1 ⵉⴽⵓⵔⵉⵏⵜⵉⵢⵢⴻⵏ 2

1 ⴰ ⴰⵢⵜⵎⴰ, ⵍⴰⵎⵉ ⴷⴷ-ⵓⵙⵉⵖ ⵖⴰⵔⵡⴻⵎ, ⵡⴰⵔ ⴷⴷ-ⵓⵙⵉⵖ ⵛⴰ ⵃⵉⵎⴰ ⴰⴷ ⴰⵡⴻⵎ ⴱⴰⵔⵔⵃⴻⵖ ⵍⴻⵅⴱⴰⵔ ⴰⵚⴻⴱⵃⴰⵏ ⵏ ⵙⵙⵉⵔⵔ ⵏ ⴰⵔⴻⴱⴱⵉ ⵙ ⵜⴱⴻⵣⵣⴰⵃⵜ ⵏ ⵡⴰⵡⴰⵍ ⵏⵉⵖ ⵙ ⵜⵉⵖⵉⵜ, 2 ⵎⵉⵏⵣⵉ ⴰⵇⴰ ⵜⵓⵖⴰ ⵄⴻⵡⵡⵍⴻⵖ ⵃⵉⵎⴰ ⵡⴰⵔ ⵜⵜⴻⵙⵙⵏⴻⵖ ⵛⴰ ⵊⴰⵔ ⴰⵡⴻⵎ ⵎⵖⵉⵔ ⵢⴰⵙⵓⵄ ⵍⵎⴰⵙⵉⵃ, ⴷ ⵡⴻⵏⵏⵉ ⵉⵜⵜⵡⴰⵚⴻⵍⵍⴱⴻⵏ ⵄⴰⵡⴻⴷ. 3 ⵜⵓⵖⴰ ⴰⵢⵉ ⴰⴽⵉⴷⵡⴻⵎ ⵙ ⵡⴰⵟⵟⴰⵙ ⵏ ⵜⵉⴳⴳⵯⵓⴷⵉ ⴷ ⵓⵇⴷⵉⴷⴻⵙ. 4 ⵜⴰⴱⵔⴰⵜ ⵉⵏⵓ ⴷ ⵜⴱⴰⵔⵔⴻⵃⵜ ⵉⵏⵓ ⵡⴰⵔ ⴷⴷ-ⵓⵙⵉⵏⵜ-ⵉ-ⴷⴷ ⵙ ⵡⴰⵡⴰⵍⴻⵏ ⵉⵣⴻⵡⵡⵇⴻⵏ ⵏ ⵜⵉⵖⵉⵜ ⵏ ⴱⵏⴰⴷⴻⵎ, ⵎⴰⵛⴰ ⵙ ⵡⴻⵙⵛⴰⵏ ⵏ ⴰⵔⵔⵓⵃ ⴷ ⵊⵊⴻⵀⴷ, 5 ⵃⵉⵎⴰ ⵍ’ⵉⵎⴰⵏ ⵏⵡⴻⵎ ⵡⴰⵔ ⵉⵜⵜⴱⴻⴷⴷⵉ ⵛⴰ ⵅ ⵜⵉⵖⵉⵜ ⵏ ⵉⵡⴷⴰⵏ, ⵎⴰⵛⴰ ⵅ ⵊⵊⴻⵀⴷ ⵏ ⴰⵔⴻⴱⴱⵉ. 6 ⵎⴰⵛⴰ ⵏⴻⵙⵙⴰⵡⴰⵍ ⵙ ⵜⵉⵖⵉⵜ ⵉ ⵢⵉⵏⵏⵉ ⵜ ⵉⵡⴹⴻⵏ, ⴰⵇⴰ ⵙ ⵉⵛⵜ ⵏ ⵜⵉⵖⵉⵜ ⵜⴻⵏⵏⵉ ⵡⴰⵔ ⵉⴵⵉⵏ ⵏ ⴷⴷⵓⵏⴻⵛⵜ-ⴰ ⵏⵉⵖ ⵏ ⵍⵃⵓⴽⴽⴰⵎ ⵏ ⴷⴷⵓⵏⴻⵛⵜ-ⴰ, ⵉⵏⵏⵉ ⵉ ⵖⴰ ⵉⵜⵜⵡⴰⵙⵙⴱⴻⵟⵟⵍⴻⵏ, 7 ⵎⴰⵛⴰ ⵏⴻⵙⵙⴰⵡⴰⵍ ⵜⵉⵖⵉⵜ ⵏ ⴰⵔⴻⴱⴱⵉ ⵙ ⵉⵊⵊ ⵏ ⵙⵙⵉⵔⵔ ⵉ ⵜⵓⵖⴰ ⵉⵏⵓⴼⴼⴰⵔⴻⵏ, ⵡⴻⵏⵏⵉ ⵜⵓⵖⴰ ⵉⵣⵣⴰⵔ ⵉⴼⴰⵔⵣ ⵉ-ⵜ ⴰⵔⴻⴱⴱⵉ ⵉ ⵓⵄⵓⴵⵉ ⵏⵏⴻⵖ ⵇⴱⴻⵍ ⵉ ⵜⵓⵖⴰ ⴷⵉⵏ ⵣⵣⵎⴰⵏⴰⵜ. 8 ⵡⴰ ⴷ ⵙⵙⵉⵔⵔ ⵏⵏⵉ ⵡⴰⵔ ⵜ ⵉⵙⵙⵉⵏ ⵓⵍⴰ ⴷ ⵉⵊⵊ ⵣⵉ ⵍⵃⵓⴽⴽⴰⵎ ⵏ ⴷⴷⵓⵏⴻⵛⵜ-ⴰ, ⵎⵉⵏⵣⵉ ⵎⴰⵍⴰ ⵜⵓⵖⴰ ⵙⵙⵏⴻⵏ ⵜ, ⵉⵍⵉ ⵡⴰⵔ ⵚⴻⵍⵍⴱⴻⵏ ⵄⴻⵎⵎⴰⵔⵚ ⵙⵉⴷⵉ ⵏ ⵓⵄⵓⴵⵉ. 9 ⵎⴰⵛⴰ ⴰⵎ ⵎⴰⵎⵎⴻⵛ ⵜⵓⵔⴰ: “ⵎⵉⵏ ⵡⴰⵔ ⵜⴻⵥⵔⵉ ⵜⵉⵟⵟ ⴷ ⵎⵉⵏ ⵡⴰⵔ ⵉⵙⵍⵉ ⵓⵎⴻⵣⵣⵓⵖ ⴷ ⵎⵉⵏ ⵡⴰⵔ ⵢⵓⴷⵉⴼⴻⵏ ⵛⴰ ⵖⴰⵔ ⵡⵓⵍ ⵏ ⴱⵏⴰⴷⴻⵎ, ⴰⵇⴰ ⵎⴰⵏ ⴰⵢⴰ ⵉⵙⵙⴻⵡⵊⴻⴷ ⵉ-ⵜ ⴰⵔⴻⴱⴱⵉ ⵉ ⵢⵉⵏⵏⵉ ⵜ ⵉⵜⵜⴻⵅⵙⴻⵏ." 10 ⵎⴰⵛⴰ ⴰⵔⴻⴱⴱⵉ ⵉⵎⵎⴻⵍ ⴰⵏⴻⵖ ⵜ ⵙ ⴰⵔⵔⵓⵃ ⵏⵏⴻⵙ, ⵎⵉⵏⵣⵉ ⴰⵔⵔⵓⵃ ⵜⴰⵔⴻⵣⵣⵓ ⴽⵓⵍⵛⵉ ⵓⵍⴰ ⴷ ⵍⴰⴵⴰⵖ ⵏ ⴰⵔⴻⴱⴱⵉ. 11 ⵎⵉⵏⵣⵉ ⵎⴰⵏ ⵡⴻⵏ ⴷ ⴱⵏⴰⴷⴻⵎ ⵉ ⵉⵙⵙⵏⴻⵏ ⵎⵉⵏ ⵉⴵⴰⵏ ⴷⵉ ⴱⵏⴰⴷⴻⵎ ⵎⵖⵉⵔ ⴰⵔⵔⵓⵃ ⵏ ⴱⵏⴰⴷⴻⵎ ⵡⴻⵏⵏⵉ ⴷⴰⵢⴻⵙ ⵉⴵⴰⵏ. ⴰⵎⵎⵓ ⵄⴰⵡⴻⴷ ⵓⵍⴰ ⴷ ⵉⵊⵊ ⵡⴰⵔ ⵉⵙⵙⵉⵏ ⵛⴰ ⵎⵉⵏ ⵉⴵⴰⵏ ⴷⵉ ⴰⵔⴻⴱⴱⵉ ⵎⵖⵉⵔ ⴰⵔⵔⵓⵃ ⵏ ⴰⵔⴻⴱⴱⵉ. 12 ⴰⵇⴰ ⵏⴻⵛⵛⵉⵏ ⵡⴰⵔ ⵏⴻⴽⵙⵉ ⵛⴰ ⴰⵔⵔⵓⵃ ⵏ ⴷⴷⵓⵏⴻⵛⵜ, ⵎⴰⵛⴰ ⴰⵔⵔⵓⵃ ⵉ ⴷⴷ-ⵢⵓⵙⵉⵏ ⵣⵉ ⴰⵔⴻⴱⴱⵉ, ⵃⵉⵎⴰ ⴰⴷ ⵏⴻⵙⵙⴻⵏ ⵎⵉⵏ ⴷ ⴰⵏⴻⵖ ⵉⵡⵛⴰ ⴰⵔⴻⴱⴱⵉ. 13 ⵙ ⵓⵢⴻⵏⵏⵉ ⴰⵡⴰⵍⴻⵏ ⵉ ⵣⵉ ⵏⴻⵙⵙⴰⵡⴰⵍ, ⵡⴰⵔ ⴵⵉⵏ ⴷ ⵜⵖⵓⵔⵉ ⵙ ⵡⴰⵡⴰⵍⴻⵏ ⵏ ⵜⵉⵖⵉⵜ ⵏ ⴱⵏⴰⴷⴻⵎ, ⵎⴰⵛⴰ ⴷ ⵜⵖⵓⵔⵉ ⵣⵉ ⴰⵔⵔⵓⵃ, ⵃⵉⵎⴰ ⴰⴷ ⵏⴻⵙⵙⴻⵎⵇⵓⴷⴷⴰ ⵎⵉⵏ ⵉⴵⴰⵏ ⵏ ⴰⵔⵔⵓⵃ ⴰⴽ-ⴷ ⵎⵉⵏ ⵉⴵⴰⵏ ⵏ ⴰⵔⵔⵓⵃ. 14 ⵎⴰⵖⴰⵔ ⴱⵏⴰⴷⴻⵎ ⵙ ⵢⵉⵅⴻⴼ ⵏⵏⴻⵙ ⵡⴰⵔ ⵉⵇⴻⴱⴱⴻⵍ ⵛⴰ ⵎⵉⵏ ⵉⴵⴰⵏ ⵏ ⴰⵔⵔⵓⵃ, ⵎⵉⵏⵣⵉ ⵉⵃⴻⵙⴱ ⵉ-ⵜ ⴷ ⵜⵓⴱⴱⵓⵀⴻⵍⵢⴰ, ⵡⴰⵔ ⵉⵣⴻⵎⵎⴰⵔ ⴰⴷ ⵜ ⵉⴼⵀⴻⵎ, ⵎⵉⵏⵣⵉ ⵎⴰⵏ ⴰⵢⴰ ⵉⵣⴻⵎⵎⴰⵔ ⴰⴷ ⵉⵜⵜⵡⴰⴼⴰⵔⵣ ⵙ ⴰⵔⵔⵓⵃ ⵡⴰⵀⴰ. 15 ⵎⴰⵛⴰ ⴱⵏⴰⴷⴻⵎ ⴰⵔⵔⵓⵃⴰⵏⵉ ⴰⵇⴰ ⵉⵣⴻⵎⵎⴰⵔ ⴰⴷ ⵉⴼⴰⵔⵣ ⴽⵓⵍⵛⵉ, ⵎⴰⵛⴰ ⵏⴻⵜⵜⴰ ⵙⵉⵎⴰⵏⵜ ⵏⵏⴻⵙ ⵡⴰⵔ ⵅⴰⵙ ⵉⵃⴻⴽⴽⴻⵎ ⵓⵍⴰ ⴷ ⵉⵊⵊ. 16 ⵎⵉⵏⵣⵉ ⵡⵉ ⵉⵙⵙⵏⴻⵏ ⴰⵅⴻⵎⵎⴻⵎ ⵏ ⵙⵉⴷⵉ ⴰⵍⴰⵎⵉ ⵉⵣⴻⵎⵎⴰⵔ ⴰⴷ ⵜ ⵉⵙⵙⴻⵍⵎⴻⴷ? ⵎⴰⵛⴰ ⵏⴻⵛⵛⵉⵏ ⵖⴰⵔⵏⴻⵖ ⴰⵅⴻⵎⵎⴻⵎ ⵏ ⵍⵎⴰⵙⵉⵃ.