1 ⵉⵊⴻⴵⵉⴷⴻⵏ 4

1 ⵜⵓⵖⴰ ⴰⵊⴻⴵⵉⴷ ⵙⵓⵍⵉⵎⴰⵏ ⴷ ⴰⵊⴻⴵⵉⴷ ⵅ ⵎⴰⵔⵔⴰ ⵉⵙⵔⴰⵉⵍ. 2 ⵉⵏⴰ ⵜⵓⵖⴰ ⴷ ⵍⵃⵓⴽⴽⴰⵎ ⵏⵏⴻⵙ ⵉⵎⴻⵇⵇⵔⴰⵏⴻⵏ: ⵄⴰⵣⴰⵔⵢⴰ, ⵎⵎⵉⵙ ⵏ ⵚⴰⴷⵓⵇ, ⵜⵓⵖⴰ-ⵜ ⴷ ⴰⴽⴻⵀⵀⴰⵏ. 3 ⵉⵍⵉⵃⵓⵔⴰⴼ ⴷ ⴰⵅⵉⵢⴰ, ⵉⵃⴻⵏⵊⵉⵔⴻⵏ ⵏ ⵛⵉⵛⴰ, ⵜⵓⵖⴰ ⴰⵜⴻⵏ ⴷ ⵉⵎⴰⵔⵉⵔⴻⵏ. ⵢⴰⵃⵓⵛⴰⴼⴰⵟ, ⵎⵎⵉⵙ ⵏ ⴰⵅⵉⵍⵓⴷ, ⵜⵓⵖⴰ-ⵜ ⴷ ⴰⵎⴰⵔⵉⵔ ⴰⵎⴻⵣⵡⴰⵔⵓ. 4 ⴱⴰⵏⴰⵢⴰ, ⵎⵎⵉⵙ ⵏ ⵢⴰⵀⵓⵢⴰⴷⴰⵄ, ⵜⵓⵖⴰ-ⵜ ⵅ ⵍⵄⴻⵙⴽⴰⵔ. ⵚⴰⴷⵓⵇ ⴷ ⴰⴱⵢⴰⵜⴰⵔ ⵜⵓⵖⴰ ⴰⵜⴻⵏ ⴷ ⵉⴽⴻⵀⵀⴰⵏⴻⵏ. 5 ⵄⴰⵣⴰⵔⵢⴰ, ⵎⵎⵉⵙ ⵏ ⵏⴰⵜⴰⵏ, ⵜⵓⵖⴰ-ⵜ ⵅ ⵍⵡⵓⵍⴰⵜ. ⵣⴰⴱⵓⴷ, ⵎⵎⵉⵙ ⵏ ⵏⴰⵜⴰⵏ, ⵜⵓⵖⴰ-ⵜ ⴷ ⴰⵡⴽⵉⵍ ⴷ ⴰⵎⴻⴷⴷⵓⴽⴽⴻⵍ ⵏ ⵓⵊⴻⴵⵉⴷ. 6 ⴰⵅⵉⵛⴰⵔ ⵜⵓⵖⴰ-ⵜ ⵅ ⵜⵣⴻⴷⴷⵉⵖⵜ ⵏ ⵓⵊⴻⴵⵉⴷ. ⴰⴷⵓⵏⵉⵔⴰⵎ, ⵎⵎⵉⵙ ⵏ ⴰⴱⴷⴰ ⵜⵓⵖⴰ-ⵜ ⵅ ⵍⵊⵉⵣⵢⴰ. 7 ⵙⵓⵍⵉⵎⴰⵏ ⵖⴰⵔⴻⵙ ⵜⴻⵏⵄⴰⵛ ⵏ ⵍⵡⵓⵍⴰⵜ ⵅ ⵎⴰⵔⵔⴰ ⵉⵙⵔⴰⵉⵍ, ⵉⵏⵏⵉ ⵉⴱⴻⴷⴷⴻⵏ ⵅ ⵍⴻⵄⵡⴻⵍⵜ ⵏ ⵓⵊⴻⴵⵉⴷ ⴷ ⵜⴰⴷⴷⴰⵔⵜ ⵏⵏⴻⵙ. ⵅ ⴽⵓⵍ ⵉⵊⵊ ⵙ ⵓⵢⵓⵔ ⵏⵏⴻⵙ ⴷⴻⴳ ⵓⵙⴻⴳⴳⵯⴰⵙ, ⵜⵓⵖⴰ ⵅⴰⵙ ⴰⴷ ⵜ ⵉⴽⵙⵉ. 8 ⵉⵏⴰ ⴷ ⵉⵙⵎⴰⵡⴻⵏ ⵏⵙⴻⵏ: ⵎⵎⵉⵙ ⵏ ⵃⵓⵔ ⵅ ⵉⴷⵓⵔⴰⵔ ⵏ ⵉⴼⵔⴰⵢⵉⵎ. 9 ⵎⵎⵉⵙ ⵏ ⴷⴰⵇⴰⵔ ⴷⵉ ⵎⴰⵇⴰⵙ ⵓ ⴷⵉ ⵛⴰⵄⴰⵍⵓⴱⴱⵉⵎ, ⴱⴰⵢⵜ-ⵛⴰⵎⵙ ⴷ ⵉⵍⵓⵏ-ⴱⴰⵢⵜ-ⵃⴰⵏⴰⵏ. 10 ⵎⵎⵉⵙ ⵏ ⵃⴰⵙⴰⴷ ⴷⵉ ⴰⵔⵓⴱⵓⵜ. ⵏⴻⵜⵜⴰ ⵜⵓⵖⴰ ⵖⴰⵔⴻⵙ ⵙⵓⴽⵓ ⴷ ⵎⴰⵔⵔⴰ ⵜⴰⵎⵎⵓⵔⵜ ⵏ ⵃⴰⴼⵉⵔ. 11 ⵎⵎⵉⵙ ⵏ ⴰⴱⵉⵏⴰⴷⴰⴱ ⵖⴰⵔⴻⵙ ⵎⴰⵔⵔⴰ ⵜⵉⵡⵔⵉⵔⵉⵏ ⵏ ⴷⵓⵔ. ⵜⴰⴼⴰⵜ, ⵢⴻⴵⵉⵙ ⵏ ⵙⵓⵍⵉⵎⴰⵏ, ⵜⵓⵖⴰ-ⵜⵜ ⵖⴰⵔⴻⵙ ⴷ ⵜⴰⵎⵖⴰⵔⵜ. 12 ⴱⴰⵄⵏⴰ, ⵎⵎⵉⵙ ⵏ ⴰⵅⵉⵍⵓⴷ, ⵖⴰⵔⴻⵙ ⵜⴰⵄⵏⴰⴽ, ⵎⴰⵊⵉⴷⴷⵓ ⴷ ⵎⴰⵔⵔⴰ ⴱⴰⵢⵜ-ⵛⴰⵏ ⵉ ⵉⴵⴰⵏ ⵖⴰⵔ ⵚⵓⵔⵜⴰⵏ, ⵙⵡⴰⴷⴷⴰⵢ ⵏ ⵢⴰⵣⵔⴰⵄⵉⵍ, ⵣⵉ ⴱⴰⵢⵜ-ⵛⴰⵏ ⴰⵍ ⴰⴱⴰⵍ-ⵎⴰⵃⵓⵍⴰ, ⴰⵍ ⵓⵖⴻⵣⴷⵉⵙ ⵏⵏⴻⵖⵏⵉ ⵏ ⵢⵓⵇⵎⴰⵄⴰⵎ. 13 ⵎⵎⵉⵙ ⵏ ⵊⴰⴱⴰⵔ ⵜⵓⵖⴰ ⴷⵉ ⵔⴰⵎⵓⵜ-ⵊⵉⵍⵄⴰⴷ. ⵏⴻⵜⵜⴰ ⵖⴰⵔⴻⵙ ⴷⵛⵓⵔⴰⵜ ⵏ ⵢⴰ’ⵉⵔ, ⵎⵎⵉⵙ ⵏ ⵎⴰⵏⴰⵙⵙⴰ, ⵜⵉⵏⵏⵉ ⵉⴵⴰⵏ ⴷⵉ ⵊⵉⵍⵄⴰⴷ. ⵜⵓⵖⴰ ⵖⴰⵔⴻⵙ ⵓⵍⴰ ⴷ ⵊⵊⵉⵀⴻⵜ ⵏ ⴰⵔⵊⵓⴱ, ⵜⴻⵏⵏⵉ ⴷⵉ ⴱⴰⵛⴰⵏ, ⵙⴻⵜⵜⵉⵏ ⵏ ⵜⵉⵏⴻⴷⴷⴰⵎ ⵎⵖⴰⵔⴻⵏⵜ ⵙ ⵍⵃⵉⴹ ⵓ ⵙ ⵣⵣⴻⴽⵔⵓⵏ ⵏ ⵏⵏⵃⴰⵙ. 14 ⴰⵅⵉⵏⴰⴷⴰⴱ, ⵎⵎⵉⵙ ⵏ ⵄⵉⴷⴷⵓ, ⵖⴰⵔⴻⵙ ⵎⴰⵃⴰⵏⴰⵢⵉⵎ. 15 ⴰⵅⵉⵎⴰⵄⴰⵚ ⵜⵓⵖⴰ-ⵜ ⴷ ⵍⵡⴰⵍⵉ ⴷⵉ ⵏⴰⴼⵜⴰⵍⵉ. ⵏⴻⵜⵜⴰ ⵢⵉⵡⵉ ⵓⵍⴰ ⴱⴰⵙⵉⵎⴰⵜ, ⵢⴻⴵⵉⵙ ⵏ ⵙⵓⵍⵉⵎⴰⵏ, ⴷ ⵜⴰⵎⵖⴰⵔⵜ ⵏⵏⴻⵙ. 16 ⴱⴰⵄⵏⴰ, ⵎⵎⵉⵙ ⵏ ⵀⵓⵛⴰⵉ, ⵜⵓⵖⴰ-ⵜ ⴷ ⵍⵡⴰⵍⵉ ⴷⵉ ⴰⵛⵉⵔ ⵓ ⴷⵉ ⴱⴰⵄⴰⵍⵓⵜ. 17 ⵢⴰⵀⵓⵛⴰⴼⴰⵟ, ⵎⵎⵉⵙ ⵏ ⴼⴰⵔⵓⵃ, ⵜⵓⵖⴰ-ⵜ ⴷ ⵍⵡⴰⵍⵉ ⴷⵉ ⵉⵙⵙⴰⴽⴰⵔ. 18 ⵛⵉⵎⵄⵉ, ⵎⵎⵉⵙ ⵏ ⵉⵢⵍⴰ, ⵜⵓⵖⴰ-ⵜ ⴷ ⵍⵡⴰⵍⵉ ⴷⵉ ⴱⵉⵏⵢⴰⵎⵉⵏ. 19 ⵊⴰⴱⴰⵔ, ⵎⵎⵉⵙ ⵏ ⵓⵔⵉ, ⵜⵓⵖⴰ-ⵜ ⴷ ⵍⵡⴰⵍⵉ ⴷⵉ ⵜⴻⵎⵎⵓⵔⵜ ⵏ ⵊⵉⵍⵄⴰⴷ, ⵜⴰⵎⵎⵓⵔⵜ ⵏ ⵙⵉⵃⵓⵏ, ⴰⵊⴻⴵⵉⴷ ⵏ ⵉⵎⵓⵔⵉⵢⵢⴻⵏ, ⵓ ⵏ ⵄⵓⵊ, ⴰⵊⴻⴵⵉⴷ ⵏ ⴱⴰⵛⴰⵏ. ⵏⴻⵜⵜⴰ ⵜⵓⵖⴰ ⴷ ⴰⵢⴻⵏⵏⵉ ⵏ ⵍⵡⴰⵍⵉ ⴷⵉ ⵜⴻⵎⵎⵓⵔⵜ ⵏⵏⵉ. 20 ⵜⵓⵖⴰ ⵍⴳⴻⵏⵙ ⵏ ⵢⴰⵀⵓⴷⴰ ⴷ ⵉⵙⵔⴰⵉⵍ ⵙ ⵡⴰⵟⵟⴰⵙ ⴰⵎ ⵢⵉⵊⴷⵉ ⵖⴰⵔ ⵜⵎⴰ ⵏ ⵍⴻⴱⵃⴰⵔ, ⴰⵎⵎⵓ ⴰⵟⵟⴰⵙ. ⵏⵉⵜⵏⵉ ⵛⵛⵉⵏ, ⵙⵡⵉⵏ ⵓ ⴼⴰⵔⵃⴻⵏ.