Izehhiden 44

1 I umeqqran n imeɣnajen. Zeg ayt n Quraḥ. Axemmi. 2 A AREBBI, neccin nesřa tt s imezzuɣen nneɣ, řejdud nneɣ ḥajan aneɣ tt: Cek teggid ict n tmeggit deg wussan nsen, deg wussan n wecḥař uya. 3 S ufus nnec aqa tessuffɣed řegnus zi tesɣart nsen, xenni teẓẓud ten dayes. Cek teggid řɣar di ccuɛub, tbezzɛed ten. 4 Nitni maca war warten tammurt s ssif, aɣiř nsen war d asen dd-yiwi asenjem, maca afus nnec afusi, aɣiř nnec d tfawt n wudem nnec, minzi nitni ufin arḍa di tiṭṭawin nnec. 5 Aqa Cek d Ajeǧid inu, a AREBBI! Ewc ɛad řexxu řumur i isenjamen n Yaɛqub. 6 Akidek ad neɣḍeř inni d aneɣ iḥeṣṣaren, s Yisem nnec ad neɛfes x yinni xaneɣ ittemɛařan. 7 Maɣar war ttecřeɣ x řqews inu, ssif inu war d ayi issenjam. 8 Maɣar Cek tessenjamed aneɣ zeg inni d aneɣ iḥeṣṣaren, tessbehdiřed inni d aneɣ icarrhen. 9 Nṣebbeḥ i AREBBI ass marra, ad nqada Isem nnec i řebda. Silah. 10 Maca řexxu tenḍared aneɣ, tessbehdařed aneɣ, Cek war tᵉtteffiɣed ca ak-d řɛeskarat nneɣ ɣar umenɣi. 11 Cek tejjid aneɣ nettrakkwař zzat i wenni d aneɣ iḥeṣṣaren, inni d aneɣ icarrhen ttkeccḍen min ttexsen i yixef nsen. 12 Cek tewcid aneɣ am wuǧi i macca, tezzuzared aneɣ jar řegnus. 13 Cek tezznuzid řgens nnec s walu, deg uzzenzi nsen war ɣarek bu řefḍeř. 14 Cek tᵉttegged aneɣ d řḥegra i wajjaren nneɣ, d astehzi d ubehdeř ɣar yinni d aneɣ-dd ittennḍen. 15 Cek tᵉttegged aneɣ d amedya jar řegnus, tᵉttegged ad xaneɣ hezzen azeǧif jar ccuɛub. 16 Ass marra řɛar inu aqa-t zzati jar tiṭṭawin inu, řeḥya idřa aɣembub inu, 17 zi tmijja n yinni isseḥqarran, ttceqqafen, zi ssibbet n řeɛdu u n wenni yarezzun antaqem. 18 Aya marra ikka xaneɣ, maca war Cek nettu, war nɣecc ca di Řɛahd nnec. 19 Uř nneɣ war idwiř ɣar ḍeffar, iṣuraf nneɣ war dd-ffiɣen ca zeg umesruq nnec, 20 waxxa Cek třebzed aneɣ deg wemcan n wuccanen n řexřa, tedřid aneɣ s tiři n řmewt. 21 Mři tuɣa nettu Isem n AREBBI nneɣ, nesswiẓẓeḍ ifassen nneɣ ɣar yijj n arebbi d aɣrib, 22 ma iři AREBBI war yarezzu di man aya? Aqa Netta yareggeb x min innuffaren deg wuř. 23 Maɣar di ṭṭweɛ nnec neqqen aneɣ kuř ass, aqa ḥessben aneɣ am wuǧi n tɣarṣt. 24 Faq, mayemmi tᵉṭṭṣed, Sidi inu? Faq, war d aneɣ neṭṭar i řebda! 25 Mayemmi ɣa teffared udem nnec, ad tᵉttud řeɣben d ddeǧ nneɣ? 26 Maɣar řeɛmar nneɣ ittaḍar ɣar tɛejjajt, aɛeddis nneɣ iřeṣṣeq di temmurt. 27 Kkar, ewc aneɣ afus, fdi xaneɣ di ṭṭweɛ n tmexsiwt nnec icewwaren.