Izři x izřan 6

1 “Mani yuyur llif nnem, a cem icnan qaɛ x temɣarin? Mani yarra s uzeǧif llif nnem? Neccin nexs ad xas narzu akidem!" 2 “Llif inu ihwa ɣar uḥwic nnes, ɣar tbuda s řeɛṭur, ḥima ad yarwes deg iḥwicen, ḥima ad issmun tilillicin. 3 Necc zeg llif inu, u llif inu aqa-t inu, netta d wenni yarekkwsen jar tlillicin.” Asři iɣennej x weẓri n tesřit 4 “Cem tṣebḥed, a tameddukkeč inu, amecnaw Tirṣa, tecnid am Urcalim, tessaggʷaded am yiseddiyyen n řɛeskar s ibanduten nsen. 5 Kkes tiṭṭawin zzayi, maɣar nitenti ɣeḍřent ayi ifadden aṭṭas. Acuwwaf nnem am tḥimart n iɣayḍen i dd-ihekkʷan zeg idurar n Jilɛad. 6 Tiɣmas nnem ggint am tḥimart n wuǧi, i dd-ittgeɛɛaden zeg wemcan n uṣebben. Marra tixeswin urwent tacniwt, war teqqim ict nbřa iḥenjiren. 7 Lḥenkat nnem am tremmant ibḍan awarni i lltam nnem. 8 Aqa din settin n tjeǧidin d tmenyin n tiyya, uřa d tiɛzariyyin břa řeḥsab. 9 Weḥḥdes nettat, tadbirt inu, tenni ikemmřen inu, ayenni n yessis n yemmas, nettat d tenni ifarzen ɣar tenni i d as dd-yurwen. Mařa zřint tt tyessit, ad tt ssɛuǧant, tijeǧidin d tiyya ad tt ssemɣarent." 10 “Min teɛna tenni dd-issijjen am tfawt n řefjar, tecna am tziri iqefřen, teṣfa am tfuct yareqqen, tessaggʷad am yiseddiyyen n řɛeskar s ibanduten?” Tseḍḥi tesřit 11 “Necc ḥwiɣ ɣar teḥwict n tcejjura n teɣyact ḥima ad ẓareɣ aɣemmuy ibedden di teɣzurt, ḥima ad ẓareɣ ma tazayart tessuffeɣ-dd, ma ticejjura n aremman ttnewwarent. 12 Tuɣa war dd-arriɣ taynit aqa ggiɣ ixef inu deg ikarruten n řgens inu igellden."