Izehhiden 42

1 I umeqqran n imeɣnajen. Axemmi n ayt n Quraḥ. 2 Am iɣayḍ n wezɣar ittmeẓri ɣar tɣezratin n waman, ammu uřa d uř inu ittmeẓri ɣarek, a AREBBI. 3 Řeɛmar inu ittfada ɣar AREBBI, ɣar Arebbi iddaren. Meřmi i ɣa adfeɣ, ad baneɣ zzat i wudem n AREBBI? 4 Imeṭṭawen inu tuɣa aten d aɣrum inu ass d ǧiřet, umi d ayi qqaren ass imun: “Mani iǧa AREBBI nnec?" 5 Necc ttidareɣ di man aya u ssfarrɣeɣ řeɛmar inu dayi, maɣar necc ttnumeɣ ggeɛɛdeɣ deg ijj n uhimur iqqen, am ggureɣ akidsen ɣar Taddart n AREBBI, s řḥess n usřiwřew d uqadi, ijj n řɣaci ittɛeyyden. 6 A řeɛmar inu, mayemmi tqenḍed ammu, thekkweřed dayi? Raja AREBBI, maɣar ad qqimeɣ ad t qadiɣ ɛad x isenjamen i dd-itteffɣen zi zzat n wudem nnes. 7 A AREBBI, řeɛmar inu iqneḍ ammu dayi. X uya ttidareɣ Cek zi temmurt n L’Urdun, zeg idurar n Hirmun, zeg idurar n Miṣɛara. 8 Řḥemřet tᵉttřaɣa i řḥemřet nneɣni ɣar zzhir n icercuren nnec, marra řemhamed nnec d řemwaj nnec kkin xafi. 9 Ejj SIDI ad iweṣṣa tamexsiwt nnes icewwaren s wass, uca ad ɣari yiři yijj n izři di ǧiřet, aqa-t d tẓaǧit i Arebbi n tudart inu. 10 Necc ad iniɣ i Arebbi: “Taṣḍart inu d Cek, mayemmi d ayi tᵉttud? Mayemmi ggureɣ deg werruḍ d abarcan zi ssibbet n ddeǧ n řeɛdu?" 11 Inni d ayi iḥeṣṣaren ssbehttřen ayi s ict n tajjut ineqqen deg iɣsan inu, umi d ayi qqaren: “Mani iǧa AREBBI nnec?" 12 A řeɛmar inu, mayemmi tqenḍed ammu, thekkweřed dayi? Raja AREBBI, maɣar ad t qadiɣ ɛad x isenjamen i dd-itteffɣen zi zzat n wudem inu, u zi zzat n AREBBI inu.