Asargeb 4

1 Awarni man aya, xzar, ict n tewwart tennurzem deg ujenna. Uca tmijja i sřiɣ akidi dd-issawařen am yijj n usuḍi deg uyicc n icarri, tenna: “Geɛɛed da, xenni Necc ad ac ssecneɣ min ggur ad imsar awarni man aya." 2 Řexdenni ireḥḥef ayi-dd Arruḥ, u xzar, ijj n řɛarc ibedd deg ujenna, tuɣa Netta iqqim xas. 3 U tifras n Wenni xas iqqimen am weẓru n yaspis d sardiyus, uca tasřit n wenẓar n iseynuten i-dd-ittennḍen i řɛarc iḍhar am weẓru n smaraxt. 4 Quwwaren as i řɛarc arebɛa u ɛicrin n řekrasi igellden uca arebɛa u-ɛicrin n imɣaren tuɣa qqimen x řekrasi igellden, arḍen arruḍ d acemřař, ɣarsen x uzeǧif ttijan n wureɣ. 5 Uca zi řɛarc nni tteffɣen-dd zzayes wajjajen d assamen d tmijjawin. Zzat i řɛarc areqqen sebɛa n iṣefḍawen, tina d sebɛa n Arruḥat n AREBBI. 6 Ɣar zzat n řɛarc tuɣa din ijj n řebḥar n zzaj, igga am akristal. Di řwesṭ n řɛarc d min d as dd-innḍen tuɣa din arebɛa n imuddaren, ɛemmaren s tiṭṭawin marra ɣar zzat d ḍeffar. 7 Amuddar amezwaru yarwes deg wayrad, ameddar wiss tnayen yarwes deg uɛejmi, ameddar wiss třata tuɣa aɣembub nnes axmi n bnadem uca amuddar wiss arebɛa yarwes deg ugider iṭṭawen. 8 Kuř ijjen zi arebɛa n imuddaren tuɣa ibedd, tteffɣen-dd zeg waccaren nnes d sennej setta n wafriwen i dd as dd-innḍen, ɛemmaren s tiṭṭawin ɣar daxeř. Nitni war ẓrin arraḥet ass d ǧiřet, nnan: “Amqeddas, amqeddas, amqeddas d SIDI AREBBI, Amzemmar x kuřci d wenni tuɣa, d wenni iǧan, d wenni dd ɣa yasen." 9 Uca xmi ɣa wcen arebɛa n imuddaren aɛuǧi d ccan d uqadi i wenni iqqimen x řɛarc, d wenni iddaren i řebda qaɛ - “Amin!” - 10 xenni arebɛa u ɛicrin n imɣaren wḍan ɣar temmurt ɣar zzat n wenni iqqimen x řɛarc, sejden i wenni iddaren i řebda qaɛ - “Amin!” - uca ssarsen ttijan nsen ɣar zzat i řɛarc, nnan: 11 “Cek, a Siditneɣ d AREBBI nneɣ, tesdaheǧed ad teksid aɛuǧi d ccan d jjehd, maɣar Cek d wenni iggin marra timesřayin-a, u aqa atent din u ttwaxeřqent s řxaḍar nnec!"