Izehhiden 132

1 Izři n ugeɛɛed. A SIDI, idar Dawud, idar marra aweddeb nnes, 2 mammec ijjuǧ i SIDI, iwaɛd i Umzemmar n Yaɛqub: 3 “Uct, mařa ad adfeɣ ɣar taqidunt n taddart inu, ad ḥebceɣ x qama n řectu inu, 4 ad semmḥeɣ yiḍeṣ i tiṭṭawin inu, uřa d anudem i wabřiwen inu, 5 qbeř i ɣa afeɣ amcan i SIDI, ict n Tzeddiɣt i SIDI, Amzemmar n Yaɛqub!" 6 Xzar, nesřa x Ttabut di Ifrata, nufa i-tt deg iyyaren n Yaɛar. 7 Ad nadef ɣar tzeddiɣin nnes, ad nesjed i tnebdat n iḍaren nnes. 8 Kkar, SIDI, uyur ɣar arraḥet nnec, Cek d Ttabut n jjehd nnec. 9 Ejj ikehhanen nnec ad yarḍen s tsegda, imtiqqan nnec ad sřiweřwen. 10 War dd-tarri udem n umedhun nnec di ṭṭweɛ n umsexxar nnec Dawud. 11 SIDI ijjuǧ i Dawud s řaman, ɛemmarṣ ad iḥeyyed Netta x tjaǧit nnes: “Zi řɣiǧet n uɛeddis nnec ad ssɣimeɣ ijj x řɛarc nnec. 12 Mařa iḥenjiren nnec ad ḥḍan Řɛahd inu d cchadat inu, tinni d asen i ɣa ssřemdeɣ, xenni uřa d iḥenjiren nsen ad qqimen x řkursi nnec i řebda." 13 Maɣar SIDI ifarz Ṣihyun, imeẓri tt d tazeddiɣt i Yixef nnes. 14 “Wa d amcan n arrahet inu i řebda, da i xseɣ ad zedɣeɣ, Necc xseɣ t. 15 Ad barkeɣ nniɛmet n Ṣihyun, ad ssjiwneɣ imezřaḍ nnes s weɣrum. 16 Ad ssyarḍeɣ ikehhanen nnes s usenjem, imtiqqan nnes ad sřiweřwen s jjehd. 17 Dinni ad ssɣemmyeɣ ijj n uyicc i Dawud, ijj n řefnar i umedhun inu sswejdeɣ t din. 18 Ad ssyarḍeɣ řɛedyan nnes s useḍḥi, maca ad xas innuwar ttaj n weɛzař nnes."