Izehhiden 9
LTI1 I umeqqran n imeɣnajen. S teɣnint n ‘Řmewt n mmis’. Azehhed n Dawud. 2 Alif. Ad qadiɣ SIDI s marra uř inu, ad barrḥeɣ marra lmuɛjizat nnec. 3 Ad zzayek farḥeɣ ad zzayek sřiwřiweɣ. Necc ad zehhdeɣ i Yisem nnec, a Cek, Amɛuǧi x kuřci! 4 Bit. Umi řɛedyan inu dewřen ɣar ḍeffar, wḍan u ɣeřyen zzat i wudem nnec. 5 Maɣar Cek twennid ayi tasɣart inu u tbellɛed ddeɛwet inu, teqqimed x řɛarc, a Cek, d řqaḍi amsegged. 6 Gimel. Cek twebbxed řegnus, thellked aɛeffan, temḥid isem nsen i řebda qaɛ. 7 Hi. Řeɛdu, aqa nitni ttwaqḍan, aqa aten d řxirbat i řebda. Tɣeḍřed iɣrimen nsen, řidaret nsen tefna. 8 Waw. SIDI ittɣima i řebda, aqa issbedd řɛarc nnes i řeḥkam. 9 Netta ad icarreɛ ddunect s tsegda, ad iḥkem ccuɛub s řḥeqq. 10 SIDI d lburj yuɛřan i wenni iḥṣaren, ijj n lburj yuɛřan di řweqt n řeḥṣaret. 11 Inni issnen Isem nnec, ad xak ttecřen, maɣar inni xak yarezzun, war daysen tsemmḥed, a SIDI. 12 Zayin. Zehhdem i SIDI, wenni izeddɣen di Ṣihyun, barrḥem s tmegga nnes jar řegnus. 13 Minzi Netta yarezzu x usizzeř n idammen, ittxarraṣ daysen. War ittu ca iɣuyyan n yinni ittwaḥeṣṣaren. 14 Xit. Ḥinn xafi, a SIDI, xzar ɣar řeɣben inu i dd-yusin zeg inni d ayi icarrhen, Cek d wenni d ayi ɣa issgeɛɛden zi tewwura n řmewt, 15 ḥima ad barrḥeɣ s marra ccan nnec, di tewwura n yeǧis n Ṣihyun. Necc farrḥeɣ x usenjem nnec. 16 Tit. Řegnus wḍan deg weḥfur n turṣuḍi i ggin nitni s yixef nsen, iḍaren nsen ttwacedden di tracca nni ssnuffaren nitni s yixef nsen,. 17 SIDI igga Ixef nnes ad t ssnen, Netta yuɣa tasɣart. Aɛeffan innuɣ di tmegga n ifassen nnes. Ejj ifiřan ad ddendnen. Silah. 18 Yud. Iɛeffanen ad dd-dewřen ɣar řaxart, marra řegnus nni ittun AREBBI. 19 Maca amezřuḍ war ittwattu i řebda, war ittwaqeṭṭeɛ řayas n yinni ittwaḥṣaren i řebda. 20 Quf. Kkar, a SIDI, ḥima war iddikkwiř bnadem ijhed ktar. Ejj řegnus ad ttwacarrɛen zzat i wudem nnec. 21 Siggʷed i-ten, a SIDI, ejj řegnus ad ssnen aqa aten d iwdan! Silah.