ⴰⵎⴱⴰⵔⵔⴻⵃ 12
TTI1 ⵉⴷⴰⵔ ⵡⴻⵏⵏⵉ ⵛⴻⴽ ⴷⴷ-ⵉⵅⴻⵍⵇⴻⵏ ⴷⴻⴳ ⵡⵓⵙⵙⴰⵏ ⵏ ⵜⴻⵎⵥⵉ ⵏⵏⴻⵛ, ⵇⴱⴻⵍ ⵉ ⴷⴷ ⵖⴰ ⵢⴰⵡⴹⴻⵏ ⵡⵓⵙⵙⴰⵏ ⵏ ⵍⵖⴰⵔ ⵉ ⵣⵉ ⵖⴰ ⵜⵉⵏⵉⴷ: “ⵡⴰⵔ ⴷⴰⵢⵙⴻⵏ ⵓⴼⵉⵖ ⵍⴻⴼⵔⴰⵃⴻⵜ!”, 2 ⵇⴱⴻⵍ ⴰⴷ ⵜᵉⵜⵜⵡⴰⴱⴰⵔⵛⴻⵏ ⵜⴼⵓⵛⵜ ⴷ ⵜⴼⴰⵡⵜ ⴷ ⵜⵣⵉⵔⵉ ⴷ ⵉⵜⵔⴰⵏ ⵓⵛⴰ ⴰⴷ ⴷⴷ-ⵄⴻⵇⴱⴻⵏ ⵉⵙⴻⵢⵏⵓⵜⴻⵏ ⴰⵡⴰⵔⵏⵉ ⵉ ⵡⴻⵏⵥⴰⵔ, 3 ⵖⴰⵔ ⵡⴰⵙⵙ ⵎⵉⵏ ⴷⵉ ⵉⵄⴻⵙⵙⴰⵙⴻⵏ ⵏ ⵜⴰⴷⴷⴰⵔⵜ ⴰⴷ ⴰⵔⵊⵉⵊⴻⵏ, ⵉⵔⵢⴰⵣⴻⵏ ⵉⵊⴻⵀⴷⴻⵏ ⴰⴷ ⵇⴻⵡⵙⴻⵏ, ⵜⵉⵏⵏⵉ ⵉⵃⴰⵔⵔⵢⴻⵏ ⵜⴰⵙⵉⵔⵜ ⴰⴷ ⵙⵙⴱⴻⴷⴷⴻⵏⵜ ⵜⴰⵡⵡⵓⵔⵉ ⵏⵙⴻⵏⵜ, ⵎⵉⵏⵣⵉ ⵏⵉⵜⴻⵏⵜⵉ ⵇⵇⵉⵎⴻⵏⵜ ⴷⵔⵓⵙ ⵉⴷⵙⴻⵏⵜ, ⵓⵛⴰ ⵜⵉⵎⵖⴰⵔⵉⵏ ⵏⵏⵉ ⴷⴷ-ⵉⵙⵙⴰⵊⵊⴰⵏ ⵣⵉ ⵍⴽⵡⴰⵣⵉ, ⴰⴷ ⵜⵜⵡⴰⵍⴻⵃⵃⴼⴻⵏⵜ ⵙ ⵜⴰⴵⴻⵙⵜ, 4 ⵓ ⵜⵏⴰⵢⴻⵏ ⵏ ⵜⴻⵡⵡⵓⵔⴰ ⵖⴰⵔ ⵣⵣⴻⵏⵇⵇⴻⵜ ⴰⴷ ⵜⵜⵡⴰⴱⴻⵍⵍⵄⴻⵏⵜ, ⵅⵎⵉ ⴷⴷⵔⵉⵣ ⵏ ⵜⵙⵉⵔⵜ ⴰⴷ ⵉⵙⵙⴻⵖⴷ ⵓⵛⴰ ⵍⵃⴻⵙⵙ ⵏ ⵓⵊⴹⵉⴹ ⴰⴷ ⵜ ⵉⵙⵙⵉⴳⴳⵡⴻⴷ ⴷⴻⴳ ⵢⵉⴹⴻⵙ ⵓ ⵎⴰⵔⵔⴰ ⵢⴻⵙⵙⵉⵙ ⵏ ⵓⵖⴻⵏⵏⵉⵊ ⴰⴷ ⴷⴻⵡⵍⴻⵏⵜ ⵇⴻⵡⵙⴻⵏⵜ, 5 ⵓ ⴱⵏⴰⴷⴻⵎ ⴰⴷ ⵉⴳⴳⵯⴻⴷ ⵣⵉ ⵎⴰⵔⵔⴰ ⵎⵉⵏ ⵉⴵⴰⵏ ⵢⵓⵄⵍⴰⵏ, ⵓⵛⴰ ⴰⴷ ⴷⵉⵏ ⵉⵍⵉⵏⵜ ⵄⵍⴰⵎ ⴽⵓⵍ ⵍⴻⵃⵡⴰⵢⴻⵊ ⵉⵏⴻⵅⵍⵉⵄⴻⵏ ⴷⴻⴳ ⵡⴻⴱⵔⵉⴷ, ⵓ ⵜⴰⵛⴻⵊⵊⴰⵔⵜ ⵏ ⴵⴻⵡⵣ ⴰⴷ ⵜⵏⴻⵡⵡⴰⵔ ⵓ ⴰⴱⵓⵔⵅⴻⵙ ⴰⴷ ⵉⴷⵡⴻⵍ ⴷ ⵜⴰⵎⴰⵔⴰ ⵓ ⵜⴰⵏⴻⵡⵡⴰⵛⵜ ⵏ ‘ⵓⴽⴻⴱⴱⴰⵙ’ ⵡⴰⵔ ⴷ ⴰⵙ ⴷⴷ-ⵢⵓⵙⵉ ⵄⴰⴷ ⵖⴰⵔ ⵍⴱⴰⵍ - ⵎⴰⵖⴰⵔ ⴱⵏⴰⴷⴻⵎ ⵉⴳⴳⵓⵔ ⵖⴰⵔ ⵜⴰⴷⴷⴰⵔⵜ ⵏⵏⴻⵙ ⵏ ⵍⴻⴱⴷⴰ ⵓ ⵉⵏⵏⵉ ⵉⵛⴻⵟⵟⵏⴻⵏ ⴰⴷ ⵔⴰⵃⴻⵏ ⴰⴷ ⴷⴷ-ⵜⴰⵙⴻⵏ ⴷⴻⴳ ⵉⴱⵔⵉⴷⴻⵏ - 6 ⵇⴱⴻⵍ ⵉ ⵖⴰ ⵜᵉⵜⵜⵡⴰⵔⵅⵓ ⵜⴻⵙⵖⵓⵏⵜ ⵏ ⵏⵏⵓⵇⴰⵔⵜ, ⴰⴷ ⵜᵉⵜⵜⵡⴰⵔⵥ ⵟⵟⴰⵡⵢⵢⴻⵜ ⵏ ⵡⵓⵔⴻⵖ, ⴰⴷ ⵉⵏⵏⴻⴼⵔⴰⵔ ⵡⴻⵇⴱⵓⵛ ⵖⴰⵔ ⵜⴰⵍⴰ ⵓⵛⴰ ⴰⴷ ⵜⴻⵇⴹⵓ ⵜⵊⴰⵔⵔⴰⵔⵜ ⴷⴻⴳ ⵡⴰⵏⵓ, 7 ⵓⵛⴰ ⵓⵛⴰⵍ ⴰⴷ ⴷⴷ-ⵉⵄⵇⴻⴱ ⵖⴰⵔ ⵜⴻⵎⵎⵓⵔⵜ ⴰⵎ ⵎⴰⵎⵎⴻⵛ ⵜ-ⵜⵓⵖⴰ, ⵓ ⴱⵓⵃⴱⴻⵍ ⴰⴷ ⴷⴷ-ⵉⵄⵇⴻⴱ ⵖⴰⵔ ⴰⵔⴻⴱⴱⵉ, ⵡⴻⵏⵏⵉ ⵜ ⵉⵡⵛⵉⵏ. ⴰⵡⴰⵍ ⴰⵏⴻⴳⴳⴰⵔⵓ 8 ⴷ ⵉⴱⴻⵟⵟⴰⵍⴻⵏ ⵇⴰⵄ, ⵉⵇⵇⴰⵔ ⵓⵎⴱⴰⵔⵔⴻⵃ, ⴰⵇⴰ ⴽⵓⵍⵛⵉ ⴷⵉ ⵍⴱⴰⵟⴻⵍ. 9 ⵙⴻⵏⵏⴻⵊ ⵉ ⵓⵢⴰ, ⵎⵉⵏⵣⵉ ⴰⵎⴱⴰⵔⵔⴻⵃ ⵜⵓⵖⴰ-ⵜ ⴷ ⴰⵎⵉⵖⵉⵙ, ⵉⵙⵙⴻⵍⵎⴻⴷ ⵄⴰⵡⴻⴷ ⵜⵓⵙⵙⵏⴰ ⵉ ⵍⴳⴻⵏⵙ, ⵜⵓⵖⴰ ⵉⵜⵜⴱⴰⵍⵓ, ⵉⵜⵜⴱⴻⵇⵇⴰⵛ ⵎⵍⵉⵃ, ⵓⵛⴰ ⵉⵄⴷⴻⵍ ⴰⵟⵟⴰⵙ ⵏ ⵡⴰⵡⴰⵍⴻⵏ ⵉⵡⴻⵣⵏⴻⵏ. 10 ⵢⴰⵔⵣⵓ ⵓⵎⴱⴰⵔⵔⴻⵃ ⵎⴰⵃⴻⵏⴷ ⴰⴷ ⵢⴰⴼ ⴰⵡⴰⵍⴻⵏ ⵉⵄⴻⴷⵍⴻⵏ, ⵓ ⵎⵉⵏ ⵢⵓⵔⴰ, ⴰⵇⴰ-ⵜ ⵏⵉⵛⴰⵏ, ⴰⵡⴰⵍⴻⵏ ⵏ ⵜⵉⴷⴻⵜⵜ. 11 ⴰⵡⴰⵍⴻⵏ ⵏ ⵉⵎⵉⵖⵉⵙⴻⵏ ⴰⵎ ⵢⵉⵙⴻⵏⵏⴰⵏⴻⵏ ⵓ ⴰⵎⴻⵛⵏⴰⵡ ⵉⵎⴻⵙⵎⵉⵔⴻⵏ ⵉⵜⵜⵡⴰⵙⵙⵉⴷⴼⴻⵏ, ⵉ ⵣⵣⴰⵢⵙⴻⵏ ⵉ-ⴷⴷ-ⵜⵜⴰⵙⴻⵏⵜ ⴰⵟⵟⴰⵙ ⵏ ⵜⵎⴻⵙⵍⴰⵢⵉⵏ, ⴰⵇⴰ-ⵜⴻⵏ ⵎⵎⴻⵡⵛⴻⵏ ⵣⴻⴳ ⵓⵢⴻⵏⵏⵉ ⵏ ⵓⵎⴻⴽⵙⴰⵡ. 12 ⵙⴻⵏⵏⴻⵊ ⵉ ⵎⴰⵔⵔⴰ ⴰⵢⴰ, ⴰ ⵎⵎⵉ, ⵃⴹⴰ ⵉⵅⴻⴼ ⵏⵏⴻⵛ: ⵡⴰⵔ ⴷⵉⵏ ⴰⵇⴻⵟⵟⵓ ⵏ ⵜⵉⵔⴰ ⵏ ⵡⴰⵟⵟⴰⵙ ⵏ ⵉⴷⵍⵉⵙⴻⵏ ⵓ ⴰⵟⵟⴰⵙ ⵏ ⵜⵖⵓⵔⵉ ⵜⴻⵙⵙⴰⵃⴰⵍ ⴰⵔⵔⵉⵎⴻⵜ. 13 ⴰⵡⴰⵍ ⴰⵏⴻⴳⴳⴰⵔⵓ ⵏ ⵎⴰⵔⵔⴰ ⵎⵉⵏ ⵜⴻⵙⵍⵉⴷ, ⴰⵇⴰ ⵜ ⴷ ⵡⴰ: “ⴳⴳⵯⴻⴷ ⴰⵔⴻⴱⴱⵉ ⵓ ⵃⴹⴰ ⵜⵉⵡⴻⵚⵚⴰ ⵏⵏⴻⵙ!”, ⵎⴰⵖⴰⵔ ⵎⴰⵏ ⴰⵢⴰ ⵉ ⵢⵓⵔⵉⵏ ⵉ ⴽⵓⵍ ⵉⵊⵊ ⵏ ⴱⵏⴰⴷⴻⵎ. 14 ⵎⴰⵖⴰⵔ ⵙⵉⴷⵉ ⴰⴷ ⵢⴰⵡⵉ ⴽⵓⵍ ⵜⴰⵎⴻⴳⴳⵉⵜ ⵣⵣⴰⵜ ⵉ ⵜⴰⴷⴷⴰⵔⵜ ⵏ ⵛⵛⵔⴻⵄ ⵅ ⵎⴰⵔⵔⴰ ⵎⵉⵏ ⵉⵏⵏⵓⴼⴼⴰⵔⴻⵏ, ⵎⴰ ⵜⵓⵖⴰ ⵉⵚⴱⴻⵃ ⵏⵉⵖ ⵜⵓⵖⴰ ⵡⴰⵔ ⵉⵃⵍⵉ.