Izehhiden 47

1 I umeqqran n imeɣnajen. Zeg ayt n Quraḥ. Azehhed. 2 A marra řegnus, wtem deg ifassen, duqqzem s usřiwřew zzat i AREBBI. 3 Maɣar SIDI, Amɛuǧi x kuřci, aqa issaggʷad, Netta d ijj n ujeǧid d ameqqran x marra tammurt. 4 Netta issaḍara aneɣ řegnus, Netta yarra ccuɛub sadu iḍaren nneɣ. 5 Netta ifarrez tasɣart nneɣ i neccin, tenni d afeyyec n Yaɛqub wenni tuɣa ittexs. Silah. 6 AREBBI yuři sennej s usřiwřew, SIDI, ɣar tmijja n usuḍi deg uyicc n icarri. 7 Zehhdem i AREBBI, zehhdem! Zehhdem i Ujeǧid, zehhdem! 8 Maɣar AREBBI d Ajeǧid x marra tammurt. Zehhdem aya i uxemmi dayes. 9 AREBBI iḥekkem x řegnus, AREBBI ittɣima x řɛarc nnes iqeddsen. 10 Tarwa n taṣiřet n řegnus ttwassmunen ak-d řgens n AREBBI n Ibrahim, maɣar tiseddariyyen i useřqi n temmurt i AREBBI. Netta aqa ittwassɛuǧa qaɛ.