ⴰⵎⴻⵥⵡⴰⵔⵓ 4

1 ⵉⵙⵙⴻⵏ ⴰⴷⴰⵎ ⵃⴰⵡⵡⴰ, ⵜⴰⵎⵖⴰⵔⵜ ⵏⵏⴻⵙ, ⵓⵛⴰ ⵜⴻⵢⵙⵉ ⵙ ⴷⴷⴻⵢⵙⴻⵜ ⵓⵛⴰ ⵜⵓⵔⵓⵡ-ⴷⴷ ⵇⴰⵢⵉⵏ, ⵜⴻⵏⵏⴰ “ⵊⵊⵉⵖ-ⴷⴷ ⴰⵔⵢⴰⵣ, ⴷ ⵙⵉⴷⵉ!" 2 ⵅⴻⵏⵏⵉ ⵄⴰⵡⴻⴷ ⵜⵓⵔⵓⵡ-ⴷⴷ ⵓⵎⴰⵙ ⵀⴰⴱⵉⵍ. ⵜⵓⵖⴰ ⵀⴰⴱⵉⵍ ⴷ ⴰⵎⴻⴽⵙⴰⵡ ⵏ ⵡⵓⴵⵉ ⵓ ⵇⴰⵢⵉⵏ ⵉⵔⵓⵃ ⵉⵅⴻⴷⴷⴻⵎ ⵜⴰⵎⵎⵓⵔⵜ. 3 ⵓⵛⴰ ⴰⵡⴰⵔⵏⵉ ⵓⵙⵙⴰⵏ ⵉⵎⵙⴰⵔ ⴱⴻⵍⵍⵉ ⵇⴰⵢⵉⵏ ⵉⵇⴻⴷⴷⴻⵎ ⵉⵛⵜ ⵏ ⵜⴻⵡⵀⵉⴱⵜ ⵣⵉ ⵍⵖⵉⴵⴻⵜ ⵏ ⵡⵓⴷⴻⵎ ⵏ ⵜⴻⵎⵎⵓⵔⵜ ⵉ ⵙⵉⴷⵉ. 4 ⵉⵇⴻⴷⴷⴻⵎ ⵀⴰⴱⵉⵍ ⵄⴰⵡⴻⴷ ⵉⵛⵜ ⵏ ⵜⴻⵡⵀⵉⴱⵜ ⵣⴻⴳ ⵉⵎⴻⵏⵣⴰ ⵏ ⵡⵓⴵⵉ ⵏⵏⴻⵙ, ⵣⴻⴳ ⵉⵏⵏⵉ ⵖⴰⵔ ⵉⴵⴰ ⵜⴰⴷⵓⵏⵜ ⴰⵟⵟⴰⵙ. ⵉⵅⵣⴰⵔ ⵙⵉⴷⵉ ⵖⴰⵔ ⵀⴰⴱⵉⵍ ⴷ ⵜⴻⵡⵀⵉⴱⵜ ⵏⵏⴻⵙ, 5 ⵎⴰⵛⴰ ⵖⴰⵔ ⵇⴰⵢⵉⵏ ⴷ ⵜⴻⵡⵀⵉⴱⵜ ⵏⵏⴻⵙ ⵡⴰⵔ ⴷ ⴰⵙ ⵢⴰⵔⵔⵉ ⵛⴰ ⵜⴰⵢⵏⵉⵜ. ⵓⵛⴰ ⵉⵅⴻⵢⵢⴻⵇ ⵇⴰⵢⵉⵏ ⴰⵟⵟⴰⵙ, ⵉⵏⵏⴻⵇⵍⴻⴱ ⴰⵙ ⵓⵖⴻⵎⴱⵓⴱ. 6 ⵉⵏⵏⴰ ⵙⵉⴷⵉ ⵉ ⵇⴰⵢⵉⵏ: “ⵎⴰⵢⴻⵎⵎⵉ ⵜⵅⴻⵢⵢⵇⴻⴷ? ⵎⴰⵢⴻⵎⵎⵉ ⴷ ⴰⵛ ⵉⵏⵏⴻⵇⵍⴻⴱ ⵓⵖⴻⵎⴱⵓⴱ? 7 ⵎⴰⵍⴰ ⵜⴻⴳⴳⵉⴷ ⵎⵍⵉⵃ, ⵎⴰ ⵡⴰⵔ ⴷⵉⵏ ⵉⵜⵜⵉⵍⵉ ⵓⵙⴳⴻⵄⵄⴻⴷ, ⵓ ⵎⴰⵍⴰ ⵡⴰⵔ ⵜⴻⴳⴳⵉⴷ ⵎⵍⵉⵃ, ⴷⴷⴻⵏⴱ ⴰⵇⴰ-ⵜ ⵉⵣⵣⴻⵍ ⵖⴰⵔ ⵜⴻⵡⵡⴰⵔⵜ? ⵎⴻⵥⵔⵉ ⵏⵏⴻⵙ ⵖⴰⵔⴻⴽ, ⵎⴰⵛⴰ ⵉⵜⵜⵅⴻⵚⵚⴰ ⵛⴻⴽ ⴰⴷ ⵅⴰⵙ ⵜⵙⴻⴵⴹⴻⴷ." 8 ⵉⵙⵙⵉⵡⴻⵍ ⵇⴰⵢⵉⵏ ⴰⴽ-ⴷ ⵀⴰⴱⵉⵍ ⵓⵎⴰⵙ. ⵓⵛⴰ ⵉⵎⵙⴰⵔ ⴰⵎ ⴵⴰⵏ ⵏⵉⵜⵏⵉ ⴷⴻⴳ ⵉⵢⵢⴰⵔ, ⴱⴻⵍⵍⵉ ⵇⴰⵢⵉⵏ ⵉⴽⴽⴰⵔ ⵖⴰⵔ ⵓⵎⴰⵙ ⵀⴰⴱⵉⵍ ⵓⵛⴰ ⵉⵏⵖⴰ ⵉ-ⵜ. 9 ⵅⴻⵏⵏⵉ ⵉⵏⵏⴰ ⵙⵉⴷⵉ ⵉ ⵇⴰⵢⵉⵏ: “ⵎⴰⵏⵉ ⵉⴵⴰ ⵓⵎⴰⵛ ⵀⴰⴱⵉⵍ?” ⵉⵏⵏⴰ: “ⵡⴰⵔ ⵙⵙⵉⵏⴻⵖ. ⵎⴰ ⵏⴻⵛⵛ ⴷ ⴰⵎⴻⵃⴹⴰⵢ ⵅ ⵓⵎⴰ?" 10 ⵓⵛⴰ ⵉⵏⵏⴰ ⵏⴻⵜⵜⴰ: “ⵎⵉⵏ ⵜⴻⴳⴳⵉⴷ? ⴰⵇⴰ ⵜⵎⵉⵊⵊⴰ ⵏ ⵉⴷⴰⵎⵎⴻⵏ ⵏ ⵓⵎⴰⵛ ⵙⵖⵓⵢⵢⵓⵏ-ⴷⴷ ⵖⴰⵔⵉ ⵣⵉ ⵜⴻⵎⵎⵓⵔⵜ. 11 ⵍⴻⵅⵅⵓ, ⴰⵇⴰ ⵛⴻⴽ ⴷ ⵎⴻⵏⵄⵓⵍ ⵣⵉ ⵜⴻⵎⵎⵓⵔⵜ, ⵜⴻⵏⵏⵉ ⵢⴰⵔⴻⵣⵎⴻⵏ ⴰⵇⴻⵎⵎⵓⵎ ⵏⵏⴻⵙ, ⵃⵉⵎⴰ ⴰⴷ ⵜⴻⵇⴱⴻⵍ ⵉⴷⴰⵎⵎⴻⵏ ⵏ ⵓⵎⴰⵛ ⵣⴻⴳ ⵉⴼⴰⵙⵙⴻⵏ ⵏⵏⴻⵛ. 12 ⵅⵎⵉ ⵖⴰ ⵜⵅⴻⴷⵎⴻⴷ ⵅ ⵜⴻⵎⵎⵓⵔⵜ, ⵡⴰⵔ ⵜⵜᵉⴷⵉⴽⴽⵯⵉⵍ ⴰⴷ ⴰⵛ ⵜⴻⵡⵛ ⵎⴰⵔⵔⴰ ⵊⵊⴻⵀⴷ ⵏⵏⴻⵙ ⵓⵛⴰ ⵛⴻⴽ ⴰⴷ ⵜⵉⵍⵉⴷ ⴷ ⴰⵎⴻⵏⵏⴻⵊⵔⵓ ⴷ ⴰⵎⴻⵜⵍⵓⵄ ⴷⵉ ⵜⴻⵎⵎⵓⵔⵜ." 13 ⵅⴻⵏⵏⵉ ⵉⵏⵏⴰ ⵇⴰⵢⵉⵏ ⵉ ⵙⵉⴷⵉ: “ⵍⵄⵉⵇⴰⴱ ⵉⵏⵓ ⵉⵎⵖⴰⵔ ⴰⵟⵟⴰⵙ ⵅ ⵜⵣⴻⵎⵎⴰⵔ ⵉⵏⵓ. 14 ⴰⵇⴰ ⵛⴻⴽ ⴰⵙⵙ-ⴰ ⵜⵓⵥⵥⵍⴻⴷ ⵅⴰⴼⵉ ⵣⴻⴳ ⵓⵖⴻⵎⴱⵓⴱ ⵏ ⵜⴻⵎⵎⵓⵔⵜ-ⴰ ⵓⵛⴰ ⵣⴻⴳ ⵓⵖⴻⵎⴱⵓⴱ ⵏⵏⴻⵛ ⴰⴷ ⵜⵜⵡⴰⴼⴼⴰⵔⴻ. ⴰⴷ ⵉⵍⵉⵖ ⴷ ⴰⵎⴻⵏⵏⴻⵊⵔⵓ ⴷ ⴰⵎⴻⵜⵍⵓⵄ ⴷⵉ ⵜⴻⵎⵎⵓⵔⵜ ⵓⵛⴰ ⴰⴷ ⵢⵉⵍⵉ ⵎⴰⵔⵔⴰ ⵡⴻⵏⵏⵉ ⴷ ⴰⵢⵉ ⵖⴰ ⵢⴰⴼⴻⵏ ⴰⴷ ⴰⵢⵉ ⵉⵏⴻⵖ." 15 ⵅⴻⵏⵏⵉ ⵉⵏⵏⴰ ⴰⵙ ⵙⵉⴷⵉ: “ⵙ ⵓⵢⴰ ⵎⴰⵔⵔⴰ ⵡⴻⵏⵏⵉ ⵉ ⵖⴰ ⵉⵏⵖⴻⵏ ⵇⴰⵢⵉⵏ, ⴰⴷ ⵣⵣⴰⵢⴻⵙ ⵅⴻⵍⴼⴻⵏ ⵙⴻⴱⵄⴰ ⵏ ⵜⵡⴰⵍⴰⵡⵉⵏ.” ⵓⵛⴰ ⵉⴳⴳⴰ ⵙⵉⴷⵉ ⵍⴻⵄⵍⴰⵎⴻⵜ ⵉ ⵇⴰⵢⵉⵏ ⴱⴻⵍⵍⵉ ⵎⴰⵔⵔⴰ ⵡⴻⵏⵏⵉ ⵜ ⵖⴰ ⵢⴰⴼⴻⵏ ⵡⴰⵔ ⵜ ⵉⵏⴻⵇⵇ. ⵜⴰⵔⵡⴰ ⵏ ⵇⴰⵢⴻⵏ 16 ⵅⴻⵏⵏⵉ ⵉⴼⴼⴻⵖ-ⴷⴷ ⵇⴰⵢⵉⵏ ⵣⴻⴳ ⵡⵓⴷⴻⵎ ⵏ ⵙⵉⴷⵉ ⵓⵛⴰ ⵉⵔⵓⵃ ⵉⵣⴻⴷⴷⴻⵖ ⴷⵉ ⵜⴻⵎⵎⵓⵔⵜ ⵏ ⵏⵓⴷ, ⵛⵛⴰⵔⵇ ⵏ ⵄⴰⴷⵏ. 17 ⵉⵙⵙⴻⵏ ⵇⴰⵢⵉⵏ ⵜⴰⵎⵖⴰⵔⵜ ⵏⵏⴻⵙ ⵓⵛⴰ ⵜⴻⵢⵙⵉ ⵙ ⴷⴷⴻⵢⵙⴻⵜ ⵓⵛⴰ ⵜⵓⵔⵓⵡ ⴰⵙ-ⴷⴷ ⵃⴰⵏⵓⵅ. ⵜⵓⵖⴰ ⵇⴰⵢⴻⵏ ⵉⴱⵏⴰ ⵉⵛⵜ ⵏ ⵜⴻⵏⴷⵉⵏⵜ ⵓⵛⴰ ⵉⵍⴰⵖⴰ ⴰⵙ ⵉ ⵜⴻⵏⴷⵉⵏⵜ ⴰⵎ ⵢⵉⵙⴻⵎ ⵏ ⵎⵎⵉⵙ ⵃⴰⵏⵓⵅ. 18 ⵃⴰⵏⵓⵅ ⵉⵊⵊⴰ-ⴷⴷ ⵄⵉⵔⴰⴷ, ⵓ ⵄⵉⵔⴰⴷ ⵉⵊⵊⴰ-ⴷⴷ ⵎⵉⵃⵓⵢⴰ’ⵉⵍ ⵓ ⵎⵉⵃⵓⵢⴰ’ⵉⵍ ⵉⵊⵊⴰ-ⴷⴷ ⵎⴰⵜⵓⵛⴰ’ⵉⵍ ⵓ ⵎⴰⵜⵓⵛⴰ’ⵉⵍ ⵉⵊⵊⴰ-ⴷⴷ ⵍⴰⵎⴰⴽ. 19 ⵉⵎⵍⴻⵛ ⵍⴰⵎⴰⴽ ⵜⵏⴰⵢⴻⵏ ⵏ ⵜⴻⵎⵖⴰⵔⵉⵏ. ⵉⵛⵜⴻⵏ ⵇⵇⴰⵔⴻⵏ ⴰⵙ ⵄⴰⴷⴰ, ⵜⴻⵏⵏⴻⵖⵏⵉ ⵇⵇⴰⵔⴻⵏ ⴰⵙ ⵚⵉⵍⵍⴰ. 20 ⵜⵓⵔⵓⵡ-ⴷⴷ ⵄⴰⴷⴰ ⵢⴰⴱⴰⵍ. ⵏⴻⵜⵜⴰ ⵉⴷⵡⴻⵍ ⴷ ⴱⴰⴱⴰⵜⵙⴻⵏ ⵉ ⵉⵎⴻⵣⴷⴰⵖ ⵏ ⵉⵇⵉⴹⴰⵏ ⵓ ⵉ ⵉⵎⴻⴽⵙⴰⵡⴻⵏ ⵏ ⵍⴻⴱⵀⴰⵢⴻⵎ. 21 ⵉⵙⴻⵎ ⵏ ⵓⵎⴰⵙ ⵜⵓⵖⴰ ⴷ ⵢⵓⴱⴰⵍ ⵡⴻⵏⵏⵉ ⵜⵓⵖⴰ ⴷ ⴱⴰⴱⴰⵜⵙⴻⵏ ⵉ ⵎⴰⵔⵔⴰ ⵉⵏⵏⵉ ⵉⵜⵜⵉⵔⴰⵔⴻⵏ ⵍⴳⴰⵎⴱⵔⵉ ⴷ ⵜⴻⵎⵊⴰ. 22 ⵚⵉⵍⵍⴰ ⵜⵓⵔⵓⵡ-ⴷⴷ ⵄⴰⵡⴻⴷ ⵜⵓⴱⴰⵍ-ⵇⴰⵢⵉⵏ, ⴰⵎⵣⵉⵍ ⵏ ⵉⵎⵣⵉⵍⴻⵏ ⵏ ⵎⴰⵔⵔⴰ ⵉⵏⵏⵉ ⵉⵅⴻⴷⴷⵎⴻⵏ ⵙ ⵏⵏⵃⴰⵙ ⴷ ⵡⵓⵣⵣⴰⵍ. ⵓⵍⵜⵎⴰⵙ ⵏ ⵜⵓⴱⴰⵍ-ⵇⴰⵢⵉⵏ ⵜⵓⵖⴰ ⴷ ⵏⴰⵄⵎⴰ. 23 ⵉⵏⵏⴰ ⵍⴰⵎⴰⴽ ⵉ ⵜⴻⵎⵖⴰⵔⵉⵏ ⵏⵏⴻⵙ, ⵄⴰⴷⴰ ⴷ ⵚⵉⵍⵍⴰ: “ⵙⵍⴻⵏⵜ ⵉ ⵜⵎⵉⵊⵊⴰ ⵉⵏⵓ, ⴰ ⵜⵉⵎⵖⴰⵔⵉⵏ ⵏ ⵍⴰⵎⴰⴽ! ⵙⵍⴻⵏⵜ ⵖⴰⵔ ⵎⵉⵏ ⵖⴰ ⵉⵏⵉⵖ. ⴰⵇⴰ ⵏⵖⵉⵖ ⴰⵔⵢⴰⵣ ⵉ ⵓⵢⴻⵣⵣⵉⵎ ⵉⵏⵓ ⴷ ⵓⵃⴻⵏⵊⵉⵔ ⵉ ⵓⵢⴻⴷⴷⵉⵎ ⵉⵏⵓ! 24 ⴰⵇⴰ ⴰⴷ ⵅⴻⵍⴼⴻⵏ ⵣⵉ ⵇⴰⵢⵉⵏ ⵙⴻⴱⵄⴰ ⵏ ⵜⵡⴰⵍⴰⵡⵉⵏ, ⵎⴰⵛⴰ ⵣⵉ ⵍⴰⵎⴰⴽ ⵙⴻⴱⵄⴰ ⵓ-ⵙⴻⴱⵄⵉⵏ ⵏ ⵜⵡⴰⵍⴰⵡⵉⵏ.” ⴰⵅⵍⴰⵇ ⵏ ⵛⵉⵜ 25 ⵢⵓⴷⴻⴼ ⴰⴷⴰⵎ ⵄⴰⵡⴻⴷ ⵅ ⵜⴰⵎⵖⴰⵔⵜ ⵏⵏⴻⵙ ⵓⵛⴰ ⵜⵓⵔⵓⵡ-ⴷⴷ ⵏⴻⵜⵜⴰⵜ ⴰⵃⴻⵏⵊⵉⵔ. ⵜⵍⴰⵖⴰ ⴰⵙ ⵛⵉⵜ, ⵎⵉⵏⵣⵉ ⵜⴻⵏⵏⴰ: “ⴰⵔⴻⴱⴱⵉ ⵉⵡⵛⴰ ⴰⵢⵉ ⵣⵣⴰⵔⵉⵄⴻⵜ ⵏⵏⴻⵖⵏⵉ ⴷⴻⴳ ⵡⴻⵎⵛⴰⵏ ⵏ ⵀⴰⴱⵉⵍ, ⵎⵉⵏⵣⵉ ⵇⴰⵢⵉⵏ ⵉⵏⵖⴰ ⵉ-ⵜ." 26 ⵓⵍⴰ ⵉ ⵛⵉⵜ ⵉⵜⵜⵡⴰⵅⵍⴻⵇ-ⴷⴷ ⵓⵙⴻⵢⵎⵉ, ⵓⵛⴰ ⵉⴳⴳⴰ ⴰⵙ ⴰⵏⵓⵛ. ⵍⴻⵅⴷⴻⵏⵏⵉ ⵉⴱⴷⴰ ⴱⵏⴰⴷⴻⵎ ⵙ ⵓⵍⴰⵖⵉ ⵅ ⵢⵉⵙⴻⵎ ⵏ ⵙⵉⴷⵉ. ⵡⴰ ⴷ ⴰⴷⵍⵉⵙ ⵉⵜⵜⵡⴰⵏⴹⴻⵏ ⵏ ⵉⵎⴻⵣⵔⵓⵢⴻⵏ ⵏ ⵢⵉⵏⵏⵉ ⴷⴷ-ⵉⵜⵜⵡⴰⵅⴻⵍⵇⴻⵏ ⵣⵉ ⴰⴷⴰⵎ.