Izehhiden 74
LTI1 Axemmi n Asaf. Mayemmi, a AREBBI, tenḍared i řebda? Mayemmi ɣa yarɣ weɣḍab nnec x wuǧi n ddmani n tarewsa nnec? 2 Xemmem di tmesmunt nnec nni tuɣa tkesbed zeg wecḥař uya, taqbič n tesɣart n řwart nnec tenni tefdid, adrar n Ṣihyun wenni x tuɣa tzeddɣed. 3 Sgeɛɛed iṣuraf nnec ɣar min yareddǧen i řebda. Řeɛdu yarra marra d řxarbet di Zzawect Iqeddsen. 4 Inni tuɣa Cek iḥeṣṣaren ssbuɛruten di řwest n wemcan nnec n umsagar, ssbeddan řeɛřamat nsen d řeɛřamat. 5 Aqa netta idweř ittwassen am yijjen issgeɛɛad ccwaqar di cbarq iqqnen, 6 u xenni arẓin marra inqacen nnes jmiɛ, s ccaqur d ifḍisen. 7 Nitni qqeden timessi i Tzawiyyin nnec Iqeddsen, aqa ɛarran Tazeddiɣt n Yisem nnec ař tammurt. 8 Nitni nnan deg wuř nsen: “Ejj aneɣ ad tent nareddeǧ marra!” Ammu i ssarɣen nitni marra imucan n umsagar n Arebbi di temmurt. 9 Řeɛřamat nneɣ war tent nettwiři ɛad, war din uřa d ijj n unabi ɛad, uca uřa d ijj jar aneɣ issen ař meřmi ɛad. 10 Ař meřmi, a AREBBI, ad zzayek istehza wenni iḥeṣṣaren? Ma ad iceqqef řeɛdu i řebda deg Yisem nnec? 11 Mayemmi i tᵉttegged ad dayneɣ ismeḥ afus nnec, afus nnec afusi? Suffuɣ i-t zeg weḥsin n upartessu nnec, qḍa xasen. 12 Zeg wecḥař uya aqa AREBBI d Ajeǧid inu. Netta d wenni i dd-ittawyen isenjamen di řwest n temmurt. 13 S tzemmar nnec tfetqed řebḥar, izeǧifen n řhaycat teddzed i-ten x waman. 14 Cek třebzed izeǧifen n ‘Liviyatan’, tewcid i-t d macca i řewḥuc n řexřa. 15 Cek tfeǧqed řɛunṣar d teɣzart, Cek tessiẓɣed iɣezran ittazzřen břa qeṭṭu. 16 Ass nnec, nnec uřa d ǧiřet, Cek teggid din tafawt d tfuct. 17 Cek tessmetned marra iymiren n temmurt, anebdu d tgerst aqa teggid asen tifras nsen. 18 Ɛqeř x man aya: řeɛdu isseḥqar SIDI, ijj n řgens abuhaři iceqqef deg Yisem nnec. 19 War ttic řeɛmar n tejlilleḥt nnec i řewḥuc, war tᵉttu i řebda tudart n řmusakin nnec. 20 Xzar ɣar Řɛahd, maɣar deg imucan n ṭṭřam di temmurt aqa daysen tudrin ɛemmarent s lɛunf. 21 War ttejji wenni ittwaḥeṣṣaren ad dd-iɛqeb s useḍḥi, ejj řmeskin d umezřaḍ ad ṣebbḥen Isem nnec. 22 Kkar bedd, a AREBBI, belleɛ ddeɛwet nnec, xemm mammec Cek isseḥqaran ibuhařiyyen ass imun. 23 War ttᵉttu ca aɣuyyi n iɣrimen nnec, asbuɛar n yinni i xak iɣewwɣen ittgeɛɛad ɣar ujenna břa aqeṭṭu.