Awařen Iweznen 28

1 Iɛeffanen ttrakkwařen waxxa war dinni wi i-ten iḍaffaren, maca imseggaden daysen taryast am n ijj n wayrad. 2 Zi ssibbet n uɛeddi n temmurt aqa din aṭṭas n řḥukkam nnes, maca s ijj n bnadem s řeɛqeř d tussna, ad teqqim ṣṣulṭa tbedd i yijj n řweqt d azirar. 3 Aryaz amezřuḍ nni ittzeyyaren x imarxa, am wenẓar ittawyen marra, ař war ittɣimi ɛad weɣrum. 4 Inni ittejjan Ccariɛa ssemɣaran aɛeffan, maca inni iḥeṭṭan Ccariɛa ttmenɣan akidsen. 5 Iryazen iɛeffanen war fehhmen řḥeqq, maca inni yarezzun SIDI, fehhmen i kuřci. 6 Iḥřa umezřuḍ nni igguren iṣfa, x wenni igguren ifarɣ di tnayen n ibriden, waxxa netta ɣares agřa. 7 Wenni iḥeṭṭan Ccariɛa, d ijj n mmis ifehhem, maca wenni d ameddukkeř n imelhaf, yarra babas ad iseḍḥa. 8 Wenni issemɣaran agřa nnes s arriba d warbeḥ, issmuna aya i wenni ittḥinnan x imezřaḍ. 9 Wenni issḥeyyaden amezzuɣ nnes zeg useǧi n Ccariɛa, ɛad taẓaǧit nnes d nnɛi. 10 Wenni ittarran inni igguren nican ad weddaren x ijj n webrid aɛeffan, netta simant nnes ad iwḍa di tesraft nnes, maca inni i di teǧa řekmaret ad warten min iṣebḥen. 11 Bu-wagřa ittegg ixef nnes d amiɣis di tiṭṭawin nnes, maca ijj n umezřuḍ nni di teǧa řefhamet, yargeb xas. 12 Mařa ad sřiwřiwen imseggaden s řefraḥet, aqa din aɛuǧi ameqqran, maca mařa kkaren-dd iɛeffanen, ad issnuffar bnadem ixef nnes. 13 Wenni iddařen ixeṭṭan nnes, war ittefřiḥ, maca wenni zzaysen ineɛɛmen u ittḥeyyad xasen, ad yaf arreḥmet. 14 Sseɛd n bnadem nni ittweqqaren břa abeddi, maca wenni isseqsaḥen uř nnes, ad iwḍa di řɣar. 15 Am ijj n weyrad ittarrujduden, am ijj n ddub ittřaẓan ittazzřen zi ssa ɣar diha, ammu i iǧa ijj n řḥakem aɛeffan x ijj n řgens amezřuḍ. 16 Řḥakem nni břa řefhamet, aqa-t d řḥakem x waṭṭas n werbaḥ s ubeɛɛej, maca wenni icarrhen arbeḥ, ad izzuggart ussan nnes. 17 Ijj n bnadem ittwaḥṣaren umi issizzeř idammen n ca n yijjen, ad yarweř ɣar weḥfur n wenḍeř n yixef nnes. War ttejji ḥed ad t issbedd! 18 Wenni igguren abrid nnes di řeṣfayet, ad injem, maca wenni igguren ifarɣ di tnayen n ibriden, war ittɛeṭṭar ad iwḍa. 19 Wenni icarrzen tammurt nnes, ad ijjawen s weɣrum, maca wenni iḍeffaren aryaz ixwan, ad ijjawen zzeřḍ. 20 Aryaz i di iǧa řaman aṭṭas ad iksi aṭṭas n lbarakat, maca wenni ittqeǧiqen ḥima ad igg agřa, war ittwiḥsib d amezdag. 21 Asfarz n wudmawen war icni ca, maɣar i yijj n uřeqquz n weɣrum izemmar ca n weryaz ad ixḍa. 22 Aryaz s tiṭṭ taɛeffant ittqeǧiq ɣar wagřa, maca netta war issin aqa řexses ad ɣares dd-yas. 23 Wenni ittɛaqaben ijj n bnadem, aqa ɣar uneggar ad yaf arḍa ktar x wenni isscanan taẓyuḍi s yiřes nnes. 24 Wenni ittkeccaḍen babas niɣ yemmas uca iqqar: “War iǧi d ddenb!”, aqa-t d acric n ijj n bu-řaxart. 25 Wenni di iǧa nnfaxet, issekkara-dd amcubbec, maca wenni ittcařan x SIDI, ad idweř labas xas. 26 Wenni ittcařan x wuř nnes, aqa d abuhaři, maca wenni igguren abrid nnes di tiɣit, ad injem. 27 Wenni itticen i imezřaḍ, war dayes ittiři bu řeɣben, maca wenni itteqqnen tiṭṭawin nnes, ad ittwanɛeř aṭṭas. 28 Mařa kkaren-dd iɛeffanen, xenni ittnuffar bnadem, maca mařa ttwahellken nitni, ad mmarenyen imseggaden.