ⴰⵡⴰⵍⴻⵏ ⵉⵡⴻⵥⵏⴻⵏ 17

1 ⵉⵃⵍⴰ ⵉⵊⵊ ⵏ ⵓⵣⴻⵄⵄⵉⴼ ⵏ ⵡⴻⵖⵔⵓⵎ ⵢⵓⵥⵖⴻⵏ ⴰⴽ-ⴷ ⵍⴻⵀⵏⴰ, ⵅ ⵉⵛⵜ ⵏ ⵜⴰⴷⴷⴰⵔⵜ ⵜⴻⵛⵛⵓⵔ ⵙ ⵜⵖⴰⵔⵚⴰ, ⴷⴰⵢⴻⵙ ⴰⵎⴻⵏⵖⵉ. 2 ⵉⵊⵊ ⵏ ⵢⵉⵙⵎⴻⵖ ⵉⴼⴻⵜⵏⴻⵏ ⴰⴷ ⵉⴹⴻⴱⴱⴰⵔ ⵅ ⵉⵊⵊ ⵏ ⵎⵎⵉⵙ ⵏⵏⵉ ⵉⵜⵜⴰⵡⵢⴻⵏ ⵖⴰⵔ ⵍⴻⴼⴹⵉⵃⴻⵜ, ⴷⵉ ⵍⵡⴻⵙⵟ ⵏ ⵢⴰⵢⵜⵎⴰⵙ ⴰⴷ ⵉⴱⴹⴰ ⵏⴻⵜⵜⴰ ⵍⵡⴰⵔⵜ. 3 ⴰⵟⴻⵏⵊⵉⵔ ⵏ ⵓⵙⴻⴼⵙⵉ ⵉ ⵏⵏⵓⵇⴰⵔⵜ ⵓ ⴰⴼⴰⵔⵔⴰⵏ ⵉ ⵡⵓⵔⴻⵖ, ⵎⴰⵛⴰ ⵙⵉⴷⵉ ⵉⵜⵜⵊⴰⵔⵔⴰⴱ ⵓⵍⴰⵡⴻⵏ. 4 ⴰⵄⴻⴼⴼⴰⵏ ⵉⵅⴻⵣⵣⴰⵔ ⵖⴰⵔ ⵉⵢⴻⵏⵛⵉⵛⴻⵏ ⵉⵄⴻⴼⴼⴰⵏⴻⵏ, ⴱⵓ-ⵉⵅⴰⵔⵔⵉⵇⴻⵏ ⵉⵜⵜⵉⵛ ⴰⵎⴻⵣⵣⵓⵖ ⵉ ⵢⵉⵍⴻⵙ ⵉⵛⵛⵓⵔⴻⵏ ⵙ ⵍⵖⴻⵛⵛ. 5 ⵡⴻⵏⵏⵉ ⵉⵜⵜⵃⴻⵛⵛⴻⵏ ⵅ ⵓⵎⴻⵣⵍⵓⴹ, ⵉⵙⵙⴼⴻⵟⵟⴻⵃ ⵡⴻⵏⵏⵉ ⵜ-ⵉ-ⴷⴷ-ⵉⵅⴻⵍⵇⴻⵏ, ⵡⴻⵏⵏⵉ ⵉⴼⴰⵔⵔⵃⴻⵏ ⵅ ⴰⵔⵥⵉⵢⵢⴻⵜ, ⵡⴰⵔ ⵉⵜⵜⵡⵉⵃⵙⵉⴱ ⴷ ⴰⵎⴻⵣⴷⴰⴳ. 6 ⵜⵜⴰⵊ ⵏ ⵉⵡⴻⵙⵙⵓⵔⴰ ⴷ ⴰⵢⵢⴰⵡⴻⵏ, ⵜⴰⵍⵡⵉⵣⵜ ⵏ ⵉⵃⴻⵏⵊⵉⵔⴻⵏ ⴷ ⵉⴱⴰⴱⴰⵜⴻⵏ ⵏⵙⴻⵏ. 7 ⴰⵢⴻⵏⵛⵉⵛ ⵏ ⵛⵛⴰⵏ ⵡⴰⵔ ⴷⴷ-ⵉⵜⵜⵉⵙ ⴰⴽ-ⴷ ⵓⴱⵓⵀⴰⵍⵉ, ⵅⴻⵏⵏⵉ ⵄⴻⵙⵙⴰⴽ ⵄⴰⴷ ⴰⵢⴻⵏⵛⵉⵛ ⵉⵙⵙⵅⴰⵔⵔⵉⵇⴻⵏ ⴰⴽ-ⴷ ⵓⵎⵛⴻⵏⵏⴻⵄ. 8 ⵜⴰⵔⵣⴻⴼⵜ ⵏ ⴰⵔⵔⴻⵛⵡⴻⵜ ⴷ ⵉⵊⵊ ⵏ ⵡⴻⵥⵔⵓ ⵉⵣⴻⵡⵡⵇⴻⵏ ⴷⵉ ⵜⵉⵟⵟⴰⵡⵉⵏ ⵏ ⴱⴰⴱ ⵏⵏⴻⵙ, ⵎⴰⵏⵉ ⵎⴰ ⵢⴰⵔⵔⴰ ⵙ ⵓⵣⴻⴵⵉⴼ, ⵉⵜⵜⴻⴼⵍⵉⵃ. 9 ⵡⴻⵏⵏⵉ ⵉⵙⵙⴷⵓⵔⵔⵓⵢⴻⵏ ⴰⵅⴻⵟⵟⵓ, ⵢⴰⵔⴻⵣⵣⵓ ⵜⴰⵢⵔⵉ, ⵎⴰⵛⴰ ⵡⴻⵏⵏⵉ ⵉⵜⵜⵄⴰⵡⴰⴷⴻⵏ ⵉⵛⵜ ⵏ ⵍⵃⴰⵊⵊⴻⵜ ⵣⵉ ⵊⴷⵉⴷ, ⵉⴱⴻⵟⵟⴰ ⵉⵎⴻⴷⴷⵓⴽⴽⴰⵍ ⵉⵛⵏⴰⵏ. 10 ⵉⵜⵜⵇⴰⵔⵔⴰ ⵓⵜⴻⵅⵜⴻⵅ ⵅ ⵓⴼⴻⵀⵀⴰⵎ ⴰⵟⵟⴰⵙ ⵅ ⵎⵢⴰ ⵏ ⵜⴻⵢⵢⵉⵜⴰ ⵅ ⵢⵉⵊⵊ ⵏ ⵓⴱⵓⵀⴰⵍⵉ. 11 ⴰⵎⵖⴻⵡⵡⴻⵖ ⵢⴰⵔⴻⵣⵣⵓ ⵎⵖⵉⵔ ⵅ ⵍⵖⴰⵔ, ⵅ ⵓⵢⴰ ⴰⴷ ⵖⴰⵔⴻⵙ ⴷⴷ-ⵉⵜⵜⵡⴰⵙⵙⴻⴽⴽ ⵉⵊⵊ ⵏ ⵓⵎⵙⴻⵅⵅⴰⵔ ⵉⵇⴻⵙⵃⴻⵏ ⴹⵉⴷⴷ ⵏⵏⴻⵙ. 12 ⴻⵊⵊ ⴰⴷ ⵉⵎⵎⴻⵍⵇⴰ ⵛⴰ ⵏ ⴷⴷⵓⴱ ⵉ ⵓⵎⵉ ⵜⵜⵡⴰⵛⴰⵔⴻⵏ ⵜⴰⵔⵡⴰ ⴰⴽ-ⴷ ⵛⴰ ⵏ ⵢⵉⵊⵊⴻⵏ, ⵎⴰⵛⴰ ⵡⴰⵔ ⵉⴵⵉ ⴰⴱⵓⵀⴰⵍⵉ ⴷⵉ ⵜⵓⴱⴱⵓⵀⴻⵍⵢⴰ ⵏⵏⴻⵙ. 13 ⵡⴻⵏⵏⵉ ⵉⵜⵜⵅⴻⴵⴰⵚⴻⵏ ⵎⵉⵏ ⵉⵚⴻⴱⵃⴻⵏ ⵙ ⵍⵖⴰⵔ, ⵡⴰⵔ ⵜᵉⵜⵜⵃⴻⵢⵢⵉⴷ ⴰⵔⵥⵉⵢⵢⴻⵜ ⵅ ⵜⴰⴷⴷⴰⵔⵜ ⵏⵏⴻⵙ. 14 ⴱⴻⴷⴷⵓ ⵏ ⵓⵎⴻⵏⵖⵉ ⴰⵎⴻⵛⵏⴰⵡ ⴰⵔⵣⴰⵎ ⵏ ⵍⵃⴻⵎⵍⴻⵜ ⵏ ⵡⴰⵎⴰⵏ. ⴻⵊⵊ ⴰⵎⴻⵏⵖⵉ ⴰⴷ ⵢⴰⵔⵙ ⵇⴱⴻⵍ ⵉ ⵖⴰ ⵉⴷⴷⵓⵇⵇⴻⵣ. 15 ⵡⴻⵏⵏⵉ ⵉⵜⵜⴱⴰⵔⵔⴰⵏ ⴰⵄⴻⴼⴼⴰⵏ ⵓ ⵡⴻⵏⵏⵉ ⵉⵜⵜⴱⴰⵔⵔⴰⵃⴻⵏ ⴰⵇⴰ ⴰⵎⵙⴻⴳⴳⴻⴷ ⴷ ⴰⵄⴻⴼⴼⴰⵏ, ⴰⵇⴰ ⵏⵉⵜⵏⵉ ⵙ ⵜⵏⴰⵢⴻⵏ ⵉⴷⵙⴻⵏ ⴷ ⵏⵏⵄⵉ ⵉ ⵙⵉⴷⵉ. 16 ⵎⴰⵢⴻⵎⵎⵉ ⴷⵉⵏ ⵉ ⵖⴰ ⵉⵍⵉⵏⵜ ⵜⵎⴻⵏⵢⴰⵜ ⴷⴻⴳ ⵓⴼⵓⵙ ⵏ ⵓⴱⵓⵀⴰⵍⵉ ⵎⴰⵃⴻⵏⴷ ⴰⴷ ⵉⵙⴻⵖ ⵜⵉⵖⵉⵜ, ⴰⵎ ⵡⴰⵔ ⵖⴰⵔⴻⵙ ⵓⵍ ⵉ ⵎⴰⵏ ⴰⵢⴰ? 17 ⴰⵎⴻⴷⴷⵓⴽⴽⴻⵍ ⴷ ⵜⵉⴷⴻⵜⵜ ⵉⵜⵜⴻⵅⵙ ⵍⴻⴱⴷⴰ, ⵓ ⵜⴰⵡⵎⴰⵜ ⵜᵉⵜⵜⵡⴰⵅⵍⴻⵇ-ⴷⴷ ⵉ ⵍⴻⵃⵚⴰⵔⴻⵜ. 18 ⴱⵏⴰⴷⴻⵎ ⵏⵏⵉ ⵡⴰⵔ ⵖⴰⵔ ⵉⴵⵉ ⵡⵓⵍ ⵉⵎⵜⴻⵏ, ⵉⵛⵛⴰⵜ ⴰⴼⵓⵙ, ⵉⵜⵜⴻⴳⴳ ⵉⵅⴻⴼ ⵏⵏⴻⵙ ⴷ ⴰⴹⵎⴰⵏ ⵉ ⵊⵊⴰⵔ ⵏⵏⴻⵙ. 19 ⵡⴻⵏⵏⵉ ⵉⵜⵜⴻⵅⵙⴻⵏ ⴰⵅⴻⵟⵟⵓ, ⵉⵜⵜⴻⵅⵙ ⴰⵎⵛⵓⴱⴱⴻⵛ, ⵡⴻⵏⵏⵉ ⵉⵜⵜⴻⴳⴳⴻⵏ ⵜⴰⵡⵡⴰⵔⵜ ⵏⵏⴻⵙ ⵜⴳⴻⵄⵄⴻⴷ, ⵢⴰⵔⴻⵣⵣⵓ ⵜⴰⵔⴻⵥⵥⵉⵜ. 20 ⵡⴻⵏⵏⵉ ⵖⴰⵔ ⵉⴵⴰ ⵓⵍ ⵉⴼⴰⵔⵖ, ⵡⴰⵔ ⵉⵜⵜⵉⴼ ⵎⵉⵏ ⵉⵚⴻⴱⵃⴻⵏ, ⵡⴻⵏⵏⵉ ⵉⴼⴰⵔⵔⵖⴻⵏ ⵙ ⵉⵢⴻⵏⵛⵉⵛⴻⵏ ⵏⵏⴻⵙ, ⴰⴷ ⵉⵡⴹⴰ ⴷⵉ ⴰⵔⵥⵉⵢⵢⴻⵜ. 21 ⵡⴻⵏⵏⵉ ⴷⴷ-ⵢⵓⵔⵡⴻⵏ ⵉⵊⵊ ⵏ ⵓⴱⵓⵀⴰⵍⵉ, ⵉⵜⵜⴰⵡⵉ-ⴷⴷ ⴰⵛⴹⴰⵏ ⵉ ⵢⵉⵅⴻⴼ ⵏⵏⴻⵙ, ⴱⴰⴱⴰⵙ ⵏ ⵓⴱⵓⵀⴰⵍⵉ ⵡⴰⵔ ⵉⵣⴻⵎⵎⴰⵔ ⴰⴷ ⵉⴼⴰⵔⵃ. 22 ⵓⵍ ⵉⴼⴰⵔⵃⴻⵏ ⵉⵊⴻⴱⴱⴻⴷ ⴰⴳⴻⵏⴼⵓ, ⵎⴰⵛⴰ ⴱⵓⵃⴱⴻⵍ ⵉⵛⴻⴹⵏⴻⵏ ⵉⵙⵙⴰⵥⴰⵖ ⵉⵖⵙⴰⵏ. 23 ⴰⵄⴻⴼⴼⴰⵏ ⴰⴷ ⴷⴷ-ⵉⴽⵙⵉ ⵜⴰⵔⵣⴻⴼⵜ ⵏ ⴰⵔⵔⴻⵛⵡⴻⵜ ⵣⴻⴳ ⵡⴻⵃⵙⵉⵏ, ⵃⵉⵎⴰ ⴰⴷ ⵉⵙⵙⴼⴰⵔⵖ ⵉⵎⴻⵙⵔⴰⵇ ⵏ ⵍⵃⴻⵇⵇ. 24 ⴰⴼⴻⵀⵀⴰⵎ ⵉⵜⵜⴻⴳⴳ ⵜⵉⵖⵉⵜ ⵣⵣⴰⵜ ⵉ ⵜⵎⵓⵖⵍⵉ ⵏⵏⴻⵙ, ⵎⴰⵛⴰ ⵜⵉⵟⵟⴰⵡⵉⵏ ⵏ ⵓⴱⵓⵀⴰⵍⵉ ⵜⵜⴰⵡⵢⴻⵏⵜ ⴰⵍ ⵟⵟⴰⵔⴼ ⵏ ⵜⴻⵎⵎⵓⵔⵜ. 25 ⵉⵊⵊ ⵏ ⵎⵎⵉⵙ ⴰⴱⵓⵀⴰⵍⵉ ⴷ ⵍⴻⵄⴷⴰⴱ ⵉ ⴱⴰⴱⴰⵙ, ⴷ ⵉⵊⵊ ⵏ ⵍⴻⵃⵍⵉⵇ ⴰⵎⴻⵔⵣⴰⴳ ⵉ ⵡⴻⵏⵏⵉ ⵜ-ⵉ-ⴷⴷ ⵢⵓⵔⵡⴻⵏ. 26 ⴰⵡⴻⴷⴷⴻⴱ ⵏ ⵓⵎⵙⴻⴳⴳⴻⴷ ⵡⴰⵔ ⵉⴵⵉ ⵏⵉⵛⴰⵏ, ⴰⵎ ⵓⵍⴰ ⴷ ⵜⵉⵢⵢⵉⵜⴰ ⵉ ⴰⵢⵜ ⵏ ⵟⵟⴰⵙⵉⵍⴻⵜ ⴷⵉ ⵙⵙⵉⴱⴱⴻⵜ ⵏ ⵍⴻⵚⴼⴰⵢⴻⵜ ⵏⵙⴻⵏ. 27 ⵡⴻⵏⵏⵉ ⵖⴰⵔ ⵜⴻⴵⴰ ⵜⵓⵙⵙⵏⴰ, ⵉⵎⴻⵏⵏⴻⵄ ⴰⵡⴰⵍⴻⵏ ⵏⵏⴻⵙ, ⴰⵔⵢⴰⵣ ⴰⴼⴻⵀⵀⴰⵎ ⴷⴰⵢⴻⵙ ⴱⵓⵃⴱⴻⵍ ⵏⵏⴻⵙ ⵢⴰⵔⵙⴰ. 28 ⵓⵍⴰ ⴰⴱⵓⵀⴰⵍⵉ ⵉⵙⵙⵖⴰⴷⴻⵏ, ⴰⴷ ⵉⵜⵜⵡⴰⵃⵙⴻⴱ ⴷ ⴰⵎⵉⵖⵉⵙ, ⵡⴻⵏⵏⵉ ⵉⴱⴻⵍⵍⵄⴻⵏ ⵉⵢⴻⵏⵛⵉⵛⴻⵏ ⵏⵏⴻⵙ ⴰⴷ ⵉⵜⵜⵡⴰⵃⵙⴻⴱ ⴷ ⴰⴼⴻⵜⵜⴰⵏ.