Asargeb 15

1 Uca ẓriɣ deg ujenna ict n řeɛřamet nneɣni, d tameqqrant d tanebhet: sebɛa n lmalakat nni dd-iwyen sebɛa n jjrayeḥ tineggura, minzi ikmeř zzaysent weɣḍab n AREBBI. 2 Uca ẓriɣ ca ittemcabeh di řebḥar n zzaj, wenni ixeǧḍen ak-d tmessi, uca inni iɣellben x řweḥc d řexyař nnes d nnumru n yisem nnes, bedden x řebḥar n zzaj, ɣarsen lharpat n AREBBI. 3 Nitni ɣennjen izři n uṣebbeḥ n Musa, amsexxar n AREBBI, d yezři n uṣebbeḥ n Yezmar, qqaren: “D timeqqranin d tṣebḥanin řexdayem nnec, a, SIDI AREBBI, Amzemmar x kuřci, řexdayem nnec d tasegda d tidett, a Ajeǧid n n zzmanat! 4 Man wen war Cek itteggʷeden, a SIDI, man wen war issemɣaran Isem nnec? Cek weḥḥdek i iǧan d amezdag qaɛ, maɣar marra řegnus ad dd-asen, ad sejden zzatek, minzi Cek tbaned d amsegged di řeḥkamat nnec." 5 Awarni as ẓriɣ, aqa tennurzem Zzawect Tameqqrant n Tzeddiɣt n Cchadet deg ujenna, 6 uca sebɛa n lmalakat nni ɣar ǧant sebɛa n jjrayeḥ ffɣent-i-dd zi Zzawect Tameqqrant, yarḍent řeqṭen azdad izdigen ittissiqen, uca ɣarsen x idmaren ijj n webyas n wureɣ. 7 Uca ijjen zi arebɛa n imuddaren iwca asen i sebɛa n lmalakat sebɛa n ṭṭawyat, ccurent s weɣḍab n AREBBI, wenni d Tudart i řebda qaɛ. “Amin!" 8 Uca tᵉttwaɛemmar Zzawect Tameqqrant s ddexxan i dd-itteffɣen zeg uɛuǧi n AREBBI u zi jjehd nnes. Uřa d ijjen war izemmar ad dd-yadef ɣar Zzawect Tameqqrant ař ɣa kkent qaɛ sebɛa n jjrayeḥ tinni dd-iwyen sebɛa n lmalakat.