ⴰⵢⵓⴱ 33

1 ⵙⴻⵍ ⵍⴻⵅⵅⵓ ⵖⴰⵔ ⵍⵀⴰⵔⴷ ⵉⵏⵓ, ⴰⵢⵓⴱ, ⴻⵡⵛ ⴰⵎⴻⵣⵣⵓⵖ ⵉ ⵡⴰⵡⴰⵍⴻⵏ ⵉⵏⵓ ⵎⴰⵔⵔⴰ. 2 ⵅⵣⴰⵔ, ⴰⵔⵣⵎⴻⵖ ⴰⵇⴻⵎⵎⵓⵎ ⵉⵏⵓ, ⵉⵙⵙⴰⵡⴰⵍ ⵢⵉⵍⴻⵙ ⵉⵏⵓ ⵙⴰⴷⵓ ⵡⴰⵏⴻⵖ ⵉⵏⵓ. 3 ⵜⵜⴻⴼⴼⵖⴻⵏ ⵡⴰⵡⴰⵍⴻⵏ ⵉⵏⵓ ⵣⵉ ⵍⴻⵚⴼⴰⵢⴻⵜ ⵏ ⵡⵓⵍ ⵉⵏⵓ, ⵜⵓⵙⵙⵏⴰ ⵜⴻⵇⵇⵓⵔ ⴰⴷ ⵅⴰⵙ ⵀⴰⵔⵔⴷⴻⵏ ⵉⵢⴻⵏⵛⵉⵛⴻⵏ ⵉⵏⵓ. 4 ⴰⵔⵔⵓⵃ ⵏ ⴰⵔⴻⴱⴱⵉ ⵉⴳⴳⴰ ⴰⵢⵉ, ⴰⵙⵓⴹⵉ ⵏ ⵏⵏⴻⴼⵙ ⵏ ⵓⵎⵣⴻⵎⵎⴰⵔ ⵅ ⴽⵓⵍⵛⵉ ⵉⵡⵛⴰ ⴰⵢⵉ ⵜⵓⴷⴰⵔⵜ. 5 ⵎⴰⵍⴰ ⵜⵣⴻⵎⵎⴰⵔⴻⴷ, ⴰⵔⵔ-ⴷⴷ ⵅⴰⴼⵉ. ⵙⴰⵔⵙ ⴰⵢⵉ ⵜⴰⵎⴻⵙⵍⴰⵛⵜ, ⴱⴻⴷⴷ ⵣⵣⴰⵜⵉ! 6 ⵅⵣⴰⵔ, ⵏⴻⵛⵛ ⴰⵎ ⵛⴻⴽ ⵣⵣⴰⵜ ⵉ ⴰⵔⴻⴱⴱⵉ, ⵓⵍⴰ ⴷ ⵏⴻⵛⵛ ⵜⵜⵡⴰⴳⴳⴻⵖ ⵣⴻⴳ ⵓⴱⴻⴵⴰⵄ. 7 ⵅⵣⴰⵔ, ⴰⵀⵓⴷⴷⵉ ⵉⵏⵓ ⵡⴰⵔ ⵛⴻⴽ ⵉⵙⵙⵉⴳⴳⵯⵉⴷ ⵛⴰ, ⵡⴰⵔ ⵅⴰⴽ ⵜⵜⵣⴻⵢⵢⴰⵔⴻⵖ ⵛⴰ ⴰⵟⵟⴰⵙ. 8 ⵙ ⵜⵉⴷⴻⵜⵜ, ⴰⵇⴰ ⵜⴻⵏⵏⵉⴷ ⵜ ⴷⴻⴳ ⵉⵎⴻⵣⵣⵓⵖⴻⵏ ⵉⵏⵓ, ⵙⵍⵉⵖ ⵉ ⵍⵃⴻⵙⵙ ⵏ ⵡⴰⵡⴰⵍⴻⵏ-ⴰ: 9 ‘ⵏⴻⵛⵛ ⴷ ⴰⵎⴻⵣⴷⴰⴳ, ⴱⵍⴰ ⴷⴷⴻⵏⴱ, ⴷ ⴰⴼⵓⵔⵔⵉ ⵉ ⴵⵉⵖ, ⵡⴰⵔ ⴷⴰⵢⵉ ⵛⴰ ⵏ ⵍⵎⵓⵄⵚⵉⵢⵢⴻⵜ. 10 ⵅⵣⴰⵔ, ⵏⴻⵜⵜⴰ ⵢⴰⵔⴻⵣⵣⵓ ⵙⵙⵉⴱⴱⴻⵜ ⵃⵉⵎⴰ ⴰⴷ ⵣⵣⴰⵢⵉ ⵉⵛⴻⵜⵛⴰ, ⵉⵃⴻⵙⵙⴻⴱ ⴰⵢⵉ ⴷ ⵍⴻⵄⴷⵓ ⵏⵏⴻⵙ. 11 ⵉⴹⴰⵔⴻⵏ ⵉⵏⵓ ⵉⵇⵇⴻⵏ ⵉ-ⵜⴻⵏ ⵖⴰⵔ ⵓⴽⴻⵛⵛⵓⴹ, ⵉⵃⴻⵟⵟⴰ ⵎⴰⵔⵔⴰ ⵉⵎⴻⵙⵔⴰⵇ ⵉⵏⵓ.’ 12 ⵅⵣⴰⵔ, ⴰⴷ ⴰⵛ ⵉⵏⵉⵖ, ⵡⴰⵔ ⵜⴻⴵⵉⴷ ⵛⴰ ⴷ ⴰⵎⵙⴻⴳⴳⴻⴷ ⴷⴻⴳ ⵓⵢⴰ, ⵎⴰⵖⴰⵔ ⴰⵔⴻⴱⴱⵉ ⴷ ⴰⵎⴻⵇⵇⵔⴰⵏ ⵅ ⴱⵏⴰⴷⴻⵎ. 13 ⵎⵉⵏ ⵅⴻⴼ ⴽⵉⴷⴻⵙ ⵜᵉⵜⵜⴻⵎⵄⴰⵔⵔⵉⴷ? ⴰⵇⴰ ⵏⴻⵜⵜⴰ ⵡⴰⵔ ⵉⵜⵜⴻⴳⴳ ⵍⴻⵃⵙⴰⴱ ⵉ ⵎⴰⵔⵔⴰ ⵜⵉⵎⴻⴳⴳⴰ ⵏⵏⴻⵙ! 14 ⵎⴰⵖⴰⵔ ⴰⵔⴻⴱⴱⵉ ⵉⵙⵙⴰⵡⴰⵍ ⵉⵛⵜ ⵏ ⵜⵡⴰⵍⴰ, ⵡⴰⵀ, ⵜⵏⴰⵢⴻⵏ ⵏ ⵜⵡⴰⵍⴰⵡⵉⵏ, ⵎⴰⵛⴰ ⴱⵏⴰⴷⴻⵎ ⵡⴰⵔ ⵉⵃⴻⵟⵟⵉ: 15 ⴷⵉ ⵜⵉⵔⵊⴰ, ⵙ ⵉⵊⵊ ⵏ ⵍⴻⵡⵃⵉⵢ ⴷⵉ ⴵⵉⵍⴻⵜ, ⵅⵎⵉ ⴷⴷ-ⵉⵡⴻⵟⵟⴰ ⵢⵉⴹⴻⵚ ⵢⵓⴵⵖⴻⵏ ⵅ ⵉⵡⴷⴰⵏ, ⴷⴻⴳ ⵓⵏⵓⴷⴻⵎ ⴷⵉ ⵍⴻⵛⵜⵓ. 16 ⵅⴻⵏⵏⵉ ⵢⴰⵔⴻⵣⵣⴻⵎ ⵏⴻⵜⵜⴰ ⴰⵎⴻⵣⵣⵓⵖ ⵏ ⵉⵡⴷⴰⵏ, ⵉⵜⵜⵛⴻⵎⵎⴻⵄ ⵙ ⵓⵛⴻⵎⵎⵉⵄ ⵏⵏⴻⵙ ⵅ ⵓⵡⴻⴷⴷⴻⴱ ⵏⵙⴻⵏ, 17 ⵃⵉⵎⴰ ⴰⴷ ⵉⵙⵙⵃⴻⵢⵢⴻⴷ ⴱⵏⴰⴷⴻⵎ ⵅ ⵜⵎⴻⴳⴳⵉⵜ ⵏⵏⴻⵙ ⵜⴰⵄⴻⴼⴼⴰⵏⵜ, ⵃⵉⵎⴰ ⴰⴷ ⵉⵙⵙⴱⴻⴷⴷ ⵏⵏⴼⴰⵅⴻⵜ ⵅ ⵡⴻⵔⵢⴰⵣ. 18 ⵏⴻⵜⵜⴰ ⵉⵎⴻⵏⵏⴻⵄ ⵍⴻⵄⵎⴰⵔ ⵏⵏⴻⵙ ⵣⵉ ⵜⵓⵔⵚⵓⴹⵉ, ⵜⵓⴷⴰⵔⵜ ⵏⵏⴻⵙ ⵣⴻⴳ ⵓⵀⴻⵍⵍⴻⴽ ⵙ ⵍⴰⵏⵙⴰ. 19 ⵉⵊⴻⵢⵢⴻⵃ ⵉ-ⵜ ⵍⴻⵃⵔⵉⵇ ⴷⵉ ⵇⴰⵎⴰ ⵏⵏⴻⵙ ⵓⵍⴰ ⴷ ⴰⵎⴻⵏⵖⵉ ⵍⴻⴱⴷⴰ ⴷⴻⴳ ⵉⵖⵙⴰⵏ ⵏⵏⴻⵙ. 20 ⵜⵓⴷⴰⵔⵜ ⵏⵏⴻⵙ ⵜⴰⵔⵔⴰ ⵉ-ⵜ ⵉⵜⵜⵄⵉⴼⴼⴰ ⴰⵖⵔⵓⵎ ⵓ ⵍⴻⵄⵎⴰⵔ ⵏⵏⴻⵙ ⵢⴰⵔⵔⴰ ⵉ-ⵜ ⵉⵜⵜⵄⵉⴼⴼⴰ ⵎⴰⵛⵛⴰ ⵉⵚⴻⴱⵃⴻⵏ ⴰⵟⵟⴰⵙ. 21 ⵉⵇⴻⵟⵟⴰ ⵡⴻⵢⵙⵓⵎ ⵏⵏⴻⵙ ⵣⴻⴳ ⵡⵓⴷⴻⵎ ⵏⵏⴻⵙ, ⵉⵅⵙⴰⵏ ⵏⵏⴻⵙ ⵏⵏⵉ ⵡⴰⵔ ⵜⵜⵡⴰⵥⵔⵉⵏ ⵄⴻⵎⵎⴰⵔⵚ, ⴰⵇⴰ ⵜⵜⴱⴰⵏⴻⵏ ⵍⴻⵅⵅⵓ. 22 ⵉⵜⵜⵇⴰⵔⵔⴰⴱ ⵍⴻⵄⵎⴰⵔ ⵏⵏⴻⵙ ⵖⴰⵔ ⵜⵓⵔⵚⵓⴹⵉ, ⵜⵓⴷⴰⵔⵜ ⵏⵏⴻⵙ ⵖⴰⵔ ⵉⵊⴰⵔⵔⴰⵢⴻⵏ ⵏ ⵍⵎⴻⵡⵜ. 23 ⵎⴰⵍⴰ ⵅⴻⵏⵏⵉ ⴷⵉⵏ ⵉⵊⵊ ⵏ ⵍⵎⴰⵍⴰⴽ ⵉⴱⴻⴷⴷ ⴰⵙ-ⴷⴷ ⵖⴰⵔ ⵓⵖⴻⵣⴷⵉⵙ, ⵉⵊⵊ ⵏ ⵍⵄⴰⴷⴻⵍ, ⵉⵊⵊⴻⵏ ⵣⴻⴳ ⵡⴰⵍⴻⴼ, ⵃⵉⵎⴰ ⴰⴷ ⵉⵙⵙⵛⴻⵏ ⵉ ⴱⵏⴰⴷⴻⵎ ⵜⴰⵙⴻⴳⴷⴰ ⵏⵏⴻⵙ, 24 ⵅⴻⵏⵏⵉ ⴰⴷ ⵅⴰⵙ ⵉⵃⵉⵏⵏ, ⴰⴷ ⵢⵉⵏⵉ: ‘ⴼⴻⴽⴽ ⵉ-ⵜ, ⴰⵍⴰⵎⵉ ⵏⴻⵜⵜⴰ ⵡⴰⵔ ⵉⵀⴻⴽⴽⵡⵉ ⵖⴰⵔ ⵜⵓⵔⵚⵓⴹⵉ ⴷⴻⴳ ⵡⴻⵏⴹⴻⵍ, ⴰⵇⴰ ⵏⴻⵛⵛ ⵓⴼⵉⵖ ⴰⵚⵍⴰⵃ ⵅⴰⵙ!’ 25 ⵅⴻⵏⵏⵉ ⴰⴷ ⵜⵏⴻⵄⵏⴻⵄ ⴰⵔⵔⵉⵎⴻⵜ ⵏⵏⴻⵙ ⴽⵜⴰⵔ ⵣⵉ ⵟⵟⵔⵉ ⵏ ⵜⴻⵎⵥⵉ, ⴰⴷ ⴷⴷ-ⵉⴷⵡⴻⵍ ⵖⴰⵔ ⵡⵓⵙⵙⴰⵏ ⵏ ⵜⴻⵎⵥⵉ ⵏⵏⴻⵙ. 26 ⵏⴻⵜⵜⴰ ⴰⴷ ⵉⵜⵜⴰⵔ ⴰⵔⴻⴱⴱⵉ ⵙ ⵜⵓⵜⵔⴰ ⵢⵓⴵⵖⴻⵏ ⵓ ⵏⴻⵜⵜⴰ ⴰⴷ ⵅⴰⵙ ⵢⴰⵔⴹⴰ, ⴰⵍⴰⵎⵉ ⵡⴰⵏⵉⵜⴰ ⴰⴷ ⵉⵥⴰⵔ ⵓⴷⴻⵎ ⵏⵏⴻⵙ ⴷⴻⴳ ⵓⵙⵍⵉⵡⵍⴻⵡ ⵏ ⵍⴻⴼⵔⴰⵃⴻⵜ, ⵓ ⴰⵎⵎⵓ ⵉ ⵖⴰ ⵢⴰⵔⵔ ⵏⴻⵜⵜⴰ ⵉ ⴱⵏⴰⴷⴻⵎ ⵜⴰⵙⴻⴳⴷⴰ ⵏⵏⴻⵙ. 27 ⴰⴷ ⵉⵖⴻⵏⵏⴻⵊ ⵉ ⵢⴻⵡⴷⴰⵏ, ⴰⴷ ⵢⵉⵏⵉ: ‘ⵏⴻⵛⵛ ⵅⴹⵉⵖ, ⵙⵙⴼⴰⵔⵖⴻⵖ ⵎⵉⵏ ⵉⵙⴻⴳⴳⴷⴻⵏ, ⵎⴰⵛⴰ ⵏⴻⵜⵜⴰ ⵡⴰⵔ ⵣⵣⴰⵢⵉ ⵜⵜ ⵢⴻⵅⵍⵉⴼ. 28 ⵉⴼⴻⴽⴽ ⴰⵔⴻⴱⴱⵉ ⵍⴻⵄⵎⴰⵔ ⵉⵏⵓ ⵣⵉ ⵜⵓⵔⵚⵓⴹⵉ ⴷⴻⴳ ⵡⴻⵏⴹⴻⵍ, ⵜⵓⴷⴰⵔⵜ ⵉⵏⵓ ⵜⵅⴻⵣⵣⴰⵔ ⴰⵎⵎⵓ ⴷ ⵡⴰⵎⵎⵓ ⴷⵉ ⵜⴼⴰⵡⵜ.’ 29 ⵅⵣⴰⵔ, ⵎⴰⵔⵔⴰ ⴰⵢⴰ ⵉⵜⵜⴻⴳⴳ ⵉ-ⵜ ⴰⵔⴻⴱⴱⵉ, ⵜⵏⴰⵢⴻⵏ ⵏⵉⵖ ⵜⵍⴰⵜⴰ ⵏ ⵜⵡⴰⵍⴰⵡⵉⵏ ⴰⴽ-ⴷ ⵡⴻⵔⵢⴰⵣ, 30 ⵃⵉⵎⴰ ⴰⴷ ⵉⵙⵙⴻⵄⵇⴻⴱ ⵍⴻⵄⵎⴰⵔ ⵏⵏⴻⵙ ⵣⵉ ⵜⵓⵔⵚⵓⴹⵉ ⴷⴻⴳ ⵡⴻⵏⴹⴻⵍ, ⵃⵉⵎⴰ ⴰⴷ ⵜ ⵢⴰⵔⵔ ⵢⴰⵔⴻⵇⵇ ⵙ ⵜⴼⴰⵡⵜ ⵏ ⵜⵓⴷⴰⵔⵜ. 31 ⵃⴹⴰ, ⴰⵢⵓⴱ! ⵙⴻⵍ-ⴷⴷ ⵖⴰⵔⵉ! ⵙⵇⴰⵔ, ⵅⴻⵏⵏⵉ ⵏⴻⵛⵛ ⴰⴷ ⵙⵙⵉⵡⵍⴻⵖ. 32 ⵎⴰⵍⴰ ⵖⴰⵔⴻⴽ ⴰⵡⴰⵍⴻⵏ ⵡⴻⵊⴷⴻⵏ, ⴰⵔⵔ-ⴷⴷ ⵅⴰⴼⵉ, ⵙⵉⵡⴻⵍ, ⵎⴰⵖⴰⵔ ⵖⴰⵔⵉ ⵙ ⵍⵅⴰⴹⴰⵔ ⴰⴷ ⵅⴰⴽ ⴱⴰⵔⵔⵉⵖ. 33 ⵎⴰⵍⴰ ⵍⵍⴰ, ⵙⴻⵍ-ⴷⴷ ⵖⴰⵔⵉ! ⵙⵇⴰⵔ, ⵓ ⴰⴷ ⴰⵛ ⵙⵙⵖⴰⵔⴻⵖ ⵜⵉⵖⵉⵜ.