ⴰⵡⴰⵍⴻⵏ ⵉⵡⴻⵥⵏⴻⵏ 20

1 ⴱⵉⵏⵓ ⴷ ⵉⵊⵊ ⵏ ⵓⵎⴻⵙⵜⴻⵀⵣⵉⵢ, ⵛⵛⵔⴰⴱ ⴷ ⴱⵓ-ⵙⵙⴹⴻⵄ, ⴽⵓⵍ ⵉⵊⵊⴻⵏ ⵡⴻⵏⵏⵉ ⵣⵣⴰⵢⴻⵙ ⵉ ⵖⴰ ⵉⵡⴻⴷⴷⴰⵔⴻⵏ, ⵄⴻⵎⵎⴰⵔⵚ ⵡⴰⵔ ⵉⴷⴷⵉⴽⴽⵡⵉⵍ ⴷ ⴰⵎⵉⵖⵉⵙ. 2 ⴰⵀⵓⴷⴷⵉ ⵏ ⵓⵊⴻⴵⵉⴷ ⴰⵎ ⵣⵣⵀⵉⵔ ⵏ ⵡⴰⵢⵔⴰⴷ: ⵡⴻⵏⵏⵉ ⵜ ⵉⵙⵙⴻⵄⴰⵔⴻⵏ, ⵉⵅⴻⵟⵟⴰ ⴰⴽ-ⴷ ⵍⴻⵄⵎⴰⵔ ⵏⵏⴻⵙ. 3 ⴰⵙⵎⴰⵃ ⴷⴻⴳ ⵓⵎⵛⵓⴱⴱⴻⵛ ⴰⵇⴰ ⴷ ⵛⵛⴰⵏ ⵉ ⵡⴻⵔⵢⴰⵣ, ⵎⴰⵛⴰ ⴽⵓⵍ ⴰⴱⵓⵀⴰⵍⵉ ⴰⴷ ⵉⴷⴷⵓⵇⵇⴻⵣ. 4 ⵣⵉ ⵍⵡⴻⵇⵜ ⵏ ⵍⴻⵅⵔⵉⴼ ⵡⴰⵔ ⵉⵛⴰⵔⵔⴻⵣ ⵓⵎⴻⵄⴳⵓⵣ, ⵅⴻⵏⵏⵉ ⴰⴷ ⵉⵜⵜⴰⵔ ⴷⵉ ⵍⵡⴻⵇⵜ ⵏ ⵜⵎⴻⵢⵔⴰ, ⵎⴰⵛⴰ ⵡⴰⵔ ⵉⵜⵜⵉⴼ ⵡⴰⵍⵓ. 5 ⵉⵅⴰⵔⵔⵉⵚⴻⵏ ⴷⴻⴳ ⵡⵓⵍ ⵏ ⴱⵏⴰⴷⴻⵎ ⴰⵎⴰⵏ ⵢⵓⴵⵖⴻⵏ, ⵎⴰⵛⴰ ⵉⵊⵊ ⵏ ⵡⴻⵔⵢⴰⵣ ⵙ ⵍⴻⴼⵀⴰⵎⴻⵜ ⵉⵙⵙⴻⵏ ⴰⴷ ⵜⴻⵏ ⵢⴰⵢⴻⵎ. 6 ⴰⵟⵟⴰⵙ ⵏ ⵉⵡⴷⴰⵏ ⵜⵜⵍⴰⵖⴰⵏ ⵅ ⵛⴰ ⵏ ⵉⵊⵊⴻⵏ ‘ⴰⵎⴻⴷⴷⵓⴽⴽⴻⵍ ⵏⵙⴻⵏ ⴷ ⴰⵎⵜⵉⵇⵇⵉ’, ⵎⴰⵛⴰ ⴰⵔⵢⴰⵣ ⴷ ⴰⵎⵜⵉⵇⵇⵉ, ⵎⴰⵏ ⵡⴻⵏ ⵜ ⵉ ⵖⴰ ⵢⴰⴼⴻⵏ? 7 ⴰⵎⵙⴻⴳⴳⴻⴷ ⵉⴳⴳⵓⵔ ⴷⵉ ⵍⴻⵚⴼⴰⵢⴻⵜ ⵏⵏⴻⵙ, ⵙⵙⴻⵄⴷ ⵏ ⵉⵃⴻⵏⵊⵉⵔⴻⵏ ⵏⵏⴻⵙ ⵉ ⵉⵜⵜⴻⵊⵊⴰ ⴰⵡⴰⵔⵏⵉ ⴰⵙ. 8 ⵉⵊⵊ ⵏ ⵓⵊⴻⴵⵉⴷ ⵏⵏⵉ ⵉⵜⵜⵖⵉⵎⴰⵏ ⵅ ⵍⴽⵓⵔⵙⵉ ⵏ ⵛⵛⵔⴻⵄ, ⵉⵜⵜⵚⴻⴼⴼⴰ ⵎⴰⵔⵔⴰ ⵍⵖⴰⵔ ⵙ ⵜⵉⵟⵟⴰⵡⵉⵏ ⵏⵏⴻⵙ. 9 ⵡⵉ ⵉⵣⴻⵎⵎⴰⵔⴻⵏ ⴰⴷ ⵢⵉⵏⵉ: “ⵏⴻⵛⵛ ⵙⵙⵉⵣⴻⴷⴳⴻⵖ ⵓⵍ ⵉⵏⵓ, ⵏⴻⵛⵛ ⵉⵣⴷⵉⴳⴻⵖ ⵣⵉ ⴷⴷⵏⵓⴱ ⵉⵏⵓ!”? 10 ⵉⵊⵊ ⵏ ⵍⴻⵡⵣⴻⵏ ⴷ ⵉⵊⵊ ⵏ ⵍⴻⵡⵣⴻⵏ ⵏⵏⴻⵖⵏⵉ, ⵉⵊⵊ ⵏ ⵉⴼⴰ ⴷ ⵉⵊⵊ ⵏ ⵉⴼⴰ ⵏⵏⴻⵖⵏⵉ, ⴰⵇⴰ ⴰⵜⴻⵏ ⵙ ⵜⵏⴰⵢⴻⵏ ⵉⴷⵙⴻⵏ ⴷ ⵏⵏⵄⵉ ⵉ ⵙⵉⴷⵉ. 11 ⴰⵃⵓⴷⵔⵉ ⵉⵙⵙⵛⴰⵏⴰ ⴷⵉ ⵜⵎⴻⴳⴳⴰ ⵏⵏⴻⵙ, ⵎⴰ ⵍⵅⴻⴷⵎⴻⵜ ⵏⵏⴻⵙ ⵜⴻⵚⴼⴰ ⵏⵉⵖ ⴰⵇⴰ ⵏⵉⵛⴰⵏ ⵉ ⵜⴻⴵⴰ. 12 ⴰⵎⴻⵣⵣⵓⵖ ⵉⵜⵜⴻⵙⵍⴰⵏ ⴷ ⵜⵉⵟⵟ ⵉⵜⵜⵡⴰⵍⴰⵏ, ⵙⵉⴷⵉ ⵉⴳⴳⴰ ⵉ-ⵜⴻⵏ ⵙ ⵜⵏⴰⵢⴻⵏ ⵉⴷⵙⴻⵏ. 13 ⵡⴰⵔ ⵜⵜⴻⵅⵙ ⵉⴹⴻⵚ ⵎⴰⵃⴻⵏⴷ ⵡⴰⵔ ⵜⴻⴷⴷⵉⴽⴽⵡⵉⵍⴻⴷ ⴷ ⴰⵎⴻⵣⵍⵓⴹ, ⴰⵔⵣⴻⵎ ⵜⵉⵟⵟⴰⵡⵉⵏ ⵏⵏⴻⵛ, ⵙⵢⵉⵡⴻⵏ ⵉⵅⴻⴼ ⵏⵏⴻⵛ ⵙ ⵡⴻⵖⵔⵓⵎ. 14 ‘ⵡⴰⵔ ⵉⵃⵍⵉ, ⵡⴰⵔ ⵉⵃⵍⵉ!’, ⵉⵇⵇⴰⵔ ⵓⵎⵙⴻⵡⵡⴻⵇ, ⵎⴰⵛⴰ ⵎⴰⵍⴰ ⵢⵓⵢⵓⵔ, ⴰⵎⵎⵓ ⵉ ⵉⵜⵜⵛⴻⵏⵏⴻⵄ ⵉⵅⴻⴼ ⵏⵏⴻⵙ. 15 ⵓⵔⴻⵖ ⵉⴵⴰ, ⵓⵍⴰ ⴷ ⴰⵟⵟⴰⵙ ⵏ ⵍⵎⴰⵔⵊⴰⵏ, ⵎⴰⵛⴰ ⵉⵢⴻⵏⵛⵉⵛⴻⵏ ⵛⵛⵓⵔⴻⵏ ⵙ ⵜⵓⵙⵙⵏⴰ ⴷ ⵉⵛⵜ ⵏ ⵍⵇⴻⵛⵄⴻⵜ ⵉⵖⵍⴰⵏ ⴰⵟⵟⴰⵙ. 16 ⵎⴰⵍⴰ ⵉⵊⵊⴻⵏ ⵉⴷⴷⴰⴽⴽⵡⴰⵍ ⴷ ⴰⴹⵎⴰⵏ ⵉ ⵢⵉⵊⵊ ⵏ ⵓⴱⴰⵔⵔⴰⵏⵉ, ⵅⴻⵏⵏⵉ ⴽⵙⵉ ⴰⵔⵔⵓⴹ ⵏⵏⴻⵙ ⵓ ⴽⵙⵉ ⵜ ⴷ ⴷⴷⵉⵢⵢⴻⵜ ⵉ ⵢⵉⵏⵏⵉ ⵡⴰⵔ ⵉⵜⵜⵡⴰⵙⵙⵏⴻⵏ. 17 ⴷ ⴰⵎⵉⵥⵉⴷ ⵉ ⴱⵏⴰⴷⴻⵎ ⴰⵖⵔⵓⵎ ⵏⵏⵉ ⵉⵟⵟⴻⴼ ⵙ ⵉⵅⴰⵔⵔⵉⵇⴻⵏ, ⴰⵡⴰⵔⵏⵉ ⴰⵙ ⴰⴷ ⵉⵛⵛⵓⵔ ⵓⵇⴻⵎⵎⵓⵎ ⵏⵏⴻⵙ ⵙ ⵉⵇⴰⵢⴰⵙⴻⵏ. 18 ⵉⵅⴻⵎⵎⵉⵎⴻⵏ ⵜⵜⴻⴽⵎⵉⵍⴻⵏ ⵙ ⵓⵛⴰⵡⴰⵔ, ⵅ ⵓⵢⴻⵏⵏⵉ ⵏⴷⴻⵀ ⴰⵎⴻⵏⵖⵉ ⵙ ⵓⴷⴻⴱⴱⴰⵔ. 19 ⵡⴻⵏⵏⵉ ⵉⴳⴳⵓⵔⴻⵏ ⴷⴰ ⴷ ⴷⵉⵀⴰ ⵙ ⵜⴻⵅⴱⴰⵔⵊⵉⵜ, ⵉⵜⵜⵄⴰⵔⵔⴰ ⵎⵉⵏ ⵉⵏⵏⵓⴼⴼⴰⵔⴻⵏ, ⵡⴰⵔ ⵜⵙⴻⴱⴱⴻⴱ ⴰⴽ-ⴷ ⵡⴻⵏⵏⵉ ⵉⵙⵙⵃⵉⵏⵏⵉⴱⴻⵏ ⵙ ⵉⵢⴻⵏⵛⵉⵛⴻⵏ ⵏⵏⴻⵙ ⵉⵚⴻⴱⵀⴻⵏ. 20 ⵡⴻⵏⵏⵉ ⵉ ⵖⴰ ⵉⵏⴻⵄⵍⴻⵏ ⵅ ⴱⴰⴱⴰⵙ ⴷ ⵢⴻⵎⵎⴰⵙ, ⵍⴻⴼⵏⴰⵔ ⵏⵏⴻⵙ ⴰⴷ ⵉⵜⵜⵡⴰⵙⵙⴻⵅⵙⵉ ⴷⵉ ⵜⴰⴵⴻⵙⵜ ⵜⴰⴱⴰⵔⵛⴰⵏⵜ. 21 ⵎⴰⵍⴰ ⵜⴰⵙⵖⴰⵔⵜ ⵜᵉⵜⵜⵡⴰⴽⵙⴻⴱ ⴷⴻⵖⵢⴰ ⵙ ⵜⴰⵣⵍⴰ ⴷⴻⴳ ⵓⵎⴻⵣⵡⴰⵔⵓ, ⵡⴰⵔ ⴷⴷ-ⵜⵉⵡⴻⴹ ⴷ ⵍⴱⴰⵔⴰⴽⴰ ⵖⴰⵔ ⵓⵏⴻⴳⴳⴰⵔ. 22 ⵡⴰⵔ ⵇⵇⴰⵔ: “ⵏⴻⵛⵛ ⴰⴷ ⵅⴻⵍⴼⴻⵖ ⵍⵖⴰⵔ!” ⵎⴰⵛⴰ ⵜⵛⴻⵍ ⵅ ⵙⵉⴷⵉ ⵓ ⵏⴻⵜⵜⴰ ⴰⴷ ⵛⴻⴽ ⵉⵙⵙⴻⵏⵊⴻⵎ. 23 ⵉⵊⵊ ⵏ ⵍⴻⵡⵣⴻⵏ ⴷ ⵉⵊⵊ ⵏ ⵍⴻⵡⵣⴻⵏ ⵏⵏⴻⵖⵏⵉ, ⴰⵇⴰ ⴰⵜⴻⵏ ⴷ ⵏⵏⵄⵉ ⵉ ⵙⵉⴷⵉ, ⵍⵎⵉⵣⴰⵏⴰⵜ ⵉⵖⴻⵛⵛⴻⵏ ⵡⴰⵔ ⴵⵉⵏ ⵛⴰ ⵎⵍⵉⵃ. 24 ⵉⵚⵓⵔⴰⴼ ⵏ ⵉⵊⵊ ⵏ ⵡⴻⵔⵢⴰⵣ ⴰⵇⴰ ⴰⵜⴻⵏ ⵏ ⵙⵉⴷⵉ, ⵅⴻⵏⵏⵉ ⵎⴰⵎⵎⴻⵛ ⵖⴰ ⵢⴻⴳⴳ ⴱⵏⴰⴷⴻⵎ ⴰⴷ ⵉⵙⵙⴻⵏ ⴰⴱⵔⵉⴷ ⵏⵏⴻⵙ? 25 ⴰⵇⴰ-ⵜ ⴷ ⵍⴼⴻⵅ ⵉ ⴱⵏⴰⴷⴻⵎ ⵉ ⵖⴰ ⵉⵍⴰⵖⴰⵏ ⵙ ⵓⵇⴻⴵⴻⵇ ‘ⴰⵎⵇⴻⴷⴷⴻⵙ’, ⵓ ⵄⴰⴷ ⴰⵡⴰⵔⵏⵉ ⵍⵡⵓⵄⵓⴷ ⵏⵏⴻⵙ ⵉ ⵉⴳⴳⴰ ⴰⴷ ⵉⵅⴰⵔⵔⴻⵚ. 26 ⵉⵊⵊ ⵏ ⵓⵊⴻⴵⵉⴷ ⴰⵎⵉⵖⵉⵙ ⵉⵜⵜⵚⴻⴼⴼⴰ ⵉⵄⴻⴼⴼⴰⵏⴻⵏ, ⵉⵜⵜⴻⵊⵊⴰ ⵜⴰⵊⴰⵔⵔⴰⵔⵜ ⵏ ⵜⴻⵍⵡⵉⵃⵜ ⵉⵜⵜⴻⵃⵍⵓⴵⵓⴹⴻⵏ ⵉ ⵓⵙⴰⵔⵡⴻⵜ ⴰⴷ ⵅⴰⵙⴻⵏ ⵉⵄⵇⴻⴱ. 27 ⵜⵡⴰⵔⵔⵉⵜ ⵏ ⵏⵏⴻⴼⵙ ⵏ ⴱⵓⵃⴱⴻⵍ ⵏ ⴱⵏⴰⴷⴻⵎ ⴷ ⵍⴻⴼⵏⴰⵔ ⵏ ⵙⵉⴷⵉ ⵏⵏⵉ ⵢⴰⵔⴻⵣⵣⵓⵏ ⴷⵉ ⴷⴰⵅⴻⵍ ⵏ ⵉⵅⵅⴰⵎⴻⵏ ⵏ ⵓⵄⴻⴷⴷⵉⵙ. 28 ⵜⴰⵎⴻⵅⵙⵉⵡⵜ ⵉⵛⴻⵡⵡⴰⵔⴻⵏ ⴷ ⵍⴰⵎⴰⵏ ⵃⴻⵟⵟⴰⵏ ⴰⵊⴻⴵⵉⴷ, ⵓ ⵍⵄⴰⵔⵛ ⵏⵏⴻⵙ ⵉⵙⵙⴻⵊⵀⴻⴷ ⵉ-ⵜ ⵙ ⵜⵎⴻⵅⵙⵉⵡⵜ ⵉⵛⴻⵡⵡⴰⵔⴻⵏ. 29 ⵜⴰⵍⵡⵉⵣⵜ ⵏ ⵉⵃⵓⴷⵔⵉⵢⵢⴻⵏ ⴷ ⵊⵊⴻⵀⴷ ⵏⵙⴻⵏ, ⵓ ⵍⵄⴰⴹⴰⵎⴰ ⵏ ⵉⵡⴻⵙⵙⵓⵔⴰ ⴷ ⴰⵛⵓⵡⵡⴰⴼ ⵉⵛⴰⴱⴻⵏ. 30 ⵉⵢⴻⵣⵣⵉⵎⴻⵏ ⵉⵜⵜⴰⵣⵣⵍⴻⵏ ⵙ ⵉⴷⴰⵎⵎⴻⵏ ⵙⵙⵉⵣⴷⵉⴳⴻⵏ ⴱⵏⴰⴷⴻⵎ ⵣⵉ ⵍⵖⴰⵔ, ⵓ ⵜⵉⵢⵢⵉⵜⴰ ⵚⴻⴼⴼⴰⵏⵜ ⵓⵍⴰ ⴷ ⵜⴰⴽⵔⵉⵛⵜ.