ⴰⵢⵓⴱ 41

1 ⵅⵣⴰⵔ, ⵇⴰⵄ ⴰⵔⴰⵊⵉ ⴰⴷ ⵉⴼⵛⴻⵍ, ⵎⵖⵉⵔ ⵜⴰⵎⵓⵖⵍⵉ ⵏⵏⴻⵙ ⵜⴻⵙⵙⴻⵄⴳⴰⵣ ⴱⵏⴰⴷⴻⵎ. 2 ⵡⴰⵔ ⵉⴵⵉ ⵓⵍⴰ ⴷ ⵉⵊⵊⴻⵏ ⴰⵎⵎⵓ ⴷ ⴰⵣⴻⵄⵄⴰⵎ ⴰⵍⴰⵎⵉ ⵜ ⵉ ⵖⴰ ⵉⵀⵡⴻⵍ, ⵎⴰⵏ ⵡⴻⵏ ⵅⴻⵏⵏⵉ ⵉⵣⴻⵎⵎⴰⵔⴻⵏ ⴰⴷ ⵉⵇⵇⵉⵎ ⵉⴱⴻⴷⴷ ⵣⵣⴰⵜ ⵉ ⵓⵖⴻⵎⴱⵓⴱ ⵉⵏⵓ? 3 ⵎⴰⵏ ⵡⴻⵏ ⵉ ⴷ ⴰⵢⵉ ⵉⵡⵛⵉⵏ ⵛⴰ ⴷ ⴰⵎⴻⵣⵡⴰⵔⵓ, ⴰⵍⴰⵎⵉ ⴷ ⴰⵢⵉ ⵉⵜⵜⵅⴻⵚⵚⴰ ⴰⴷ ⵖⴰⵔⴻⵙ ⵜ-ⵉ-ⴷⴷ-ⴰⵔⵔⴻⵖ? ⵎⴰⵔⵔⴰ ⵎⵉⵏ ⵉⴵⴰⵏ ⵙⴰⴷⵓ ⵉⵊⴻⵏⵡⴰⵏ ⵉⵏⵓ! 4 ⵏⴻⵛⵛ ⵡⴰⵔ ⵜⵜⴻⵙⵇⴰⵔⵉⵖ ⵅ ⵉⴹⴰⵔⴻⵏ ⵏⵏⴻⵙ, ⵅ ⵍⴻⵎⵖⴰⵔⴻⵜ ⵏ ⵊⵊⴻⵀⴷ ⵏⵏⴻⵙ ⵓ ⵅ ⵓⵛⵓⵡⵡⴰⵔ ⵏ ⵡⴰⴷⴷⵓⴷ ⵏⵏⴻⵙ. 5 ⵎⴰⵏ ⵡⴻⵏ ⵉⵣⴻⵄⵄⵎⴻⵏ ⴰⴷ ⵉⵇⴻⵊⵊⴻⵄ ⵜⴰⵇⵛⵓⵔⵜ ⵏ ⵡⴰⵔⵔⵓⴹ ⵏⵏⴻⵙ, ⵎⴰⵏ ⵡⴻⵏ ⵉⵣⴻⵄⵄⵎⴻⵏ ⴰⴷ ⴷⴷ-ⵉⵇⴰⵔⵔⴻⴱ ⵖⴰⵔ ⵜⵢⵓⵢⴰ ⵏ ⵍⴻⵙⴷⵓⴷ ⵏ ⵜⴻⵖⵎⴰⵙ ⵏ ⵉⵖⴻⵙⵎⴰⵔ ⵏⵏⴻⵙ? 6 ⵎⴰⵏ ⵡⴻⵏ ⵉⵣⴻⵎⵎⴰⵔⴻⵏ ⴰⴷ ⵢⴰⵔⵣⴻⵎ ⵜⵉⵡⵡⵓⵔⴰ ⵖⴰⵔ ⵓⵖⴻⵎⴱⵓⴱ ⵏⵏⴻⵙ? ⵎⵉⵏ ⵉⵏⵏⴹⴻⵏ ⵉ ⵜⴻⵖⵎⴰⵙ ⵏⵏⴻⵙ ⵎⵖⵉⵔ ⴷ ⴰⵏⴻⵅⵍⵉⵄ. 7 ⵍⴻⵙⴷⵓⴷ ⵏ ⵜⵙⴻⴷⴷⴰⵔⵉⵢⵉⵏ ⵅ ⵡⴻⵄⵔⵓⵔ ⵏⵏⴻⵙ ⵛⴻⵏⵏⵄⴻⵏ, ⴽⵓⵍ ⵉⵊⵊ ⵣⵣⴰⵢⵙⴻⵏ ⵉⵜⵜⵡⴰⴱⴻⵍⵍⴻⵄ ⵙ ⵟⵟⴰⴱⴻⵄ ⵉⵇⵇⵏⴻⵏ ⵏⵉⵛⴰⵏ. 8 ⵉⵊⵊⴻⵏ ⵉⵇⵇⵏⴻⵏ ⵏⵉⵛⴰⵏ ⵖⴰⵔ ⵉⵊⵊ ⵏ ⵏⵏⴻⵖⵏⵉ, ⵡⴰⵔ ⵉⵣⴻⵎⵎⴰⵔ ⴰⴷ ⴷⵉⵏ ⴷⴷ-ⵢⴰⴷⴻⴼ ⴰⵔⵔⵉⵃ ⵊⴰⵔ ⴰⵙⴻⵏ. 9 ⵍⴻⵙⵙⵇⴻⵏ ⴷⴻⴳ ⵡⴰⵢⴰⵡⵢⴰ, ⵓⴷⴼⴻⵏ ⴷⴻⴳ ⵉⵅⴻⴼ ⵏⵙⴻⵏ ⵎⴰⵃⴻⵏⴷ ⵡⴰⵔ ⵜⴻⵎⵎⵙⴻⴱⴹⵉⵏ. 10 ⵎⴰⵍⴰ ⵉⵄⴹⴻⵙ, ⵜᵉⵜⵜⵛⴻⵄⵛⵉⵄ ⵜⴼⴰⵡⵜ, ⵜⵉⵟⵟⴰⵡⵉⵏ ⵏⵏⴻⵙ ⴳⴳⵉⵏⵜ ⴰⵎ ⵡⴰⴱⵍⵉⵡⴻⵏ ⵏ ⵜⴼⴰⵡⵜ ⵏ ⵍⴻⴼⵊⴰⵔ. 11 ⵣⴻⴳ ⵓⵊⴻⵇⵎⵉⵎ ⵏⵏⴻⵙ ⵜⵜⴻⴼⴼⵖⴻⵏ-ⴷⴷ ⵉⵚⴻⴼⴹⴰⵡⴻⵏ, ⵜⵉⴼⴻⵟⵟⵓⵜⵉⵏ ⵏ ⵜⵎⴻⵙⵙⵉ ⴷⴷⵓⵇⵇⵓⵣⴻⵏⵜ ⵣⵣⴰⵢⴻⵙ. 12 ⴷⴷⴻⵅⵅⴰⵏ ⵉⵜⵜⴼⴻⵡⵡⴰⵔ ⵣⴻⴳ ⵉⵅⵓⴱⴰⵛ ⵏ ⵡⴻⵏⵣⴰⵔⴻⵏ ⵏⵏⴻⵙ, ⴰⵎ ⵣⴻⴳ ⵉⵊⵊ ⵏ ⵓⵟⴻⵏⵊⵉⵔ ⵉⵜⵜⵏⴻⵏⵏⴰⵏ ⵙ ⵓⵖⴰⵏⵉⵎ ⵉⴷⴷⵓⵅⵅⵓⵏⴻⵏ. 13 ⵜⵡⴰⵔⵔⵉⵜ ⵏ ⵏⵏⴻⴼⵙ ⵏⵏⴻⵙ ⵜᵉⵙⵙⴻⴽⴽⴰⵔⴰ ⵜⵉⵎⴻⵙⵙⵉ ⴷⵉ ⵍⴻⴼⵃⴻⵎ, ⵣⴻⴳ ⵓⵃⴻⵔⵇⵓⵎ ⵏⵏⴻⵙ ⵉⵜⵜⴻⴼⴼⴻⵖ-ⴷⴷ ⵓⵃⴰⴷⵓⵇ ⵏ ⵜⵎⴻⵙⵙⵉ. 14 ⵊⵊⴻⵀⴷ ⵉⵣⴷⴻⵖ ⴷⴻⴳ ⵉⵊⵉⵎⴰⵏ ⵏⵏⴻⵙ, ⵖⴰⵔ ⵣⵣⴰⵜ ⵏⵏⴻⵙ ⵉⵏⴻⵟⵟⵓ ⵓⵏⴻⵅⵍⵉⵄ. 15 ⵟⵟⵔⵓⴼⴰ ⵏ ⵡⴻⵢⵙⵓⵎ ⵏ ⵓⵄⴻⴷⴷⵉⵙ ⵏⵏⴻⵙ ⵎⵎⵍⴻⵙⵇⴻⵏ, ⴰⵎ ⵅⴰⵙⴻⵏ ⴼⴻⵙⵢⴻⵏ, ⵡⴰⵔ ⵣⴻⵎⵎⴰⵔⴻⵏ ⴰⴷ ⵜⵜⵡⴰⵏⵀⴻⵣⵣⴻⵏ. 16 ⵓⵍ ⵏⵏⴻⵙ ⵉⵇⵙⴻⵃ ⴰⵎ ⵡⴻⵥⵔⵓ, ⵉⵇⵙⴻⵃ ⴰⵎ ⵜⴻⵚⴹⴰⵔⵜ ⵏ ⵙⵡⴰⴷⴷⴰⵢ ⵏ ⵜⵙⵉⵔⵜ. 17 ⵅⵎⵉ ⵉⵙⵙⴳⴻⵄⵄⴰⴷ ⵉⵅⴻⴼ ⵏⵏⴻⵙ, ⵜⵜⵏⴻⵅⵍⴰⵄⴻⵏ ⵉⵏⵏⵉ ⵉⵊⴻⵀⴷⴻⵏ, ⵣⴻⴳ ⵓⵇⴻⵣⵣⴻⴱ ⵅⴻⵟⵟⴰⵏ ⴷⵉ ⵜⴻⵏⴷⴰⵢⵜ. 18 ⵎⴰⵍⴰ ⵉⵍⵇⴻⴼ ⵉ-ⵜ ⵛⴰ ⵏ ⵢⵉⵊⵊⴻⵏ ⵙ ⵙⵙⵉⴼ, ⵡⴰⵔ ⵉⵜⵜⵉⵍⵉ, ⵡⴰⵔ ⵉⴵⵉ ⵙ ⵓⵃⵔⵉⵛ, ⵍⴰ ⵙ ⵍⴰⵏⵙⴰ ⵓⵍⴰ ⵙ ⴼⵍⵉⵜⵛⴰ. 19 ⵓⵣⵣⴰⵍ ⵖⴰⵔⴻⵙ ⴰⵎ ⵓⵍⵓⵎ, ⵏⵏⵃⴰⵙ ⴰⵎ ⵓⴽⴻⵛⵛⵓⴹ ⵢⴰⵔⵛⴰⵏ. 20 ⴼⵍⵉⵜⵛⴰ ⵏ ⵍⵇⴻⵡⵙ ⵡⴰⵔ ⵜ ⵜⴻⵙⵙⵜⴻⵡⵡⴻⵊ, ⵉⵥⵔⴰ ⵏ ⵉⴵⵉⵢ ⴷⴷⴰⴽⴽⵡⴰⵍⴻⵏ ⵣⵣⴰⵜⴻⵙ ⴷ ⴰⵇⴻⵛⵇⴰⵛ. 21 ⵉⴷⴻⴱⴱⵓⵣⴻⵏ ⵉⵃⴻⵙⵙⴻⴱ ⵉ-ⵜⴻⵏ ⴰⵎ ⵓⵇⴻⵛⵇⴰⵛ, ⵉⴹⴻⵃⵃⴻⵛ ⵅ ⵓⵣⴻⴱⵣⴻⴱ ⵏ ⵓⵃⵔⵉⵛ. 22 ⵖⴰⵔ ⵡⴰⴷⴷⴰⵢ ⵏ ⵓⵄⴻⴷⴷⵉⵙ ⵏⵏⴻⵙ ⴰⵇⴰ ⴷⵉⵏ ⵉⵛⴻⵇⴼⴰⵏ ⵉⵇⴻⴹⵄⴻⵏ, ⵉⵜⵜⵊⴰⵔⵔⴰ ⵍⴻⵎⵡⴰⵙ ⵉⵇⴻⴹⵄⴻⵏ ⵏⵏⵉ ⴰⵎ ⵜⴻⵍⵡⵉⵃⵜ ⵉⵜⵜⴻⵃⵍⵓⴵⵓⴹⴻⵏ ⵉ ⵓⵙⴰⵔⵡⴻⵜ ⵜⵉⵡⴰ ⵏ ⵓⴱⴻⴵⴰⵄ. 23 ⵉⴳⴳⴰ ⵍⴰⴵⴰⵖ ⴰⴷ ⵉⵙⵙⵜⴻⵅⵜⴻⵅ ⴰⵎ ⵜⴻⵢⴷⴰⵔⵜ, ⵉⵜⵜⴻⴳⴳ ⵍⴻⴱⵃⴰⵔ ⴰⵎ ⵓⵎⴻⵇⵔⴰⵊ ⵉⵜⵜⵀⴰⵊⴰⵏ. 24 ⵉⵜⵜⴻⵊⵊⴰ ⴰⵡⴰⵔⵏⵉ ⴰⵙ ⵊⵊⵓⵔⵔⴻⵜ ⵜⴰⵔⴻⵇⵇ ⴷ ⴰⵎⴻⵙⵔⴰⵇ, ⴰⵎⴰⵏ ⵉⵀⴻⵡⵍⴻⵏ ⵜⵜⴱⴰⵏⴻⵏ ⴰⵎ ⵓⵛⵓⵡⵡⴰⴼ ⵏ ⵓⵎⴻⵛⵛⴰⵢⴱⵓ. 25 ⵡⴰⵔ ⴷⵉⵏ ⵉⴵⵉ ⵓⵍⴰ ⴷ ⵉⵊⵊ ⵅ ⵜⴻⵎⵎⵓⵔⵜ ⵢⴰⵔⵡⴻⵙ ⴷⴰⵢⴻⵙ, ⵉⵜⵜⵡⴰⴳⴳ ⵃⵉⵎⴰ ⵄⴻⵎⵎⴰⵔⵚ ⵡⴰⵔ ⵉⵜⵜⴻⴳⴳⵯⴻⴷ. 26 ⵉⵏⴹⴰⵔ ⵜⵉⵟⵟⴰⵡⵉⵏ ⵏⵏⴻⵙ ⵅ ⵎⴰⵔⵔⴰ ⵡⵉ ⵢⵓⵄⵍⴰⵏ, ⴰⵇⴰ-ⵜ ⴷ ⴰⵊⴻⴵⵉⴷ ⵅ ⵎⴰⵔⵔⴰ ⵉⵢⵔⴰⴷⴻⵏ ⵉⵎⴻⵥⵢⴰⵏⴻⵏ ⵉⵏⴻⴼⴼⵅⴻⵏ.