Izehhiden 84

1 I umeqqran n imeɣnajen. S teɣnint n Ujitti, aryaz zi Jat. Zeg ayt n Quraḥ. Azehhed. 2 Mammec ttɛizzent tzeddiɣin nnec, a SIDI n řɛeskarat! 3 Řeɛmar inu dayes meẓri, wah, ifenna s uweḥḥec x řemraḥat n SIDI, uř inu d ddat inu sřiwřiwen i Arebbi iddaren. 4 Uřa d ẓẓawec ittaf ɛad ict n taddart, u tafarǧest tufa ijj n řɛucc i yixef nnes i di tessrussa issḍawen nnes, ɣar iɛalṭaren nnec, a SIDI n řɛeskarat, Ajeǧid inu d AREBBI inu! 5 Sseɛd nsen n yinni izeddɣen di Taddart nnec, aqa aten ttṣebbaḥen i Cek břa qeṭṭu. Silah. 6 Sseɛd n iwdan inni ittafen jjehd nsen dayek, inni iḥeṭṭan ibriden igeɛɛden ɣar Zzawect nnec Tameqqrant deg wuř nsen. 7 Xmi ttcuqan deg ijj n řewḍa n teɣzurt n tcejjura n umettin, arrin t d řɛunṣar. Uřa d anẓar amezwaru ad ten issduriy s lbarakat. 8 Nitni gguren zi jjehd ař jjehd, ad dd-banen ɣar AREBBI di Ṣihyun. 9 A SIDI, AREBBI n řɛeskarat, seř i tẓaǧit inu, sḥess, a AREBBI n Yaɛqub! Silah. 10 A AREBBI, Cek d taseddart nneɣ n useřqi, aqa xzar ɣar wudem n umedhun nnec! 11 Maɣar ijj n wass di řemraḥat nnec iḥřa x wařef n wussan nneɣni. Meɛlik ufiɣ ad beddeɣ x tnebdat n Taddart n AREBBI inu, uřa d atlaɛ deg iqiḍan n tuɛeffna. 12 Maɣar SIDI AREBBI d tafuct d tseddart i useřqi, SIDI ad iwc aḥinni d uɛuǧi. Netta war issɛizzi řxar deg inni igguren s řekmaret. 13 A SIDI n řɛeskarat, sseɛd n bnadem nni dayek ittiqqan.