Awařen Iweznen 7

1 Mmi inu, ḥḍa awařen inu, xemmeř tiweṣṣa inu ɣarek. 2 Ḥḍa tiweṣṣa inu u cek ad teqqimed teddared, ḥḍa taɣuri inu am mummu n tiṭṭ nnec. 3 Qqen i-tent ɣar iḍewḍan nnec, ari tent x teřwiḥt n wuř nnec. 4 Ini i tiɣit: ‘Cem d učma!’, u semma řefhamet: ‘Ameddukkeř inu!’, 5 maḥend nitenti ad cek ḥḍant zi temɣart tabarranect, zi temɣart zi barra i cek ittɣarran s wawařen nnes. 6 Maɣar zi řkazi n taddart inu, jar ccebbac n řkazi sewḍeɣ ɣar wadday, 7 sewḍeɣ ɣar iḥafiyyen inni war ittḥikin, jar iḥenjiren n bnadem ḥekkareɣ ijj n uḥudri s wuř war imten. 8 Netta iẓwa abrid ɣar teɣmart nnes, u iṭṭef abrid ɣar taddart nnes. 9 Ɣar tbambast, ɣar tmeddit n wass, di řaǧaɣ n ǧiřet d tubbarcent, 10 xzar, aqa ict n temɣart tusa-dd i umsagar akides, deg warruḍ n temɣart n farq-ccɣeř u s teḥraymect n wuř. 11 Nettat textix u tɣewweɣ, iḍaren nnes war qqimen ɛad di taddart. 12 Ict n twařa di barra, xenni ɛawed deg wazzayen, ɣar marra tiɣemmar n ibriden tᵉttḥama. 13 Nettat tᵉṭṭef i-t u tessudem i-t, teqjar udem nnes, tenna as: 14 “Tuɣa xafi maḥend ad wceɣ tiwhibin n řehna. Ass-a ssqefřeɣ lwuɛud inu. 15 X uya i dd-ffɣeɣ maḥend ad cek mmsagareɣ, maḥend ad xak arzuɣ u ammu i cek ufiɣ. 16 Necc ssuɣ maltat x qama inu, řizarat izewwqen zi řeqten azdad zi Miṣra. 17 Necc rucceɣ tassut inu s mirru d wecfiř d řqarfa. 18 As-dd, ejj aneɣ ad nejjiwen asḥinneb ař tuffut, ejj aneɣ ad narr meẓri di řirart n tayri. 19 Maɣar aryaz war iǧi di taddart, netta isafar iggʷej aṭṭas. 20 Iksi ict n tkemmust n tmenyat n nnuqart akides, ad yareggʷeḥ ɣar wass n tziri iqefřen." 21 Ammu i t tᵉṭṭef s waṭṭas n řhard nnes, teɣwa i-t s řehrud nnes izewwqen n iyencicen nnes. 22 Deɣya netta yardef i-tt, am yijj n ufunas igguren ɣar řgurnet, am ict n ssnesřet x iḍaren n wenni igguren ɣar umarret n ubuhaři 23 - ařami dd as tcarreg fřitca tsa - am yijj n wejḍiḍ iḍwin deg ijj n wenday, u war issin aqa wanita ittwagg ḍidd i tudart nnes. 24 Xenni řexxu, a iḥenjiren, sřem-dd ɣari, u sřem ɣar wawařen n uqemmum inu. 25 Ejj uř nnec war ittweddir deg ibriden nnes, war ttmeyyiř ɣar imesraq nnes. 26 Maɣar deg waṭṭas ittwayezmen inni teɣḍer, imɣar waṭṭas lɛadad n marra inni tenɣa. 27 Taddart nnes teccur s ibriden ɣar řaxart nni ihekkwan ɣar ixxamen n daxeř n řmewt.