Izehhiden 15

1 Azehhed n Dawud. A SIDI, man wen i ɣa iqqimen deg Uqiḍun nnec? Man wen i ɣa izedɣen x wedrar nnec iqeddsen? 2 Wenni igguren di řekmařet n tudart nnes wenni itteggen tasegda, wenni issawařen tidett deg wuř nnes. 3 Wenni war ittceqqafen s yiřes nnes, wenni war itteggen řɣar i imɛacaren nnes, u war ittzawar ajjar nnes. 4 Wenni immenḍaren zi Arebbi aqa ittwasseḥqar di tiṭṭawin nnes, maca inni itteggʷeden SIDI, ittweqqar i-ten. Mařa ijjuǧ netta i txessart nnes, war t ittbeddiř. 5 Wenni war itticen tamenyat n nnuqart nnes s arriba, wenni war itteṭṭfen arrecwet ḍidd n yinni war iggin s ca. Wenni itteggen man aya, war ifarreɣ i řebda.