Izehhiden 129

1 Izři n ugeɛɛed. “Zi temẓi inu ḥṣaren ayi aṭṭas n twařawin!” Ini t xenni ammu, a Israil, 2 zi temẓi inu ḥṣaren ayi aṭṭas n twařawin, maca war d ayi zemmaren. 3 Imcarrzen carzen x weɛrur inu, ggin řatarat n wecraz nsen d iziraren. 4 SIDI d amsegged. Netta iqḍeɛ iseɣwan n iɛeffanen. 5 Ejj marra inni icarrhen Ṣihyun, ad seḍḥan u ad ttwaɛarnen ɣar ḍeffar. 6 Ejj i-ten ad dewřen am arbiɛ x tzeɣwin i ittisřaw qbeř i-t ɣa qeřɛen, 7 war zzayes ittɛemmar wenni imejjaren afus nnes, uřa d wenni ittceddan icuwwafen n imendi aḥsin nnes, 8 u ḥima imsebriden war qqaren: “Lbaraka n SIDI aqa-tt akidwem!” “Neccin nbarek kenniw s Yisem n SIDI."