Izehhiden 55

1 I umeqqran n imeɣnajen. Ak-d uzenzun x ifiřan. Axemmi n Dawud. 2 A AREBBI, seř i tẓaǧit inu, war ssnuffara ca Ixef nnec zzat i tutra inu. 3 Ḥḍa ayi u arr-dd xafi. Necc ttraḥeɣ ttaseɣ-dd ɣar zzat d ḍeffar, am ttcetciɣ u ssɣunfiɣ, 4 zi ssibbet n řḥess n řeɛdu, zeg uhuddi n uɛeffan. Maɣar nitni hejmen-dd xafi s řmuɛṣiyyet, ḍeffaren ayi s uxeyyeq. 5 Uř inu ittfarfir dayi daxeř, inexřiɛen n řmewt wḍan-dd xafi. 6 Tiggʷudi d tarjijit ttᵉṭṭfent ayi, uřa d arjef iḥeṣṣar ayi. 7 Necc nniɣ: “Mři d ayi wcin afriwen am tedbirt, xenni iři ḍwiɣ, ad zedɣeɣ di ca n wemcan nneɣni." 8 Xzar, ad arewřeɣ ɣar řaggʷaj qaɛ, ad ssenseɣ di řexřa. Silah. 9 Ad deɣyeɣ ɣar wemcan n ufekki, ḥima ad ttwafekkeɣ zeg usemmiḍ, zi tḥaryaḍt. 10 Ṣarḍ i-ten, a Sidi inu, sebḍa iřes nsen, minzi ttwařiɣ lɛunf d umenɣi di tendint. 11 Ass d ǧiřet quwwaren nitni i řeḥyuḍ nnes. Ɣar daxeř n tendint aqa din řeɣben d tamara, 12 řɣecc aqa-t daxeř nnes, azzay nnes war zzayes ittḥeyyid ca ddeǧ d wecmat. 13 Maɣar war iǧi d řeɛdu wenni d ayi isseḥqaran, minzi aya zemmareɣ ad t ksiɣ. War iǧi uřa d wenni d ayi icarrhen d wenni issemɣaran ixef nnes s wawař xafi, minzi zzayes zemmareɣ ad nnuffareɣ! 14 Maca aqa d cek, a bnadem, cek d aqrin inu, ameddukkeř inu d jjar inu! 15 Neccin inni igguren d lemliḥ ak-d wayawya di ttiqqet, neggur ɣar Taddart n AREBBI deg uhimur. 16 Ad xasen tewḍa řmewt ařami i ɣa hwan am ddaren di řaxart, maɣar aqa din řɣar di tzeddiɣin nsen, deg wuřawen nsen. 17 Necc, wah, necc ad řaɣiɣ x AREBBI, SIDI ad ayi issenjem. 18 Ɣar tmeddit, ɣar tuffut u s uziř ad cetciɣ, ad ssɣunfeɣ u Netta ad iseř i tmijja inu. 19 Netta igga aṣřaḥ x řeɛmar inu s řehna zeg inni ɣari dd-iqarrben i wehjam, minzi aqa-ten deg waṭṭas ḍidd inu. 20 Arebbi ad iseř, ad ten dd-issehwa. Netta ittɣima x řɛarc zeg wecḥař uya. Silah. Aqa nitni war ttbeddiřen, war tteggʷeden ca AREBBI. 21 Netta ineṭṭar afus deg inni ak-d wi igga řehna, netta issexsar řɛahd nnes. 22 Aqemmum nnes yarḍeb ḥsen zi trussi, maca deg wuř nnes itturja amenɣi. Awařen nnes d iřeqqaɣen x zzect, maca aqa aten am řesyuf ttwajebden. 23 Nḍar amnus nnec x SIDI u Netta ad dayek itthilla. Ɛemmarṣ war ittejji amsegged ad ifarɣ. 24 Cek maca, a AREBBI, ad ten tessehwid deg weḥfur n turṣuḍi. Iryazen n idammen d řɣecc war ttkemmřen azyen n wussan nsen. Maca necc ttecřeɣ xak.