ⴰⵢⵓⴱ 23

1 ⵢⴰⵔⵔⴰ-ⴷⴷ ⴰⵢⵓⴱ, ⵉⵏⵏⴰ: 2 ⵓⵍⴰ ⴷ ⴰⵙⵙ-ⴰ ⴰⵛⴻⵜⵛⵉ ⵉⵏⵓ ⴷ ⴰⵖⴻⵏⵏⴰⵏ, ⵉⵙⵙⴻⴷⵇⴻⵍ ⴰⴼⵓⵙ ⵉⵏⵓ ⵅ ⵓⵏⴻⴼⴼⴻⵙ ⵉⵏⵓ. 3 ⵎⵍⵉ ⵙⵙⵏⴻⵖ, ⵎⴰⵏⵉ ⵣⴻⵎⵎⴰⵔⴻⵖ ⴰⴷ ⵜ ⴰⴼⴻⵖ, ⵎⴰⵃⴻⵏⴷ ⴰⴷ ⴰⵡⴹⴻⵖ ⵖⴰⵔ ⵜⵣⴻⴷⴷⵉⵖⵜ ⵏⵏⴻⵙ. 4 ⵅⴻⵏⵏⵉ ⴰⴷ ⴱⴻⵣⵣⵄⴻⵖ ⵣⵣⴰⵜⴻⵙ ⴷⴷⴻⵄⵡⴻⵜ, ⴰⴷ ⵛⵛⵓⵔⴻⵖ ⴰⵇⴻⵎⵎⵓⵎ ⵉⵏⵓ ⵙ ⵡⴰⵡⴰⵍⴻⵏ ⵉ ⵓⵛⴰⵔⵔⴻⵄ. 5 ⴰⴷ ⵙⵙⵏⴻⵖ ⴰⵡⴰⵍⴻⵏ ⵉ ⵅⴰⴼⵉ ⴷⴷ ⵖⴰ ⵢⴰⵔⵔ, ⴰⴷ ⴼⴻⵀⵎⴻⵖ ⵎⵉⵏ ⵉ ⴷ ⴰⵢⵉ ⵖⴰ ⵢⵉⵏⵉ. 6 ⵎⴰ ⵉⵜⵜⵅⴻⵚⵚⴰ ⴰⵙ ⴰⴷ ⵉⵎⵛⴰⵔⵔⴻⵄ ⴰⴽⵉⴷⵉ ⵙ ⵊⵊⵀⴻⴷ ⴰⵎⴻⵇⵇⵔⴰⵏ? ⵍⵍⴰ, ⴻⵊⵊ ⵉ-ⵜ ⴰⴷ ⴰⵢⵉ ⵉⵡⵛ ⵜⴰⵢⵏⵉⵜ ⵡⴰⵀⴰ. 7 ⴷⵉⵏⵏⵉ ⴰⴷ ⴽⵉⴷⴻⵙ ⵉⵎⵛⴰⵔⵔⴻⵄ ⵡⴻⵏⵏⵉ ⵉⵛⵏⴰⵏ ⵓ ⴰⵎⵎⵓ ⵏⴻⵛⵛ ⴰⴷ ⵏⵏⵓⴼⵙⵍⴻⵖ ⵉ ⵍⴻⴱⴷⴰ ⵣⵉ ⵍⵇⴰⴹⵉ ⵉⵏⵓ. 8 ⵎⴰⵛⴰ ⵅⵣⴰⵔ, ⵎⴰⵍⴰ ⵓⵢⵓⵔⴻⵖ ⵖⴰⵔ ⵛⵛⴰⵔⵇ, ⴰⵎⵎⵓ ⵡⴰⵔ ⴷⵉⵏ ⵉⴵⵉ ⵏⴻⵜⵜⴰ, ⵓ ⵎⴰⵍⴰ ⵓⵢⵓⵔⴻⵖ ⵖⴰⵔ ⵍⵖⴰⵔⴱ, ⴰⵎⵎⵓ ⵡⴰⵔ ⴷ ⴰⵙ ⵜⵜⵃⴻⴽⴽⴰⵔⴻⵖ. 9 ⵎⴰⵍⴰ ⵖⴰⵔⴻⵙ ⵛⵖⴻⵍ ⴷⵉ ⵛⵛⴰⵎⴰⵍ, ⵡⴰⵔ ⵜ ⵜⵜⵡⵉⵍⵉⵖ, ⵎⴰⵍⴰ ⵉⵏⵏⴻⵇⵍⴻⴱ-ⴷⴷ ⵖⴰⵔ ⵍⵊⴰⵏⵓⴱ, ⵡⴰⵔ ⵜ ⵥⴰⵔⵔⴻⵖ. 10 ⵎⴰⵛⴰ ⵏⴻⵜⵜⴰ ⵉⵙⵙⴻⵏ ⴰⴱⵔⵉⴷ ⵉ ⴳⴳⵓⵔⴻⵖ, ⵉⵜⵜⵇⴻⴵⴻⴱ ⴰⵢⵉ, ⴰⴷ ⴼⴼⵖⴻⵖ ⴰⵎ ⵡⵓⵔⴻⵖ. 11 ⵉⵎⵏⴻⵄ ⵓⴹⴰⵔ ⵉⵏⵓ ⴷⵉ ⵊⵊⵓⵔⵔⴰⵜ ⵏⵏⴻⵙ, ⴰⴱⵔⵉⴷ ⵏⵏⴻⵙ ⴹⴼⴰⵔⴻⵖ ⵜ, ⵡⴰⵔ ⵣⵣⴰⵢⴻⵙ ⴼⴼⵉⵖⴻⵖ. 12 ⵜⴰⵡⵚⵉⵢⵢⴻⵜ ⵣⴻⴳ ⵓⵇⴻⵎⵎⵓⵎ ⵏⵏⴻⵙ ⵡⴰⵔ ⵣⵣⴰⵢⴻⵙ ⴰⵔⵅⵓⵖ. ⴰⵡⴰⵍⴻⵏ ⵏ ⵓⵇⴻⵎⵎⵓⵎ ⵏⵏⴻⵙ ⵅⴻⵎⵎⵍⴻⵖ ⵜⴻⵏ, ⵎⴰⵀⵓ ⵎⵉⵏ ⵅⴻⴼ ⵜⵜⵡⴰⵡⴻⵚⵚⵉⵖ. 13 ⵎⴰⵛⴰ ⵎⴰⵍⴰ ⵏⴻⵜⵜⴰ ⴹⵉⴷⴷ ⵏ ⵛⴰ ⵏ ⵢⵉⵊⵊⴻⵏ, ⵎⴰⵏ ⵡⴻⵏ ⵉ ⵜ ⵖⴰ ⵉⵎⴻⵏⵄⴻⵏ ⵣⵉ ⵎⴰⵏ ⴰⵢⴰ? ⵎⵉⵏ ⵉⵅⵙ ⵍⴻⵄⵎⴰⵔ ⵏⵏⴻⵙ, ⴰⴷ ⵜ ⵢⴻⴳⴳ. 14 ⵎⴰⵖⴰⵔ ⵏⴻⵜⵜⴰ ⵉⵙⵙⴻⵇⴼⴰⵍ ⵎⵉⵏ ⵉ ⴷ ⴰⵢⵉ ⵢⵓⵔⴰ, ⵓ ⴰⵇⴰ ⴷⵉⵏ ⴰⵟⵟⴰⵙ ⵏ ⵜⵎⴻⵙⵍⴰⵢⵉⵏ ⴰⵎ ⵜⵉⵏⴰ ⵖⴰⵔⴻⵙ ⴷⵉ ⵍⴱⴰⵍ. 15 ⵅ ⵓⵢⴰ ⵜⵜⵏⴻⵅⵍⴰⵄⴻⵖ ⵣⵣⴰⵜ ⵉ ⵓⵖⴻⵎⴱⵓⴱ ⵏⵏⴻⵙ, ⴰⵇⴰ ⴼⴻⵀⵎⴻⵖ ⵜⵜ ⵎⵍⵉⵃ, ⵓ ⵜⵜⴻⴳⴳⵯⴻⴷⴻⵖ ⵣⵣⴰⵢⴻⵙ. 16 ⵎⴰⵖⴰⵔ ⴰⵔⴻⴱⴱⵉ ⵉⵙⵙⴻⴼⵛⵉⵍ ⵓⵍ ⵉⵏⵓ, ⴰⵎⵣⴻⵎⵎⴰⵔ ⵅ ⴽⵓⵍⵛⵉ ⵉⵙⵙⵏⴻⵅⵍⴰⵄ ⴰⵢⵉ. 17 ⵎⴰⵖⴰⵔ ⵡⴰⵔ ⵜⵜⵏⴻⵅⵍⵉⵄⴻⵖ ⵣⵉ ⵜⴰⴵⴻⵙⵜ, ⵓⵍⴰ ⵣⴻⴳ ⵡⵓⴷⴻⵎ ⵉⵏⵓ ⵏⵏⵉ ⵉⵜⵜⵍⴻⵃⵃⴻⴼ ⵙ ⵜⵓⴱⴱⴰⵔⵛⴻⵏⵜ.