Izehhiden 91

1 Tmijja tamezwarut: Wenni izeddɣen deg udurri n Umɛuǧi x kuřci, aqa netta ad issens di tiři n Umzemmar x kuřci. 2 Tmijja wiss tnayen: Ad iniɣ i SIDI: Cek d amcan inu n tarewřa d lburj inu, AREBBI inu, Wenni x ttecřeɣ! 3 Tmijja tamezwarut: Maɣar Netta ad cek ifekk zi řfex n ineymaren n ijḍaḍ, zi ṭṭaɛun yareddǧen. 4 S arric nnes ad cek ideř, sadu wafriwen nnes ad tafed adurri. Řmanet nnes d taseddart tameqqrant d arruḍ n wuzzař. 5 War tᵉtteggʷeded ca zeg unexřiɛ n ǧiřet, zi fřitca n řqews i din iṭṭawen s wass, 6 uřa zi ṭṭaɛun i dd-ittennḍen di taǧest, zi lhalak i yareddǧen s uziř. 7 Waxxa ad wḍan ařef ɣar uɣezdis nnec u ɛecra ařef ɣar afus afusi nnec, ɛad war cek dd-ittikkʷiḍ. 8 Ad twařid aya s tiṭṭawin nnec waha, ad tẓared mammec ɣa ittwaxřef zeg iɛeffanen. 9 Tmijja wiss tnayen: Maɣar xak: ‘Cek a SIDI, aqa Cek d amcan inu n tarewřa!’ Tmijja tamezwarut Aqa cek teggid Amɛuǧi x kuřci d tazeddiɣt i yixef nnec, 10 war dayek tneṭṭeḥ tuɛeffna, uřa d ict n jjriḥect war dd-tqarrab ca ɣar uqiḍun nnec, 11 maɣar Netta ad xak yumur lmalakat nnes, maḥend ad cek ḥḍant di marra ibriden nnec. 12 Ad cek ksin x ifassen nsent, ḥima aḍar nnec war ineggeḥ aẓru. 13 Ad tɛefsed x weyrad izehharen u x třefsa, ad tɛejned x weyrad ameẓyan d řhaycet n řebḥar. 14 Tmijja wiss třata zi Arebbi: Umi dd-iqqen netta ɣari, Necc ad t ssnejmeɣ. Necc ad t ssgeɛɛdeɣ, maɣar netta issen Isem inu. 15 Netta ad ayi iřaɣa u Necc ad xas dd-arreɣ. Di řeḥṣaret aqa ayi ɣares. Necc ad t fekkeɣ, ad as ssɛuǧeɣ. 16 Necc ad t ssjjiwneɣ ak-d tuzzeggart n wussan, Necc ad as ssecneɣ asenjem inu.