⵔ ⵜⵜ ⵉⵇⴻⴱⴱⴻⵍ, ⴰⴷ ⵢⵓⴳⵉ, ⵡⴰⵅⵅⴰ ⵜⴻⵙⵙⴻⵎⵖⴰⵔⵉⴷ ⴷⵉ ⵜⴻⵔⵣⴻⴼⵜ ⵄⴰⴷ ⵙ ⵡⴰⵟⵟⴰⵙ.