Izehhiden 18

1 I umeqqran n imeɣnajen. N umsexxar n SIDI. N Dawud, wenni issiwřen awařen n yezři-ya i SIDI, deg wass umi t ifekk SIDI zeg ufus n marra řɛedyan nnes u zeg ufus n Cawul. 2 Netta inna: “Necc ttexseɣ Cek, a SIDI, jjehd inu d Cek. 3 SIDI d Tasḍart inu d lburj inu d amfekki inu, Arebbi inu, Taṣḍart inu, necc ɣares arekkwařeɣ. Cek d taseddart inu n useřqi d yicc n usenjem inu, lburj inu yuɛřan. 4 Necc řaɣiɣ-dd x SIDI, wenni isdaheǧen asemɣar, u necc aqa ttwassnejmeɣ zi řɛedyan inu. 5 Iseɣwan n řmewt nnḍen ayi-dd, ssiggʷedent ayi řḥemřat n waman ihajen. 6 Iseɣwan n řaxart carfen ayi, tixecfin n řmewt ḥṣarent ayi. 7 Di řeḥṣaret inu řaɣiɣ-dd x SIDI, x AREBBI inu i x dd-řaɣiɣ. Zi Zzawect nnes Tameqqrant isřa Netta i tmijja inu, iɣuyyan inu udfen ɣar imezzuɣen nnes. 8 Xenni tenhezz u tarjij temmurt, dsusa n idurar ttraḥen-dd ttasen-dd u nhezzen, maɣar ittwassarɣ weɣḍab nnes. 9 Igeɛɛed ddexxan zeg wenzaren nnes, timessi zeg uqemmum nnes tṣarḍ, ittwassarɣ zzayes řefḥem. 10 Netta ijja ajenna ad yaḍar uca xenni ihwa-dd Netta, aqa din ijj n useynu ibbumbes sadu iḍaren nnes. 11 Indeh x ijj n ukirub, wah, iḍwa, Netta iḥewwem x wafriwen n usemmiḍ. 12 Netta igga taǧest am yijj n useřqi x yixef nnes, aɛiccu nnes aqa-t deg wenneḍ nnes, aman ibbubbsen, iseynuten ibbarecnen. 13 Zi tissiqt qibač nnes ttekken iseynuten nnes, ak-d tebruri d řefḥem itteḥduduqen. 14 SIDi igga ajjaj ad idduqqez deg ijenwan, Amɛuǧi x kuřci igga tmijja nnes ttnefrara: tabruri d řefḥem itteḥduduqen. 15 Netta issekk fřitcat n řqews nnes uca ibezzeɛ i-ten, izzaryeḍ assamen uca issiggʷed i-ten. 16 Tisiwin n iɣezran dewřent ttbanent, dsusa n ddunect dewřen ɛarran zeg uweddeb nnec, a SIDI, zeg usuḍi n řeɛwin zeg wenzaren nnec. 17 Zi sennej isswiẓẓeḍ-dd afus nnes, yiwi ayi, ijbed ayi-dd zeg waman mɣaren. 18 Netta ifekk ayi-dd zi řeɛdu inu ijehden, zeg inni d ayi icarrhen, minzi nitni tuɣa jehhden xafi. 19 Nitni ḥṣaren ayi deg wass n arẓiyyet inu, maca SIDI tuɣa d amɛemmed inu. 20 Netta indeh ayi ɣar ttasiɛ uca issenjem ayi, maɣar Netta tuɣa issɛizza ayi. 21 SIDI ixřef ayi ɛlaḥsab tasegda inu, ɛlaḥsab tazdugi n ifassen inu ixeǧeṣ ayi. 22 Maɣar necc ḥḍiɣ ibriden n SIDI, war ḥeyydeɣ ca x AREBBI inu s uxeyyeb. 23 Maɣar marra lfarayiḍ nnes tuɣa jar tiṭṭawin inu, war ḥeyyideɣ ca x tweṣṣa nnes. 24 Aqa-yi kemmřeɣ nican akides, ḥḍiɣ ixef inu zi řmuɛṣiyyet inu. 25 SIDI ixřef ayi anect n tsegda inu, anect n tazdugi n ifassen inu zzat i tiṭṭawin nnes. 26 I umeddukkeř amtiqqi i teǧid Cek d ameddukkeř amtiqqi, i bu-teɣruḍt ikemmřen i teǧid Cek tkemmřed. 27 I wenni ittwassizedgen aqa Cek d amezdag, ak-d wenni ifarɣen, aqa tᵉttmuɣzřed. 28 Cek tessnejmed řgens ittwaḥṣaren, maca tiṭṭawin ɛeffarent ad tent tessehwid. 29 Minzi Cek d řefnar inu, a SIDI! AREBBI inu ittegg tafawt di taǧest inu. 30 Minzi akidek ad azzřeɣ x ict n bandiyya, ak-d AREBBI inu ad negzeɣ x ijj n řḥiḍ. 31 Abrid n Arebbi ikmeř, min iqqar SIDI ittwaṣeffa di tmessi. Netta d aseřqi i marra inni ɣares yarekkwařen. 32 Maɣar man wen i iǧan d Arebbi, mɣir SIDI, u man wen i iǧan d taṣḍart, mɣir AREBBI nneɣ? 33 Arebbi wenni d ayi ittbeysen s jjhed, wenni d ayi itticen abrid inu ikmeř. 34 Netta igga iḍaren inu am yinni n tudadin, Netta yarra ayi ad beddeɣ x řegɛudi inu. 35 Isseřmed ifassen inu i umenɣi, iɣaǧen inu maḥend ad meḥḍen ijj n řqews n nnḥas. 36 Tewcid ayi taseddart n useřqi n usenjem nnec, afus nnec afusi d asenned inu, awaḍeɛ nnec tessemɣared ayi. 37 Aqa teggid ttasiɛ i iṣurifen inu sadu inu, ticeɛbin inu war meyyřent. 38 Necc ḍfareɣ řɛedyan inu u ḥarteɣ xasen, war ttɛiqibeɣ ař ten qḍiɣ. 39 Necc areddǧeɣ ten, ařami war zemmaren ad kkaren ɛawed. Nitni wḍan-dd sadu iḍaren inu. 40 Cek tbeysed ayi s jjehd i umenɣi, tarrid-dd inni ɣari dd-ikkaren ad aḍaren sadu inu. 41 Cek tewcid ayi timejjart n řɛedyan inu, n yinni d ayi icarrhen, u necc areddǧeɣ ten. 42 Nitni řaɣan, maca war din tuɣi amsenjem, řaɣan x SIDI, maca Netta war xasen dd-yarri. 43 Necc weddareɣ ten am tɛejjajt zzat i usemmiḍ, am ubeǧaɛ x ibriden farḍeɣ zzaysen. 44 Cek tfekked ayi zeg imcubbcen n řgens, teggid ayi d azeǧif n řegnus, ijj n weydud war t ssineɣ, ad ayi isexxar. 45 Mɣir řami d ayi isřa umezzuɣ nsen waha, sřin-dd ɣari. Ibarraniyyen ssniɛmiřen ssubuḍen ayi. 46 Fecřen ibarraniyyen, waxxa nnḍen asen-dd lbarajat nsen. 47 Tudart i SIDI! Ad tᵉttwabarek Teṣḍart inu. Ad ittwassgeɛɛed AREBBI n usenjem inu. 48 Arebbi wenni xafi ittentaqamen wenni d ayi itteggen řegnus sadu ufus inu, 49 wenni d ayi ittfekkan zeg ufus n řɛedyan inu, wah, Cek tessgeɛɛaded ayi tiwa n yinni d ayi ittḍaddan, Cek tessenjamed ayi zeg weryaz n řexcunet. 50 X uya, SIDI, xseɣ ad Cek qadiɣ, ad zehhdeɣ Isem nnec. 51 Netta igga isenjimen n ujeǧid nnes mɣaren, isscen tamexsiwt nnes icewwaren i umedhun nnes, i Dawud u i zzariɛet nnes i řebda.