Ṣafanya 3

1 Uct xam, tenni iɣewwɣen d yarṣuḍen, tandint n ddeǧ! 2 Nettat war tᵉttesři ɣar uřa d ict n tmijja, War tqebbeř aweddeb, nettat war tᵉttciř x SIDI, nettat war tᵉttqarrab ca ɣar AREBBI nnes. 3 Řḥukkam nnes di řwesṭ nnes d ayraden ittarrujduden, řquḍat nnes d uccanen n ǧiřet, inni war ittejjin walu ař tuffut. 4 Inabiyyen nnes daysen řefcuc, nitni d iryazen ixeddaɛen! Ikehhanen nnes ssfesden Zzawect Iqeddsen, nitni xalfen Ccariɛa. 5 SIDI amsegged aqa-t di řwest nnes. Netta war ittegg ca min war iseggden. Kuř tuffut ittarra řḥeqq nnes ɣar tfawt, ɛemmarṣ war tneqqeṣ! Maca wenni itteggen min war iseggden, war issin ca aseḍḥi. 6 Necc qḍiɣ řegnus, areddǧeɣ ṣṣumɛat nsen n tɣemmura. Necc xřiɣ i tbridin nnes, ařami uřa d ijjen war iqqim ɛad ittsara dinni. Tineddam nsen ttwareddǧent, war iqqim ḥed, uřa d ijj n umezduɣ. 7 Necc nniɣ: Ittxeṣṣa cem ad ayi teggʷeded, ad teksid aweddeb!, ḥima war tᵉttwakkes Tzeddiɣt nnes, s marra min d as ɣa ggeɣ. S tidett, nitni ɣewwɣen zic, maḥend ad ssfeḍḥen timegga nsen ař ṭṭarf. 8 S uya rajam ayi, iqqar SIDI, ass i di dd ɣa kkareɣ i tkeccaḍt. Minzi aya d řḥukm inu iseggden aqa ad jarweɣ řegnus, ad ssmuneɣ tigeldin, ḥima ad xasen ssfesyeɣ asxeḍ inu, marra řḥaduq n weɣḍab inu, maɣar s tmessi n tusmi inu iqeddsen ad tᵉttwacc marra tammurt. Ttubet n řegnus 9 Minzi xenni Necc ad beddřeɣ řḥard n řegnus iyencicen imezdagen ad ten wceɣ, ařami i ɣa řaɣan x Yisem n SIDI, ḥima ad t ɛebbden am s yict n teɣruḍt. 10 Zeg ujemmaḍ n iɣezran n Kuc, inni xafi ittẓaǧan, yeǧis n immṭarrcen inu, ad tt awyen nitni amecnaw tewhibt inu. 11 Deg wass nni war tseḍḥid ca ɛad, x marra timegga i zi xafi tɣewwɣed, minzi ad kkseɣ zi řwesṭ nnem inni ittfeyycen di nnfaxet, u kenniw war tessgeɛɛadem ɛad ixef nwem x wedrar inu Iqeddsen. 12 Necc ad jjeɣ di řwesṭ nnem ijj n řgens ittwaḥṣar, iẓeřḍ. Nitni ad arewřen ɣar Yisem n SIDI. 13 Min iqqimen n Israil war ittegg min war iseggden, nitni war ssxarriqen ca, u deg uqemmum nsen war ittᵉttwifi yiřes issxarriqen, maca nitni ad heddan ad zzřen, u uřa d ijjen ad ten issnexřiɛ. Řefraḥet n Israil d weɛdař nnes 14 Ɣennej, a yeǧis n Ṣihyun, sřiwřew, a Israil. Farḥ u tfaǧid s marra uř nnem, a, yeǧis n Urcalim! 15 SIDI ikkes řeḥkamat nnem, Netta aqa imḥa řeɛdu nnem. Ajeǧid n Israil, SIDI, aqa-t di řwesṭ nnem! War tẓarred ɛad řɣar. 16 Deg wass nni ad inin i Urcalim: War tteggʷed ca, Ṣihyun! War ttejji ifassen nnem ad arxun ɛemmarṣ ɛad! 17 SIDI, AREBBI nnem, aqa-t di řwest nnem, Bu-teɣruḍt nni i dd ɣa yawyen asenjem Netta ad zzayem ifarḥ s waṭṭas, Netta ad iseɣḍ di tayri nnes, Netta ad xam isřiwřew s uɣennej.’ 18 Necc ad ssmuneɣ inni iceṭṭnen umi war zemmaren ad carcen di tmesmunt ittwaggen i řɛid. Aqa nitni zzayem! Ddqeř n řḥegra aqa-t xas. 19 Xzar, Necc ad ceɣřeɣ ixef inu ak-d yinni cem iḥṣaren. Necc ad ssnejmeɣ iqejdaḥen u yinni ittwassuffɣen ad ten ssmuneɣ. Necc ad asen wceɣ řɛezz d yijj n isem icennɛen, di marra ddunect nni ten tuɣa issfeṭṭḥen. 20 Di řweqt nni ad kenniw dd-arreɣ, u di řweqt nni ad kenniw ssmuneɣ, Necc ad awem wceɣ ijj n yisem icennɛen d řɛezz jar marra řegnus n ddunect, xmi i zzaywem ɣa ssenqeřbeɣ tameḥbast nwem zzat i tiṭṭawin nwem, inna SIDI.