Izehhiden 115

1 War iǧi i neccin, a SIDI, war iǧi i neccin, maɣar i Yisem nnec ad yiři uɛuǧi, di ssibbet n tmexsiwt nnec icewwaren d řaman nnec. 2 Mayemmi ɣa qqaren řegnus: ‘Mani iǧa xenni AREBBI nsen?’ 3 AREBBI nneɣ aqa-t deg ujenna, igga marra min d as yarḍan. 4 Řexyařat nsen n l’aṣnam aqa atent s nnuqart d wureɣ, řxedmet n ifassen n iwdan. 5 Ɣarsen aqemmum, maca war ssiwiřent, ɣarsent tiṭṭawin, maca war ttwiřint, 6 Ɣarsent imezzuɣen, maca war ttesřint, ɣarsent wanzaren, maca war ttcemmint. 7 Ifassen nsen war zemmaren ad cebbaren, iḍaren nsen war zemmaren ad uyuren. Nitni war ssuffuɣen řḥess zi tmijja nsen. 8 Ejj inni tent iggin ad daysent arewsen, kuř ijj zeg inni xasent ittecřen. 9 Israil, tceř x SIDI. Netta d twiza nsen d taseddart nsen i useřqi. 10 Taddart n Harun, tceř x SIDI. Netta d twiza nsen d taseddart nsen i useřqi. 11 Marra kenniw inni itteggʷeden SIDI, tecřem x SIDI. Netta d twiza nsen d taseddart nsen i useřqi. 12 SIDI iɛqeř xaneɣ, Netta ad ibarek. Ad ibarek taddart n Israil, ad ibarek taddart n Harun. 13 Netta ad ibarek inni itteggʷeden zi SIDI, imeẓyanen jmiɛ ak-d imeqqranen. 14 SIDI ad awem issmarni tarwa, i kenniw uřa i injiren nwem. 15 Kenniw tᵉttwabarkem zi SIDI, wenni iggin ijenwan d temmurt. 16 Ijenwan, wah, ijenwan n SIDI, maca tammurt iwca i-tt i tarwa n bnadem. 17 Imettan war zemmaren ad ssemɣaren SIDi, uřa d inni dd-ihwan deg ususem. 18 Neccin ad nbarek SIDi, zi řexxu ař i řebda. Hallilu-Yah!