ⴰⵡⴰⵍⴻⵏ ⵉⵡⴻⵥⵏⴻⵏ 26

1 ⴰⵎ ⵡⴻⴷⴼⴻⵍ ⴷⴻⴳ ⵓⵏⴻⴱⴷⵓ ⵓ ⴰⵎ ⵡⴻⵏⵥⴰⵔ ⴷⵉ ⵜⵎⴻⵢⵔⴰ, ⴰⵎⵎⵓ ⵡⴰⵔ ⴷⴷ-ⵉⵜⵜⵉⵙ ⵛⵛⴰⵏ ⴰⴽ-ⴷ ⵓⴱⵓⵀⴰⵍⵉ. 2 ⴰⵎ ⵥⵥⴰⵡⴻⵛ ⵉⵜⵜⴼⴰⵔⴼⴰⵔⴻⵏ, ⴰⵎ ⵜⴼⴰⵍⴵⴻⵙⵜ ⵉⵟⵟⴰⵡⴻⵏ ⵙⵙⴰ ⴷ ⵙⵙⴰ, ⴰⵎⵎⵓ ⵉ ⵜⴻⴳⴳⴰ ⵉⵛⵜ ⵏ ⵏⵏⴻⵄⵍⴻⵜ ⴱⵍⴰ ⵙⵙⵉⴱⴱⴻⵜ, ⵏⴻⵜⵜⴰⵜ ⵡⴰⵔ ⵜⵍⴻⵇⵇⴻⴼ. 3 ⴰⵔⴻⴽⴽⵓⴹ ⵉ ⵓⵢⵉⵙ, ⵙⵍⵉⵎⴻⵜ ⵉ ⵡⴻⵖⵢⵓⵍ, ⵓ ⴰⵄⵎⵓⴷ ⵉ ⵡⴻⵄⵔⵓⵔ ⵏ ⵉⴱⵓⵀⴰⵍⵉⵢⵢⴻⵏ. 4 ⵡⴰⵔ ⴷⴷ-ⵜⵜⴰⵔⵔⵉ ⵅ ⵓⴱⵓⵀⴰⵍⵉ ⴰⵏⴻⵛⵜ ⵜⵓⴱⴱⵓⵀⴻⵍⵢⴰ ⵏⵏⴻⵙ, ⵎⴰⵃⴻⵏⴷ ⵓⵍⴰ ⴷ ⵛⴻⴽ ⵡⴰⵔ ⴷⴰⵢⴻⵙ ⵜⴰⵔⴻⴽⴽⵡⴻⵙⴻⴷ. 5 ⴰⵔⵔ-ⴷⴷ ⵅ ⵓⴱⵓⵀⴰⵍⵉ ⵄⵍⴰⵃⵙⴰⴱ ⵜⵓⴱⴱⵓⵀⴻⵍⵢⴰ ⵏⵏⴻⵙ, ⵎⴰⵃⴻⵏⴷ ⵡⴰⵔ ⵉⵜⵜⵖⵉⵍ ⵏⴻⵜⵜⴰ ⴷ ⴰⵎⵉⵖⵉⵙ ⴷⵉ ⵜⵉⵟⵟⴰⵡⵉⵏ ⵏⵏⴻⵙ. 6 ⴰⵎ ⵡⴻⵏⵏⵉ ⵉⵜⵜⵇⴻⵙⵙⴻⵏ ⵉⴹⴰⵔⴻⵏ ⵏ ⵢⵉⵅⴻⴼ ⵏⵏⴻⵙ ⵓ ⴰⵎ ⵡⴻⵏⵏⵉ ⵉⵙⴻⵙⵙⴻⵏ ⵍⵄⵓⵏⴼ, ⴰⵎⵎⵓ ⵉ ⵢⴻⴵⴰ ⵡⴻⵏⵏⵉ ⵉⵙⵙⴻⴽⴽⴰⵏ ⵜⵉⴱⵔⴰⵜⵉⵏ ⵙ ⵓⴼⵓⵙ ⵏ ⵉⵊⵊ ⵏ ⵓⴱⵓⵀⴰⵍⵉ. 7 ⵜⵉⵎⴻⵙⵙⴰⴹⵉⵏ ⵏ ⵓⵏⴻⵄⴹⴰⴱ ⴰⵔⴻⵀⴼⴻⵏⵜ, ⴰⵎⵎⵓ ⵉ ⵢⴻⴵⴰ ⵓⵍⴰ ⴷ ⴰⵡⴰⵍ ⵉⵡⴻⵣⵏⴻⵏ ⴷⴻⴳ ⵓⵇⴻⵎⵎⵓⵎ ⵏ ⵉⴱⵓⵀⴰⵍⵉⵢⵢⴻⵏ. 8 ⴰⵎ ⵡⴻⵏⵏⵉ ⵉⵜⵜⵛⴻⴷⴷⴰⵏ ⴰⵥⵔⵓ ⵉⵖⵍⴰⵏ ⴷⴻⴳ ⵉⴵⵉⵢ, ⴰⵎⵎⵓ ⵉ ⵉⴵⴰ ⵡⴻⵏⵏⵉ ⵉⵜⵜⴻⴳⴳⴻⵏ ⵛⵛⴰⵏ ⵉ ⵓⴱⵓⵀⴰⵍⵉ. 9 ⴰⵎ ⵉⵛⵜ ⵏ ⵜⵉⵡⴻⵏⵜ ⵏ ⵜⵣⴻⴳⴳⵯⴰⵔⵜ ⴷⴷ-ⵉⴳⴳⴻⵄⵄⴷⴻⵏ ⴷⴻⴳ ⵓⴼⵓⵙ ⵏ ⵓⵙⴽⴰⵔⵊⵉ, ⴰⵎⵎⵓ ⵉ ⵉⴵⴰ ⵍⵎⴰⵜⴰⵍ ⴷⴻⴳ ⵓⵇⴻⵎⵎⵓⵎ ⵏ ⵉⴱⵓⵀⴰⵍⵉⵢⵢⴻⵏ. 10 ⴰⵟⵟⴰⵙ ⵉⵣⴻⵎⵎⴰⵔ ⴰⴷ ⴷⴷ-ⵉⵙⵙⵓⴼⴼⴻⵖ ⵎⴰⵔⵔⴰ ⵣⴻⴳ ⵢⵉⵅⴻⴼ ⵏⵏⴻⵙ, ⵎⴰⵛⴰ ⵍⵎⵓⵏⴻⵜ ⵏ ⵓⴱⵓⵀⴰⵍⵉ ⴷ ⵡⴻⵏⵏⵉ ⵜ ⵖⴰ ⵉⵛⵔⴰⵏ, ⴰⴷ ⵅⵙⴰⵔⴻⵏ. 11 ⴰⵎ ⵉⵊⵊ ⵏ ⵡⴻⵇⵣⵉⵏ ⵉⵄⴻⵇⴱⴻⵏ ⵖⴰⵔ ⵎⵉⵏ ⵉⵄⵓⵇⵇ, ⴰⵎⵎⵓ ⵉ ⵉⵜⵜⵄⴰⵡⴰⴷ ⵉⵊⵊ ⵏ ⵓⴱⵓⵀⴰⵍⵉ ⵜⵓⴱⴱⵓⵀⴻⵍⵢⴰ ⵏⵏⴻⵙ. 12 ⵎⴰ ⵜⴻⵥⵔⵉⴹ ⵄⴻⵎⵎⴰⵔⵚ ⵉⵊⵊ ⵏ ⵡⴻⵔⵢⴰⵣ ⵉ ⵉⵜⵜⴻⴳⴳⴻⵏ ⵉⵅⴻⴼ ⵏⵏⴻⵙ ⴷ ⴰⵎⵉⵖⵉⵙ? ⴰⵇⴰ ⴷⵉⵏ ⵍⴰⵢⴰⵙ ⴰⵟⵟⴰⵙ ⵉ ⵢⵉⵊⵊ ⵏ ⵓⴱⵓⵀⴰⵍⵉ ⵓⵍⴰ ⵅⴰⵙ. 13 ⴰⵎⴻⵄⴳⵓⵣ ⵉⵇⵇⴰⵔ: “ⴰⵇⴰ ⴷⵉⵏ ⵉⵊⵊ ⵏ ⵡⴰⵢⵔⴰⴷ ⵉⵣⴻⵀⵀⴰⵔⴻⵏ ⴷⴻⴳ ⵡⴻⴱⵔⵉⴷ, ⵉⵊⵊ ⵏ ⵡⴻⵢⵔⴰⴷ ⵢⵓⵢⵓⵔ ⴷⴻⴳ ⵡⴰⵣⵣⴰⵢⴻⵏ!" 14 ⴰⵎ ⵜⴻⵡⵡⴰⵔⵜ ⵜᵉⵜⵜⵓⵏⵏⵓⴹ ⵉ ⵜⴻⵖⵎⴰⵔⵜ ⵏⵏⴻⵙ, ⴰⵎⵎⵓ ⵉ ⵉⵜⵜⵓⵏⵓⴹ ⵓⵍⴰ ⴷ ⴰⵎⴻⵄⴳⵓⵣ ⴷⵉ ⵇⴰⵎⴰ ⵏⵏⴻⵙ. 15 ⴰⵎⴻⵄⴳⵓⵣ ⵉⵙⵙⵏⵓⴼⴼⴰⵔ ⴰⴼⵓⵙ ⵏⵏⴻⵙ ⴷⵉ ⵟⵟⴻⴱⵚⵉ, ⴰⵇⴰ ⵏⴻⵜⵜⴰ ⵢⴰⵔⵅⵓ ⵎⴰⵃⴻⵏⴷ ⴰⴷ ⵜ ⵉⵙⵙⵉⵡⴻⴹ ⵖⴰⵔ ⵓⵇⴻⵎⵎⵓⵎ ⵏⵏⴻⵙ. 16 ⴰⵎⴻⵄⴳⵓⵣ ⵉⵜⵜⵡⴰⵍⴰ ⵉⵅⴻⴼ ⵏⵏⴻⵙ ⴷ ⴰⵎⵉⵖⵉⵙ, ⵣⵉ ⵙⴻⴱⵄⴰ ⵉⵔⵢⴰⵣⴻⵏ ⵏⵏⵉ ⵉⵣⴻⵎⵎⴰⵔⴻⵏ ⴰⴷ ⴷⴷ-ⴰⵔⵔⴻⵏ ⵙ ⵍⴻⴼⵀⴰⵎⴻⵜ. 17 ⴰⵎ ⵡⴻⵏⵏⵉ ⵉⵜⵜⵛⴻⴱⴱⴰⵔⴻⵏ ⴷⴻⴳ ⵉⵎⴻⵣⵣⵓⵖⴻⵏ ⵏ ⵡⴻⵇⵣⵉⵏ, ⴰⵎⵎⵓ ⵉ ⵢⴻⴵⴰ ⵡⴻⵏⵏⵉ ⵉⵜⵜⴰⴷⴼⴻⵏ ⴷⴻⴳ ⵓⵎⵛⵓⴱⴱⴻⵛ ⵏⵏⵉ ⵡⴰⵔ ⵉⴵⵉ ⵏⵏⴻⵙ. 18 ⴰⵎ ⵉⵊⵊ ⵏ ⵓⵎⴻⵊⵏⵓⵏ ⵏⵏⵉ ⵉⵛⵛⴰⵜⴻⵏ ⵉⵚⴻⴼⴹⴰⵡⴻⵏ ⴷ ⴼⵍⵉⵜⵛⴰⵜ ⴷ ⵙⵙⴻⵎ ⵉⵏⴻⵇⵇⴻⵏ, 19 ⴰⵎⵎⵓ ⵉ ⵉⴵⴰ ⵡⴻⵔⵢⴰⵣ ⵏⵏⵉ ⵉⵛⴻⵎⵜⴻⵏ ⵊⵊⴰⵔ ⵏⵏⴻⵙ, ⵓⵛⴰ ⵉⵇⵇⴰⵔ: “ⴰⵇⴰ ⵜⵜⵇⴻⵙⵙⴰⵔⴻⵖ ⵡⴰⵀⴰ, ⵏⵉⵖ ⵍⵍⴰ!" 20 ⵎⴰⵍⴰ ⵡⴰⵔ ⵉⴵⵉ ⵓⴽⴻⵛⵛⵓⴹ, ⴰⴷ ⵜⴻⵅⵙⵉ ⵜⵎⴻⵙⵙⵉ, ⵓ ⵎⴰⵍⴰ ⵡⴰⵔ ⴷⵉⵏ ⵉⴵⵉ ⵓⵅⴱⴰⵔⵊⵉ, ⵢⴰⵔⴻⵙⵙⴰ ⵓⵎⵛⵓⴱⴱⴻⵛ. 21 ⴰⵎ ⵉⴵⴰ ⵍⴻⴼⵃⴻⵎ ⵉ ⵍⴻⴼⵃⴻⵎ ⵉⵜⵜⴻⵃⴷⵓⴷⵓⵇⴻⵏ ⴷ ⵓⴽⴻⵛⵛⵓⴹ ⵉ ⵜⵎⴻⵙⵙⵉ, ⴰⵎⵎⵓ ⵉ ⵢⴻⴵⴰ ⵉⵊⵊ ⵏ ⵡⴻⵔⵢⴰⵣ ⵉⵜⵜⴻⵎⵛⵓⴱⴱⵓⵛⴻⵏ, ⵎⴰⵃⴻⵏⴷ ⴰⴷ ⴷⴷ-ⵉⵙⵏⴻⴽⴽⴰⵔ ⴰⵎⴻⵏⵖⵉ. 22 ⴰⵡⴰⵍⴻⵏ ⵏ ⵓⵅⴱⴰⵔⵊⵉⵢ ⴰⵎ ⵃⴰⵍⴰⵡⵉⵜ, ⵜⵉⵏⵏⵉ ⵀⴻⴽⴽⵡⴰⵏⵜ ⴷⴻⴳ ⵉⵅⵅⴰⵎⴻⵏ ⵏ ⴷⴰⵅⴻⵍ ⵏ ⵓⵄⴻⴷⴷⵉⵙ. 23 ⴰⵎ ⴽⵓⴼⴼⵓ ⵏ ⵏⵏⵓⵇⴰⵔⵜ ⵅ ⵓⵛⴻⴵⵉⵇ ⵏ ⵜⵍⴰⵅⵜ, ⴰⵎⵎⵓ ⵉ ⴵⴰⵏ ⵉⵢⴻⵏⵛⵉⵛⴻⵏ ⵉⵎⵉⵣⵉⴹⴻⵏ ⵏ ⵢⵉⵊⵊⴻⵏ ⵙ ⵡⵓⵍ ⴷ ⴰⵄⴻⴼⴼⴰⵏ. 24 ⵡⴻⵏⵏⵉ ⴷⵉ ⵉⴵⴰ ⵡⴻⵛⵔⴰⵀ, ⵉⵙⵙⵏⵓⴼⴼⴰⵔⴰ ⵉ-ⵜ ⵙ ⵢⵉⵍⴻⵙ ⵏⵏⴻⵙ ⵎⴰⵛⴰ ⴷⴻⴳ ⵡⵓⵍ ⵏⵏⴻⵙ ⵉⵜⵜⵅⴰⵔⵔⴻⵚ ⴷⵉ ⵍⵖⴻⵛⵛ. 25 ⵎⴰⵍⴰ ⵏⴻⵜⵜⴰ ⵉⵜⵜⵃⴻⵛⵛⴻⵎ ⵙ ⵜⵎⵉⵊⵊⴰ ⵏⵏⴻⵙ, ⵡⴰⵔ ⵜ ⵜⵜⵉⵇⵇⵉ ⵛⴰ, ⵎⴰⵖⴰⵔ ⵙⴻⴱⵄⴰ ⵏ ⵏⵏⵄⴰⵡⴰⵜ ⴰⵇⴰ ⴷⵉⵏ ⴷⴻⴳ ⵡⵓⵍ ⵏⵏⴻⵙ. 26 ⵓⵍⴰ ⵎⴰⵍⴰ ⵉⵍⴻⵃⵃⴻⴼ ⵡⴻⵛⵔⴰⵀ ⵏⵏⴻⵙ ⴷⴻⴳ ⵡⴻⵛⵎⴰⵜ, ⵜⵓⵄⴻⴼⴼⵏⴰ ⵏⵏⴻⵙ ⴰⴷ ⵜᵉⵜⵜⵡⴰⵄⴰⵔⵔⴰ ⴷⴻⴳ ⵡⴻⴳⵔⴰⵡ ⵏ ⵍⴳⴻⵏⵙ. 27 ⵡⴻⵏⵏⵉ ⵉⵖⵣⵉⵏ ⵉⵊⵊ ⵏ ⵡⴻⵃⴼⵓⵔ ⵏ ⵜⵓⵔⵚⵓⴹⵉ, ⴰⴷ ⴷⴰⵢⴻⵙ ⵉⵡⴹⴰ ⵙⵉⵎⴰⵏⵜ ⵏⵏⴻⵙ ⵓ ⵜⴰⵚⴹⴰⵔⵜ ⴰⴷ ⴷⴷ-ⵜⴻⴷⵡⴻⵍ ⵖⴰⵔ ⵡⴻⵏⵏⵉ ⵜⵜ ⵉⵙⵙⴻⵇⵏⵓⵏⵏⵓⵢⴻⵏ. 28 ⵉⵍⴻⵙ ⵉⵙⵙⵅⴰⵔⵔⵉⵇⴻⵏ ⵉⵛⴰⵔⵔⴻⵀ ⵡⴻⵏⵏⵉ ⵉⵜⵜⴰⵔⴻⴷⴷⴵⴻⵏ, ⵉⵊⵊ ⵏ ⵓⵇⴻⵎⵎⵓⵎ ⴰⵍⴻⵇⵇⴰⵖ ⵙ ⵜⴻⵃⵔⴰⵢⵎⴻⵛⵜ ⵉⵜⵜⴰⵡⵉ-ⴷⴷ ⵍⵅⴰⵔⴱⴻⵜ.