Awařen Iweznen 31

1 Awařen n Lamuyil, ajeǧid n teqbič n Massa, i zi t tɛeřmed yemmas. 2 Min din, a mmi, min din, a mmi n weḥsin inu, min i ɣa tegged, a mmi n lwuɛud inu? 3 War ttic tizemmar nnec i temɣarin, uřa ibriden nnec i tinni itthellaken ijeǧiden. 4 War dd-tusi i ijeǧiden, a Lamuyil, war dd-tusi i ijeǧiden maḥend ad swen binu, uřa i ayt n jjehd maḥend ad meẓren di ccrab. 5 Niɣ ad isuw u ad ittu lfariḍa, u ad issfarɣ tanfuč n marra imxeyyben. 6 Ewc ccrab i yinni i ɣa ittwahellken, uřa d binu i yinni d imerzagen di řeɛmar nsen. 7 Ejj i-t ad isuw u ad ittu zzeřḍ nnes, ejj i-t war ttxarraṣ di tamara nnes ɛad. 8 Arzem aqemmum nnec i iziynan, i ddeɛwet n marra inni ittwajjen. 9 Arzem aqemmum nnec, ḥkem s řḥukm nican, uca aɣ tasɣart i umezřuḍ. Asemɣar n temɣart imeḥḍen 10 Alif. Man wen i ɣa yafen ict n temɣart imeḥḍen? Ttaman nnes iɛdu marra řmarjan. 11 Bit. Xas i ittcařa wuř n weryaz nnes, war d as ittxeṣṣi řefḍeř. 12 Gimel. Nettat tᵉttegg as min iṣebḥen, war iǧi řɣar, marra ussan n tudart nnes. 13 Dalit. Nettat tarezzu taḍuft d tiffest, u txeddem s ifassen nnes imeḥḍen. 14 Hi. Nettat tegga am tɣarruba n usebbab, zi řaggʷaj tᵉttawi-dd macca nnes. 15 Waw. Nettat tᵉttnakkar umi ɛad teǧa ǧiřet, tᵉttic macca i taddart nnes, u tasɣart nsent i temsexxarin nnec timeẓyanin. 16 Zayin. Nettat tᵉttxarraṣ deg iyyar u tᵉtteṭṭef i-t, zi řɣiǧet n ifassen nnes teẓẓu tizayarin deg umarjeɛ. 17 Xit. Nettat tbekkes tijɛinnatin nnes s jjehd, u tessemḥaḍ iɣaǧen nnes. 18 Tit. Nettat tḥekkar i řefḍeř n tsebbabt nnes, řefnar nnes war ixessi di ǧiřet. 19 Yud. Nettat tesswiẓẓeḍ ifassen nnes ɣar trukka, u ifassen nnes ṭṭfen amekkuk n uxeyyaḍ. 20 Kaf. Nettat tarezzem afus nnes i umeḥdaj, tesswaẓẓaḍ ifassen nnes i umezřuḍ. 21 Lamid. Nettat war tᵉtteggʷed zi taddart nnes di ssibbet n wedfeř, maɣar marra taddart nnes ɣares arruḍ arjuwani. 22 Mim. Nettat tegga i yixef nnes tisuntawin n zwaq, arruḍ nnes s řeqṭen azdad d ufiřu arjuwani. 23 Nun. Aryaz nnes ittwassen di tewwura, xmi ittɣima ak-d imɣaren n temmurt. 24 Samix. Nettat tᵉttegg arruḍ n řeqṭen uca tezznuza i-t, nettat tezznuza ibuyas i usebbab zi Kenɛan. 25 Ɛayin. Jjehd d řɛezz d arruḍ nnes, nettat tḍeḥḥec tesfarnin x wass i dd ɣa yasen. 26 Pi. Nettat tarezzem aqemmum nnes s tiɣit, aqa din taɣuri s tmexsiwt icewwaren x yiřes nnes. 27 Tsadi. Nettat tḥeṭṭa x min ittemmsaran di taddart, aɣrum n řeɛgez war tᵉttett. 28 Quf. Iḥenjiren nnes ttekkaren, ssemɣaran tt s řefraḥet, uřa d aryaz nnes ittmeddeḥ i-tt. 29 Rix. Aṭṭas n tyessit ggint timegga jehdent, maca cem teɛdud-dd ten marra. 30 Cin. Řebhut tcemmet u aẓri ittɣecca maca tamɣart nni itteggʷden SIDI, ittxeṣṣa ad tt ssemɣaren. 31 Taf. Wcem as zi řɣiǧet n ifassen nnes, jjem timegga nnes ad as ṣebbḥent ɣar tewwura.