Izehhiden 126

1 Izři n ugeɛɛed. Umi isseɛqeb SIDI inni dd-idewřen ɣar Ṣihyun, tuɣa aneɣ axmi yinni itturjan. 2 Tuɣa aqemmun nneɣ iccur s tḍeḥḥact, iřes nneɣ iccur s usřiwřew. Nnan jar řegnus: ‘SIDI igga daysen timesřayin timeqqranin!’ 3 SIDI igga dayneɣ timesřayin timeqqranin, aqa neccin nfarḥ zzayes. 4 A SIDI, qeǧeb tameḥbast nneɣ, am mammec ttqeǧbent tiɣezratin Tammurt n Ljanub. 5 Inni izarrɛen s imeṭṭawen, ad mjaren s usřiwřew. 6 Wenni yarebbun taxancet n zzariɛet, ittru xmi dd-iggur, maca xmi dd ɣa yas, ad dd-yas s usřiwřew, ad yarbu tiqebbiḍin n imendi nnes.