ⴰⵢⵓⴱ 28

1 ⵙ ⵜⵉⴷⴻⵜⵜ, ⴰⵇⴰ ⴷⵉⵏ ⴰⵎⵛⴰⵏ ⵎⴰⵏⵉ ⵜᵉⵜⵜⵡⴰⴼ ⵏⵏⵓⵇⴰⵔⵜ, ⵓⵍⴰ ⴷⵉⵏ ⴰⵎⵛⴰⵏ ⵉ ⵡⵓⵔⴻⵖ ⵎⴰⵏⵉ ⵜ ⵙⵙⵉⵣⴷⵉⴳⴻⵏ. 2 ⵓⵣⵣⴰⵍ ⵜⵜⴰⵡⵢⴻⵏ ⵜ-ⵉ-ⴷⴷ ⵣⴻⴳ ⵓⵛⴰⵍ ⵓ ⵣⴻⴳ ⵡⴻⵥⵔⵓ ⵙⵙⴼⴻⵙⵙⵢⴻⵏ ⵏⵏⵃⴰⵙ. 3 ⵉⴳⴳⴰ ⴱⵏⴰⴷⴻⵎ ⵇⴻⵟⵟⵓ ⵉ ⵜⴰⴵⴻⵙⵜ, ⵏⴻⵜⵜⴰ ⵢⴰⵔⴻⵣⵣⵓ ⴷⵉ ⵎⴽⵓⵍ ⴰⵎⵛⴰⵏ ⵎⴰⵏⵉ ⵎⴰ, ⵅ ⵡⴻⵥⵔⵓ ⵉ ⴷⴷ-ⵉⵜⵜⴻⴼⴼⵖⴻⵏ ⵣⵉ ⵜⵓⴱⴱⴰⵔⵛⴻⵏⵜ ⴷ ⵜⵉⵍⵉ ⵏ ⵍⵎⴻⵡⵜ. 4 ⵢⴰⵔⵣⴻⵎ ⵉⵊⵊ ⵏ ⵡⴻⵅⵊⵉⴹ ⴱⵍⴰ ⵉ ⵖⴰ ⵢⵉⵍⵉ ⵃⴻⴷ ⴰⴽⵉⴷⴻⵙ. ⵜⵜⵡⴰⵜⵜⵓⵏ ⵣⴻⴳ ⵉⴹⴰⵔⴻⵏ ⵏ ⵢⵉⵏⵏⵉ ⵙⴻⵏⵏⴻⵊ ⵏⵙⴻⵏ, ⵓⵢⵍⴻⵏ ⵜⵜⵔⴰⵃⴻⵏ ⵜⴰⵙⴻⵏ-ⴷⴷ ⴱⵍⴰ ⵉ ⵖⴰ ⵢⴰⵔⵔⴰ ⴰⵙⴻⵏ-ⴷⴷ ⵃⴻⴷ ⵍⴱⴰⵍ. 5 ⵉⵜⵜⴻⴼⴼⴻⵖ-ⴷⴷ ⵡⴻⵖⵔⵓⵎ ⵣⵉ ⵜⴻⵎⵎⵓⵔⵜ, ⴰⵎ ⵙⵡⴰⴷⴷⴰⵢ ⵏⵏⴻⵙ ⵎⴰⵔⵔⴰ ⴰⵅⵎⵉ ⵙ ⵜⵎⴻⵙⵙⵉ ⵉⵏⵏⴻⵇⵍⴻⴱ. 6 ⵉⵥⵔⴰ ⵏⵏⴻⵙ ⴷ ⴰⵎⵛⴰⵏ ⵎⴰⵏⵉ ⵜⵜⴰⴼⴻⵏ ⵚⴰⴼⴼⵉⵔ, ⴷⴰⵢⴻⵙ ⵉ ⵜⴻⴵⴰ ⵓⵍⴰ ⴷ ⵜⴰⵄⴻⵊⵊⴰⵛⵜ ⵏ ⵡⵓⵔⴻⵖ. 7 ⴰⵊⴹⵉⴹ ⵉⵜⵜⴽⴻⵛⵛⴰⴹⴻⵏ ⵡⴰⵔ ⵉⵙⵙⵉⵏ ⴰⵎⴻⵙⵔⵓⵇ ⵉ ⵖⴰⵔⴻⵙ ⵉⴵⴰⵏ, ⵜⵉⵟⵟ ⵏ ⵓⵊⴹⵉⴷ ⴰⵎⴻⵙⵙⵖⵓⵢ ⴰⵎⵓⵇⴹⵉⵄ ⵏ ⵜⵉⵟⵟⴰⵡⵉⵏ ⵄⴻⵎⵎⴰⵔⵚ ⵡⴰⵔ ⵜ ⵜⴻⵃⴹⵉ. 8 ⵉⵢⵔⴰⴷⴻⵏ ⵉⵎⴻⵥⵢⴰⵏⴻⵏ ⵉⵏⴻⴼⴼⵅⴻⵏ ⵡⴰⵔ ⴷⴰⵢⴻⵙ ⵓⵢⵓⵔⴻⵏ, ⵓⵍⴰ ⴷ ⴰⵢⵔⴰⴷ ⵉⵣⴻⵀⵀⴰⵔⴻⵏ ⵡⴰⵔ ⵜ ⵉⵜⵜⵛⵓⵇⵉ. 9 ⵎⴰⵛⴰ ⴱⵏⴰⴷⴻⵎ ⵉⵙⴰⵔⵔⴻⵃ ⴰⴼⵓⵙ ⵏⵏⴻⵙ ⵖⴰⵔ ⵙⵙⴻⴵⴰⵃ ⵉⵇⴻⵙⵃⴻⵏ, ⵉⵙⵙⵏⴻⵇⵍⴰⴱ ⵉⴷⵓⵔⴰⵔ ⴽⵓⵍⵛⵉ. 10 ⴷⵉ ⵍⴻⵊⵔⵓⴼ ⵉⵇⵇⴰⵣ ⵉⵖⴻⵣⵔⴰⵏ, ⵜⵉⵟⵟ ⵏⵏⴻⵙ ⵜᵉⵜⵜⵡⴰⵍⴰ ⵎⴰⵔⵔⴰ ⵎⵉⵏ ⵉⵖⵍⴰⵏ. 11 ⵉⵃⴻⵡⵡⴻⵇ ⵉ ⵉⵖⴻⵣⵔⴰⵏ ⴰⵍⴰⵎⵉ ⴰⵎⴰⵏ ⵡⴰⵔ ⵇⵇⵉⵎⴻⵏ ⵜⵜⴻⴼⴼⵖⴻⵏ-ⴷⴷ, ⵎⵉⵏ ⴷⴰⵢⴻⵙ ⵉⵏⵓⴼⴼⴰⵔⴻⵏ ⵉⵜⵜⴰⵡⵢⵉ ⵜ-ⵉ-ⴷⴷ ⵖⴰⵔ ⵜⴼⴰⵡⵜ. 12 ⵜⵉⵖⵉⵜ ⵎⴰⵛⴰ, ⵎⴰⵏⵉ ⵜᵉⵜⵜⵡⴰⴼ? ⵓ ⵎⴰⵏⵉ ⵜⴻⴵⴰ ⵜⵣⴻⴷⴷⵉⵖⵜ ⵏ ⵍⴻⴼⵀⴰⵎⴻⵜ? 13 ⴱⵏⴰⴷⴻⵎ ⵡⴰⵔ ⵉⵙⵙⵉⵏ ⵍⵇⵉⵎⴻⵜ ⵏⵏⴻⵙ, ⵡⴰⵔ ⵜᵉⵜⵜⵡⵉⴼ ⵜⵉⵖⵉⵜ ⴷⵉ ⵜⴻⵎⵎⵓⵔⵜ ⵏ ⵢⵉⵏⵏⵉ ⵉⴷⴷⴰⵔⴻⵏ. 14 ⴰⵎⴰⵏ ⵉⵀⴻⵡⵍⴻⵏ ⵇⵇⴰⵔⴻⵏ: ‘ⴷⴰⵢⵏⴻⵖ ⵡⴰⵔ ⵜⴻⴵⵉ ⵛⴰ!’, ⵍⴻⴱⵃⴰⵔ ⵉⵇⵇⴰⵔ: ‘ⵖⴰⵔⵉ ⵡⴰⵔ ⴷⴰ ⵜⴻⴵⵉ ⵛⴰ!’ 15 ⵡⴰⵔ ⵉⵣⴻⵎⵎⴰⵔ ⴰⴷ ⵉⵎⵎⴻⵡⵛ ⵡⵓⵔⴻⵖ ⵉⵇⵇⵓⵔⴻⵏ ⴷⴻⴳ ⵡⴻⵎⵛⴰⵏ ⵏⵏⴻⵙ, ⵙⵙⵓⵎ ⵏⵏⴻⵙ ⵡⴰⵔ ⵣⴻⵎⵎⴰⵔⴻⵏ ⴰⴷ ⵜ ⵡⴻⵣⵏⴻⵏ ⵙ ⵏⵏⵓⵇⴰⵔⵜ. 16 ⵡⴰⵔ ⵣⴻⵎⵎⴰⵔⴻⵏ ⴰⴷ ⵡⴻⵣⵏⴻⵏ ⵙⵙⵓⵎ ⵏⵏⴻⵙ ⵙ ⵡⵓⵔⴻⵖ ⵉⵖⵍⴰⵏ ⵣⵉ ⵓⴼⵉⵔ, ⵙ ⵡⴻⵥⵔⵓ ⵏ ⵓⵏⵉⴽⵙ ⵉⵖⵍⴰⵏ ⴷ ⵚⴰⴼⴼⵉⵔ ⴰⵣⵉⵣⴰ. 17 ⵡⴰⵔ ⵣⴻⵎⵎⴰⵔⴻⵏ ⴰⴷ ⵎⵎⵇⵓⴷⴷⴰⵏ ⵍⵇⵉⵎⴻⵜ ⵏⵏⴻⵙ ⴰⴽ-ⴷ ⵡⵓⵔⴻⵖ ⵏⵉⵖ ⴽⵔⵉⵙⵜⴰⵍ, ⵏⵉⵖ ⴰⴷ ⵜⵜ ⴱⴻⴷⴷⵍⴻⵏ ⵙ ⵉⵛⵜ ⵏ ⵍⵇⴻⵛⵄⴻⵜ ⵏ ⵡⵓⵔⴻⵖ ⵉⵜⵜⵡⴰⵚⴻⴼⴼⴰⵏ. 18 ⵡⴰⵔ ⵜⵜⴻⵄⵇⵉⵍⴻⵏ ⵄⴰⴷ ⵅ ⵜⵢⴰⵇⵓⵜⵉⵏ ⴷ ⵡⴻⵥⵔⵓ ⵏ ⵓⴽⵔⵉⵙⵜⴰⵍ, ⵎⴰⵖⴰⵔ ⵜⵡⴰⴼⵉⵜ ⵏ ⵜⵉⵖⵉⵜ ⵜⵓⵄⵄⵍⴰ ⵅ ⵜⵡⴰⴼⵉⵜ ⵏ ⵍⵎⴰⵔⵊⴰⵏ. 19 ⵍⴻⵄⵇⵉⵇ ⴰⵣⴻⴳⴳⵡⴰⵖ ⵣⵉ ⴽⵓⵛ ⵡⴰⵔ ⴷⴰⵢⴻⵙ ⵢⴰⵔⵡⵉⵙ, ⵡⴰⵔ ⵜⵣⴻⵎⵎⴰⵔ ⴰⴷ ⵜᵉⵜⵜⵡⴰⵡⵣⴻⵏ ⵜⵉⵖⵉⵜ ⵙ ⵡⵓⵔⴻⵖ ⵉⵚⴼⴰⵏ ⵉⵖⵍⴰⵏ. 20 ⵎⴰⵏⵉⵙ ⴷⴷ-ⵜⵓⵙⴰ ⵅⴻⵏⵏⵉ ⵜⵉⵖⵉⵜ ⵓ ⵎⴰⵏⵉ ⵜⴻⴵⴰ ⵜⵣⴻⴷⴷⵉⵖⵜ ⵏ ⵍⴻⴼⵀⴰⵎⴻⵜ? 21 ⴰⵇⴰ-ⵜⵜ ⵜⵏⵓⴼⴼⴰⵔ ⵅ ⵜⵉⵟⵟⴰⵡⵉⵏ ⵏ ⵎⴰⵔⵔⴰ ⵎⵉⵏ ⵉⴷⴷⴰⵔⴻⵏ, ⵜᵉⵜⵜⵡⴰⵍⴻⵃⵃⴻⴼ ⵅ ⵉⵊⴹⴰⴹ ⵏ ⵓⵊⴻⵏⵏⴰ. 22 ⴰⵀⴻⵍⵍⴻⴽ ⴷ ⵍⵎⴻⵡⵜ ⵇⵇⴰⵔⴻⵏ: ‘ⵙ ⵉⵎⴻⵣⵣⵓⵖⴻⵏ ⵏⵏⴻⵖ ⵏⴻⵙⵍⴰ ⵅⴰⵙ ⵍⴻⵅⴱⴰⵔ!’ 23 ⴰⵔⴻⴱⴱⵉ ⵉⴼⴻⵀⵀⴻⵎ ⴰⴱⵔⵉⴷ ⵏⵏⴻⵙ, ⵏⴻⵜⵜⴰ ⵉⵙⵙⴻⵏ ⵜⴰⵣⴻⴷⴷⵉⵖⵜ ⵏⵏⴻⵙ, 24 ⵎⴰⵖⴰⵔ ⵉⵜⵜⵡⴰⵍⴰ ⴰⵍ ⵜⵉⵏⴻⴳⴳⵓⵔⴰ ⵏ ⵜⴻⵎⵎⵓⵔⵜ, ⵉⵥⴰⵔⵔ ⵎⴰⵔⵔⴰ ⵎⵉⵏ ⵉⴵⴰⵏ ⵙⴰⴷⵓ ⵉⵊⴻⵏⵡⴰⵏ. 25 ⵓⵎⵉ ⵉⴳⴳⴰ ⵉ ⵓⵙⴻⵎⵎⵉⴹ ⵊⵊⴻⵀⴷ ⵏⵏⴻⵙ, ⵓⵎⵉ ⵉⵄⴱⴰⵔ ⵍⴻⵄⴱⴰⵔ ⵏ ⵡⴰⵎⴰⵏ, 26 ⵓⵎⵉ ⵉⴳⴳⴰ ⵉ ⵡⴻⵏⵥⴰⵔ ⵇⴻⵟⵟⵓ, ⵉⵊⵊ ⵏ ⵡⴻⴱⵔⵉⴷ ⵉ ⵡⴰⵙⵙⴰⵎ ⵏ ⵡⴰⵊⵊⴰⵊⴻⵏ, 27 ⵅⴻⵏⵏⵉ ⵉⵥⵔⴰ ⵉ-ⵜⵜ, ⵉⵙⵙⴰⵔⴳⴻⴱ ⵉ-ⵜⵜ, ⵓⵛⴰ ⵉⵙⵙⴱⴻⴷⴷ ⵉ-ⵜⵜ ⴷⴻⴳ ⵡⴻⵎⵛⴰⵏ ⵏⵏⴻⵙ ⵓⵛⴰ ⵉⴱⴻⵇⵇⴻⵛ ⴷⴰⵢⴻⵙ, 28 ⵓⵛⴰ ⵉⵏⵏⴰ ⵉ ⴱⵏⴰⴷⴻⵎ: ‘ⵅⵣⴰⵔ, ⵜⵉⴳⴳⵯⵓⴷⵉ ⵣⵉ ⵙⵉⴷⵉ ⴷ ⵜⵉⵖⵉⵜ, ⴰⴱⴻⵄⵄⴻⴷ ⵅ ⵎⵉⵏ ⵉⴵⴰⵏ ⴷ ⴰⵄⴻⴼⴼⴰⵏ, ⴷ ⵍⴻⴼⵀⴰⵎⴻⵜ.’