Izehhiden 89

1 Axemmi n Itan, Azraḥi. 2 Ad ɣennjeɣ x tmegga n tmexsiwt icewwaren n SIDI i řebda, ad barrḥeɣ řaman nnec s uqemmum inu zi jjiř ař jjiř. 3 Maɣar nniɣ: “Tamexsiwt icewwaren tᵉttwabna i řebda, aqa tḍemned řaman nnec deg ijenwan." 4 “Necc ggiɣ ijj n Řɛahd ak-d wenni zzayi ittwafarzen, jjuǧeɣ i umsexxar inu Dawud: 5 ‘Necc ad ḍemneɣ zzariɛet nnec i řebda u ad bniɣ řɛarc nnec zi jjiř ař jjiř.’” Silah. 6 Ijenwan ttqadan Cek x lmuɛjizat nnec, a SIDI, deg wegraw n imqeddasen ttqadan Cek x řaman nnec. 7 Maɣar man wen deg iseynuten izemmar ad ittwaqedd ak-d SIDI, man wen i iǧan jar warrawen n irebbiten izemmar ad imqudda ak-d SIDI? 8 Arebbi iwɛar aṭṭas deg wegraw n imqeddasen, marra inni d as dd-innḍen tteggʷeden zzayes. 9 A SIDI, AREBBI n řɛeskarat, man wen ɣar iǧa tizemmar am Cek, a SIDi! Řaman nnec ittenneḍ i Cek. 10 Cek tḥekkmed x nnfaxet n řebḥar. Xmi dd-ttnekkaren řemwaj nnes, aqa Cek taressid i-ten. 11 Aqa třebzed Rahab am yijjen wenni issnuqqben, tzeǧɛed řɛedyan nnec s uɣiř nnec ijehden. 12 Nnec d ijenwan, nnec uřa d tammurt. Ddunit d uɛemmar nnes teggid asen dsas. 13 Cek txeřqed-dd ccamal d ljanub, Tabur d Hirmun sřiwřiwen s Yisem nnec. 14 Aqa ɣarek aɣiř i di teggid taryast, afus nnec ijhed, afus afusi nnec ittwassgeɛɛad. 15 Tasegda d řḥeqq aqa aten d dsas n řɛarc nnec, tamexsiwt icewwaren d řaman ittizwaren zzat i wudem nnec. 16 Sseɛd n řgens i issnen ad meyyzen asuḍi s wesruddeḥ n řbuq, a SIDI, nitni ad uyuren di tfawt n wudem nnec. 17 Nitni ad farḥen ass marra s Yisem nnec uca ad dd-ttwassgeɛɛden s tsegda nnec, 18 maɣar Cek d řemřaḥet n jjehd nsen, icc nneɣ ad ittwassgeɛɛed s řxaḍar nnec. 19 Taseddart nneɣ n useřqi n SIDI, ajeǧid nneɣ aqa-t n Umqeddas n Israil. 20 Ict n twařa tuɣa tessiwřed di řewḥiy x Umtiqqi nnec, tennid: “S ufus n ijj n bu-teɣruḍt ggiɣ twiza, ijj wenni ittwafarzen zi řgens ssgeɛɛdeɣ-t. 21 Necc ufiɣ Dawud, amsexxar inu, dehneɣ t s zzect iqeddsen, 22 maḥend afus inu ad yiři imten akides, wah aɣiř inu ad t issemḥed. 23 Řeɛdu war t issaggʷad, mmis n řmuɛṣiyyet war t iḥeṣṣar. 24 Inni t iḥeṣṣaren ad ten řebzeɣ zzat i wudem nnes, inni t icarrhen ad ten wteɣ. 25 Řaman inu d tmexsiwt inu icewwaren, aqa aten akides i ɣa yiřin, ad ittwassgeɛɛed yicc nnes s Yisem inu. 26 Ad ssarseɣ afus nnes x řebḥar, afus nnes afusi x iɣezran. 27 Netta ad xafi dd-iřaɣa: ‘Aqa Cek d Baba inu, Arebbi inu, d Taṣḍart n usenjem inu!’ 28 Necc ad t ggeɣ d amenzu inu, Amɛuǧi x ijeǧiden n temmurt. 29 I řebda ad ḥḍiɣ tamexsiwt inu icewwaren zzates, u Řɛahd inu ad ɣares iqqim s řmanet. 30 Ad ẓẓuɣ zzariɛet nnes i řebda, řɛarc nnes min ɣa kken ussan n ujenna ǧan. 31 Mařa iḥenjiren nnes ḥeyyden x Ccariɛa inu, war gguren ak-d lfarayiḍ inu, 32 mařa ssfesden tiweṣṣa inu, war ḥeṭṭin řumurat inu, 33 xenni ad xeǧṣeɣ aɛeddu nsen s weɛmud, řmuɛṣiyyet nsen s teyyita. 34 Maca war xasen ttekkseɣ tamexsiwt inu icewwaren, war nekkareɣ řmanet inu. 35 War ttɣeṣṣabeɣ Řɛahd inu, min dd-iffɣen zeg iyencicen inu, war t ttbeddiřeɣ. 36 Necc jjuǧeɣ ict n twařa ɣar tqeddast inu: ‘War ssxarriqeɣ ɛemmarṣ x Dawud!’ 37 Zzariɛet nnes ad teqqim i řebda, u řɛarc nnes ad din ibedd zzati am tfuct. 38 Netta ad iqqim ibedd i řebda am tziri u acehhad deg iseynuten aqa-t d amtiqqi.” Silah. 39 Maca Cek tɛarrned t ɣar uɣezdis, tenḍared t, Cek tfuggmed x umedhun nnec. 40 Cek tenḍared Řɛahd ak-d umsexxar nnec, tfesded ttaj n weɛzař nnes s ubeǧaɛ n temmurt. 41 Tɣeḍřed marra řeḥyud nnes, thedmed tineddam nsen ifaryen. 42 Marra inni dd-ikkin abrid keccḍen t, netta idweř d aseḥqar i jjiran nnes. 43 Cek tessgeɛɛded afus afusi n yinni t iḥeṣṣaren, tessfarrḥed marra řɛedyan nnes. 44 Cek tessenqeřbed řeqḍeɛ n ssif nnes, Cek tejjid t war ittɣimi ibedd deg umenɣi. 45 Cek tessbedded aẓri nnes, řkursi nnes igellden tenḍared t ɣar temmurt. 46 Cek tessemẓid as ussan n temẓi nnes, tedřid t s řefḍiḥet. Silah. 47 Ař meřmi ɛad, a SIDI, ad tessnuffared Ixef nnec břa qeṭṭu, ad yarɣ wesɛar nnec am tmessi? 48 Ɛqeř x řmijař n tudart inu! Mayemmi dd-txeřqed marra arraw n bnadem amenni baṭeř? 49 Man aryaz ijehden war ittwiři řmewt, man aryaz i ɣa ifekken řeɛmar nnes zeg ufus n řaxart? Silah. 50 A Sidi inu, mani ǧant tmegga n tmexsiwt nnec n zic, tinni x tuɣa tejjuǧed i Dawud s řmanet nnec? 51 A Sidi inu, ɛqeř x useḥqar n imsexxaren nnec, nni arebbuɣ deg weḥsin inu zeg ubarru n marra řegnus, 52 i zi d ayi sseḥqaran řɛedyan nnec, a SIDI, i zi sseḥqaran iṣuraf n umedhun nnec. 53 Ad ittwabarek SIDI i řebda qaɛ! Amin, wah, amin!